Read Makhuwa-Shirima Amosi 9 Bible Online

Amosi 9 - Makhuwa-Shirima bible

Amosi 9

¹Kaamoona Yave valtaarini* ni Owo aaheera: “Mmane vasulu wa amarimbu weera sittikinyeye isereemu. Mpakihe weera iyo saamorele ootheene arimo; ni yaawo eniihalahale kinoowiiva ni ekatana. Khawoworu anaatthawe naari anoopowe.

²Naari ethipaxaka mpaka moowiixera mwa okhwa, ntatanaka nnimwaakhumihamo. Naari ewelaka mpaka wiirimu, iwo kinimwaakuruxawo.

³Naari yiipithaka vatthomelani wa mwaako Karamelu, iwo kinimwaalupattha, kaatthukeke. Naari ekiipithaka moowiixera mwa ephareiya kinoolamulelamo enowa weera yaalume.

⁴Naari eronghiwaka wootthukiwani elapo ekina ni amwiittanaaya, kinoolamulelawo ekatana weera ewiive. Kinimwaawehaweha weera kaaruuhele erisa ohikhanle mpuha.”

⁵Yave, Muluku a ikuru sootheene onoopaka yeeyo. Owo ontava etthaya ni eyo enootothowa; ootheene ankhalamo aniikhupanyera; Owo onnyakhuliha elapo yootheene ntoko Nilu, ni vahoolowaya onttattiha ntoko mooloko wa wExipitu.

⁶Yave onteka ikwartusawe sa osulu wiirimu ni onkhaliha mathipelowaaya vatthayani. Owo oniitthana maahi a mphareiya, anamwaraxela vatthayani. Nsinanawe ti Yave.

⁷“Nyuwosa aYixrayeli, khamuhiyono ooreerela wa Miyo waapwaha aKuxe,” onghima Yave. “Miyo kohaakhumiha aYixrayeli wExipitu, menetho aFilisti oKaftori ni awArami oKiri.

⁸Woohihovela Yave a ikuru sootheene ongwehexexa omwene ola wootthekeya. Miyo kinoohonona mulaponi, mene nkiphwata woomalela ekhapira ya Yakobe,” onghima Yave.

⁹“Vano kinoolamulela ni kinookukuttha muloko wa oYixrayeli eriyari ya miloko sootheene, mooteene yoole etrigu emveeriwaaya, ehinamoraru enuku.

¹⁰Anamattheka ootheene ari eriyari ya mulokwaaka animwiiviwa ni ekatana, ootheene yaawo aneera: ‘Kheenitavaru naari kheeniphwanyaru erisa.’”

¹¹“Nihuku nno kinooreherera eheema ya Davide emonre. Kinooreherera yeeyo mipattasaya soonanara, ni kinoorasela milepesaya. Miyo kinimweemexa ntoko yaaraaya khalayi,

¹²weera mulokwaaka omukuxe ohalahanle a wEdomi ni miloko sootheene siri sawaka,” onghima Yave, aneera apake itthu iya.

¹³“Anoophiyera mahuku,” onghima Yave, “namahepha aneeraawe aphwanyiwe ni namattipura, ni namwaala aphwanyiwe ni namavotta iwuuva*. Enoottonya eviinyu enyowani mmanyaakoni ni enoopiluwa mmattumuxani moothemwene.

¹⁴Kinimwaahokoloxa aYixrayeli, mulokwaaka oronghiwe wootthukiwani; awosa anoorasela isidade sooheleya nthala ni mmo anookhalamo. Anoophatteya imatta sa iwuuva*, ewureke eviinyuwaaya; anoolima woophatteyamo nyiri eceeke soowiimasaya.

¹⁵Kinimwaatekiha aYixrayeli mulaponimwaya ni kheevenxiwamotho mulaponi kaavanghaaka,” onghima Yave, Mulukwaanyu.