Read Makhuwa-Shirima Amosi 8 Bible Online

Amosi 8 - Makhuwa-Shirima bible

Amosi 8

¹Yave a ikuru sootheene ookoonihera mpapara wa soowiima soowiitthwa.

²Owo aakeerela: “Amosi munoonani?” Vano miyo kaamwaakhula: “Kinoona mpapara wa ifiigu soowiitthwa.” Vano Owo aakeerela: “Woophiya ommaleloni wa aYixrayeli, mulokwaaka; nkuurelatho.”

³Yave, onlamula sootheene, oneera ha: “Nihuku nno, icipo siniipiwa Mpaani mwa Muluku, sinoothatuwa soolalamika. Sinookhala mittembo sincipalexa sineera sivonyerasiwe mmipattani sootheene! Fataari mmaaleke!”

⁴Mwiiwe, nyuwosa munaanyikalasa oohaawa ni munaahela nthala oothoiwa a mulaponi,

⁵mweeraka: “Yaakhani sineeraaya sivire ifesta sa mweeri munyowani weera nithumihe etrigu, ni yaakhani sineeraaya sivire iSaabadu weera nithumihaxe irooro?” Nintthuna orikiha, nivukulaka miringo wa musurukhu woopwaha,

⁶nimuthumaka oohaawa ni eparatha* ni oothoiwa ni ikwakwaatta piili, nithumihaka mpaka ikokhola ni etrigu.

⁷Yave aalipela mwaha wa wiixoona wa Yakobe: “Nkinttiwalaru yeeyo apankaaya.

⁸Weeraka etthaya kheetetereya mwaha wa yeeyo, ni khayiinla ootheene ankhalamo? Elapo yootheene ela enoonyakhula ntoko Nilu, enootekuma vahoolowaya ettatteke ntoko mooloko wa wExipitu.

⁹Nihuku nno,” onghima Yave onlamula sootheene, “kinoopakiha weera nsuwa nineele othana eriyari, ni oreene ngwee kiruuheleke epiphi elapo.

¹⁰Ifestasanyu kinootatuxa wiinanela ni iciposanyu sootheene olalamika. Kinoopakiha weera ootheene nyuwo ngware soowiinanelano ni mmetthe. Kinoopakiha weera nihuku nno nikhale ntoko na omwiinlela mwaana mmoharu, ni ommaleloniwaya ntoko nihuku na othananaxa.

¹¹Eneera ephiyaka mahuku,” onghima Yave onlamula sootheene, “kineeraaka kirumihele etala elapo yootheene ela — ehikhanle etala ya yooca naari ya ntthona, mene etala ni ntthona na wiiwa masu a Yave.

¹²Atthu eniixoraxorele ephareiya ephareiya, mpatta wa ottuttuwani mpaka mpatta ninkhuma nsuwa, yaasaasaka masu a Yave, mene kheephwanya.

¹³Nihuku nno asimwali ooreera ni amiravo oophwaneliwa anookomoka ntthona.

¹⁴Yaale anlipela mwa nsina na oSamariya yeeraka: ‘Mwa nsina na muluku a oDani,’ hoye hoye, ‘Mwa nsina na muluku a oBerxeba,’ anoomora woohivenyatho.”