Read Makhuwa-Shirima Amosi 4 Bible Online

Amosi 4 - Makhuwa-Shirima bible

Amosi 4

¹Mwiiwe masu ala nyuwosa imombe ithiyana sa oBaxani muri vamwaako wa oSamariya, nyuwosa asithiyana munaahasula oohaawa, munaattikittha oothoiwa, ngweerelaka asiiyinyu: “Muniruuheleke soowura weera niwure!”

²Yave onlamula sootheene oolipela mootteelanimwawe: “Vekhaikhai enoophiyera ehuhu muneeraanyu mpuruliwe ni iyuuma soongweyano, ni ookisera a nyuwo onoopuruliwa ni mameso.

³Khula mutthu a nyuwosa onookhumela mmitarini sa exiri, ni munoovonyeriwa mpatta wa oHaremoni,” onghima Yave.

⁴“Murowe oBeteli ni mwatthekewo; murowe oGiligali ni mwatthekaxewo. Khula oxeexelo mpake sooveleelasanyu, mvahe sanaamulokosanyu khula vayaakhani yanaararu.

⁵Muhise epaawu yookhalano eferementu ntoko yooveleela yootthapela ni mwiikuxerereno soovahasanyu sootheene sa otthunawanyu, nyuwosa aYixrayeli, niwoko ti yeeyo munsivelaanyu opaka,” onghima Yave onlamula sootheene.

⁶“Ti Miyo koovolihani etala wa khula esidade, ni othowa wa yooca mmapuroni moothemwene, ni waarookhalaru hiiho, nyuwosa khamuhokoleenle wa Miyo,” onghima Yave.

⁷“Ti Miyo kahaarupihale epula, saahalaaya nyeeri miraru wa ohepha. Kaarumihela epula esidade emoha, vaheera esidade ekina hoye. Ematta emoha yaarupeliwa epula; ekina khayaarupeliwe, enuuma.

⁸Atthu a isidade piili hoye hoye tthaaru yaarowa esidade ekina eveveleyaka waasa maahi, ehimalihaka ntthona. Vano waarookhalaru hiiho, nyuwosa khamuhokoleenle wa Miyo,” onghima Yave.

⁹“Imaara sincipale kittarunxaaka mattimbaanyu ni imatta sa iwuuvasanyu; kaattaruxa ni soowaaliwa suuma niwoko na oviha. Nasope oonyaanya imattasanyu sa iwuuva* ni sooliveirasanyu*. Mene orookhalaru hiiho, nyuwosa khamuhokoleenle wa Miyo,” onghima Yave.

¹⁰“Kaahoorumihelasani mahooxo ntoko kaapakenlaaka wExipitu. Kaawiiva amiravo ni ekatana; kaahiya sivariwaka ikavalusanyu*. Kaahunkhihaxa mphulanimwanyu ni wunkha wa anamakhwa mwaakonenlaanyuwo, mene waarookhalaru hiiho, nyuwosa khamuhokoleenle wa Miyo,” ongima Yave.

¹¹“Kaaphwata isidadesanyu ikina ikina, ntoko kaaphwantaaka oSodoma ni oGomora. Mwaari ntoko nrusuwela, mene waarookhalaru hiiho, nyuwosa khamuhokoleenle wa Miyo,” onghima Yave.

¹²“Tivawo ti yeeyo kineeraaka koopakeleni, Ii! aYixrayeli. Keenre kinoopakelani yeeyo, aYixrayeli, mwiirehererele okumana ni Mulukwaanyu!”

¹³Yoowo ompaka nyaako, ompattuxa epheyo ni onimusuweliha mutthu soowuupuwelasawe, yoowo ontatuxa ekamaama ya oxa epiphi, ni onnyikala nyaako sa mulaponi — Nsinanawe ti Yave, Muluku a ikuru sootheene!