Read Makhuwa-Shirima Amosi 7 Bible Online

Amosi 7 - Makhuwa-Shirima bible

Amosi 7

¹Aakoonihenraawe Yave, onlamula sootheene, ti ela: Owo aamureherera nasope vahoolo wa ohepha wa mwene, ehuhuweene yeele onthapuruwaaya ohepha wanaaveeli.

²Ahononneene soohepha sootheene sa mmatta, miyo kaakhuwela: “Yave, onlamula sootheene, mulevelele! Anaakhale hayi ni okumi Yakobe? Niwoko owo ori mukhaanene!”

³Vano Yave aakhurunuwa. Yave onlamula sootheene aaheera: “Eyo khayeereya.”

⁴Yeeyo Yave, onlamula sootheene, aakoonihenraawe ti ela: Kaamoona Yave onlamula sootheene iitthanaka mooro wa nthorihelo; owo waalaliha wuumihaka moowiixera, onanyaanya etthaya.

⁵Vano miyo kaakhuwela: “Yave, onlamula sootheene, miyo kinoodyoonttelelani weera mweemele! Anaawere hayi Yakobe okhala ni okumi? Niwoko owo ori mukhaanene!”

⁶Hiiho Yave aakhurunuwa. Yave onlamula sootheene aaheera: “Eyotho khayeereya.”

⁷Owo aakooniheratho ela: Kaamoona Yave eemenleene muxerexere exiri yootekiwa ni efiiyu yoowookolelano, avarenleene efiiyu yoowookolelano.

⁸Yave aakikoha: “Amosi, munoonani?” Miyo kaamwaakhula: “Kinoona efiiyu yoowookolelano.” Vano Yave aaheera: “Moone! Kiniikaathi efiiyu yoowookolelano eriyari ya mulokwaaka aYixrayeli; muloko owo nkuurelatho.

⁹Vaheera mapuro oolapa a Isaaki anooheliwa nthala, ni mapuro ootteela a Yixrayeli anoophwatiwa; Miyo kinoovenyera ekhapira ya Yerobowami kikuxaleene ekatana.”

¹⁰Vano Amaziya, musaserdoti* a oBeteli, aalamulela oleeliwa Yerobowami, mwene a oYixrayeli: “Amosi onnoovaanelelani eriyari ya aYixrayeli; elapo kheewera ovilela maswaawe ootheene.

¹¹Onghimaawe Amosi ti ela: ‘Yerobowami onimwiiviwa ni ekatana, ni woohihovela Yixrayeli onooronghiwa wootthukiwani elapo ekina, ottai wa elapo oyareliwaawe.’ ”

¹²Vahoolowaya, Amaziya aamweerela Amosi: “Opwaheke namoonihera* weyo! Orowe oYuda wathalihere otthuna wa Muluku; waphwanyewo yoocaawo.

¹³Ohithaliheretho otthuna wa Muluku oBeteli, niwoko nna ti Nipuro Nootteela* na mwene ni empa ya olapa ya omwene.”

¹⁴Amosi aamwaakhula Amaziya: “Miyo nkihiyono mprofeeti naari mwaana a mprofeeti, kaakosoopa muhuwo paahi ni kaahepha ifiigu sa ntuphini.

¹⁵Vaheera Yave ookivenxa vamutekoni, muxerexere muhuwo, anakeerela: ‘Murowe mwathalihere otthuna wa Muluku oYixrayeli, mulokwaaka.’

¹⁶Vanonto, mwiiwe masu a Yave, nyuwo muneera: ‘Muhithalihere oYixrayeli otthuna wa Muluku, ni muhihiyerere olaleera ekhapira ya Isaaki.’

¹⁷Vaheera Yave ongweerelani: ‘Amwaarinyu anoothatuwa puuta a musidade, ni anamwaniinyu asilopwana ni asithiyana animwiiviwa ni ekatana. Ilaposanyu sinookawaniwa, ni nyeenyuweene munookhwela omalaponi. Vano, woohihovela, Yixrayeli onooronghiwa wootthukiwani elapo ekina, ottai wa elapo oyareliwaawe.’”