Read Makhuwa-Shirima Amosi 5 Bible Online

Amosi 5 - Makhuwa-Shirima bible

Amosi 5

¹Ii! Muloko wa oYixrayeli, mwiiwe masu ala a olalamikeliwawanyu:

²“Mwaamwali oowiikosoopa oYixrayeli, oomora woohiweherera ovenyatho. Oothaamiwa mulaponimwawe ni khawoworu aneera amvenxe.”

³Yave onlamula sootheene, oneera ha: “Esidade eneera yaarumihele okhottoni asilopwana macira muloko, enoohalano asilopwana ncira paahi; ni muttetthe oneera waarumihe ncira, onoohalano asilopwana muloko paahi.”

⁴Yave oneerela ha muloko wa oYixrayeli: “Mukaase, ni munookhalano okumi;

⁵muhaase oBeteli, muhirowe oGiligali, muhivireru oBerexeba. Vano vekhaikhai, amaki a oGiligali anoroonghiwa wootthukiwani, ni oBeteli onooheliwa nthala.”

⁶Mmwaase Yave ni munookhalano okumi; ohiyanawaya, Owo onimwiixoonihera ntoko mooro eriyari ya ekhapira ya Yoseefe, mwa yoowo onuulalihe esidade ya oBeteli, ahikhalakaruwo aneera acipihe.

⁷Nyuwosa muntatuxa yookwanela enakhala yoohapala, mumvonyera vathi ekhaikhai.

⁸Yoowo opanke mikuttula sa ithenyeeri ithannapiili ni mikuttula sa ithenyeeri siitthaniwa Oriyoni*, ontatuxa epiphi ekamaama ni othana wa epiphi ya ohiyu; Yoowo oniitthana maahi a ephareiya, anamwaraxela mulaponi, vano Nsinanawe ti Yave.

⁹Owo onruuhela wootutuxereya ophwata moolipa, ni ophwata onrweela esidade yoolipihiwa.

¹⁰aYixrayeli animusoonda yoowo onaakiha ekhaikhai munuulummwa milattu, ni animuthanya yoowo onuuluma ekhaikhai.

¹¹Nyuwosa munimuhasula oohaawa munnyesererihaka woovahani etrigu. Tivawo, murootekaru impa sa maluku, khamukhalamo; muroophatteyaru imatta sa iwuuva* soopomba, khamuwura eviinyuwaaya.

¹²Vano Miyo koosuwela waatta seenraaya sootakhalasanyu ni wunnuwa seenraaya sootthekasanyu. Nyuwosa munimuhasula oororomeleya, munaakhela makhwankwa ni munghiiha opakeliwa ekhaikhai oohaawa munuulummwa milattu.

¹³Tivawo namiruku ommaalaawe weereyaka hiiho, niwoko ti ehuhu yoonanaraxa.

¹⁴Mwaasaase mpuha ohikhanle yoonanara, weera mukhaleno okumi. Hiiho Yave, Muluku a ikuru sootheene, onookhala ni nyuwosa ntoko muhimmaanyu.

¹⁵Muthanye yoonanara; musivele mpuha. Mukhalihe ekhaikhai munuulummwa milattu. Apaale Yave, Muluku a ikuru sootheene, anaamorele ikharari yaawo ahalahanle a Yoseefe.

¹⁶Vanonto Yave, Muluku a ikuru sootheene, oneera ha: “Onookhala olalamika mmapuwani moothemwene, ni okhuweliwa wa othanana mmiseweni moothemwene. Anamalima anoolattuliwa weera yiinle, ni anamwiikhupanyera weera elalamike.

¹⁷Onookhala olalamika mmamattani moothemwene mwa iwuuva*, niwoko kinoovira eriyaraanyusa,” onghima Yave.

¹⁸Ii! Nyuwosa munghaawela nihuku na Yave! Munghaawelela heeni nyuwosa nihuku na Yave? Nno nnikhale nihuku na epiphi, ohikhanle waara.

¹⁹Nnikhale ntoko mutthu onimutthawa mwatto anamukumanano ursu*; ntoko mutthu omvolowa mpaanimwawe, anaphiteerihela ntatanawe vaxirini, analummwawo ni enowa.

²⁰Nihuku na Yave, nnikhale na epiphi ohikhanle waara. Eniikhale ewiriphi woohimwaleeleyaru.

²¹“Miyo kinthanya ni kinnyoosa ifestasanyu sa ediini; nkimvilela mithukumanosanyu soolapa.

²²Naari nyuwosa mukiruuhelaka sooveleela soohisa ni sa irooro, iyo khasinkisiveliha. Naari mukiruuhelaka sooveleela sooreerela sa murettele, nkimpwatthelaru seiyo.

²³Mususihe wa Miyo oruma wa iciposanyu ni oruma wa amakitaanyu.

²⁴Ohiya yeeyo, wookoleleya otthimake ntoko mooloko, ekhaikhai ntoko nxaapwa nihingwelelaru!

²⁵Ii! Muloko wa oYixrayeli, weeraka nyuwo mwaakivaha sooveleela ni soovaha mweehuhuni ya iyaakha miloko mixexe kaaweettihaakani munikareni?

²⁶Hoye! Nyuwosa mwaateexa ecaambulo ya mwenaanyu Sikute ni Kiwumi, muluku wa ethenyeeri, mwa seiyo mwiipakenlaanyu.

²⁷Tivawo Miyo kineeraaka koorongheni wootthukiwani elapo ekina, okhopela elapo ya oDamasku,” onghima Yave, mwa Yoowo Nsinanawe ti Muluku a ikuru sootheene.