Read Makhuwa-Shirima Obadiya 1 Bible Online

Obadiya 1 - Makhuwa-Shirima bible

Obadiya 1

¹Moonelo wa Obadiya: Yave Onlamula Sootheene oneerela ha wEdomi: Nohiiwa mutthenga wa Yave — namutthenga orumiheliwe miloko sa elapo ya vathi eeraka: “Mvenyeke ni niroweke nawaneno wEdomi!

²Moone, kinimooyevihani variyari wa miloko. Munooramusiwa!

³Wiixoonawanyu wohoolokotthani, nyuwo munkhala mmakhukuni a nyala ni munteka wookhalawanyu vasulu wa mwaako mwiixeerelaka: ‘Khaawo anaakimoroxe.’

⁴Hata mwiirakamelihaka ntoko xaaka munapaka epuurwaanyu variyari wa ithenyeeri, Miyo kinimoomoroxani,” oneera ti Yave.

⁵“Anamwiiya ni anamatakhala yoorweelakani ohiyu, anookuxa seiyo antthunaaya paahi. Yaale anghepha iwuuva* yoorweelakani, anoohiya iwuuva* sikina? Ii! Moota muhaleenlaanyu ophwatiwa!

⁶Vanonto, moota aneeraawe ahuhuliwe Esawu ni mihakhusawe sa wiiphiini aniiyeriwe!

⁷Asinthamwenaanyu ootheene anoonyesererihelani omwiinanoni; aani awo anoolokotthani yoowinakani. Yaale anca yoocaanyu animoorehererelani ntapha wa nyuwo, mene khamurwa moona.

⁸Vanihukuni nno kinimwaaphwata anamiruku a wEdomi ankhala mmanyaakoni sa Esawu,” oneera ti Yave.

⁹“Anakhotto a nyuwo, Temani, onoowuuma owanoni ni ootheene ankhala mmanyaakoni sa Esawu animwiiviwa.”

¹⁰“Munimuulihiheya muru niwoko na nipuhero na omwiiva munninyu Yakobe; munoophwatiwa woomalela.

¹¹Nyuwosa mwaakhalawo muhaakhaviheraka, anamarwa yaarwiiyaaya ehuhulaka mihakhusawe, evolowaka milakosawe epakelaka macitta oYerusaleemu. Nyuwosa mweettelowaanyu waari ntoko yaawosa.

¹²Nyuwo khawaawereya oweha ni ohakalalela yeeyo yaamweereenle munninyu munihukuni na mahooxowaawe, naari ohakalalela ophwatiwa wa muloko wa Yuda, hata khawaawereya wuuluma ni wiixoona munihukuni na makacamihowaawe.

¹³Khawaawereya ovoleela milako sa mulokwaaka munihukuni na mahooxowaawe, naari ohakalalela ohaawawawe munihukuni na oheliwawawe nthala, hata wiiyeriwa mihakhusawe munihukuni na erisaawe.

¹⁴Khawaawereya oweherera mmathakalaano weera ngwiive yoopongwe hata owinnyerera yaawo yaahalahanle munihukuni na mahooxowaaya.

¹⁵Nihuku na Yave nookhuveela wa miloko sootheene. Mweenre mpaka hiiha, munoopakeliwatho. Yoonarara mpankaanyu, enimoomorelani.

¹⁶Mooteene yoowo mwaawunraanyu nthorihelonaka vaNttumuxaniwaka Nootteela, hiihotho miloko sootheene sinoowura. Sinoowuraxa woohihiyerereya mpaka ommaleloni, ni nsikhale ntoko khasinakhale.

¹⁷Vaheera vamwaako Siyoni onuukhale woopowa; mwaako ole onuukhale wootteela ni ekhapira ya Yakobe enookhalano yoohiyeriwaaya.

¹⁸Ekhapira ya Yakobe eniikhale mooro ni yeeyo ya Yoosefe malumaaya, vaheera ekhapira ya Esawu eniikhale malaxi. Anoohisiwa ni mooroweene yoowo. Khakhalaru naari mmoha a ekhapira ya Esawu,” oneera ti Yave.

¹⁹Atthu a oNegeba anookuxa mmanyaakoni sa Esawu ni atthu a muxerexere wa mmanyaakoni anookuxa elapo ya aFilisti. Awosa anookuxasa imatta sa wEfrayimi ni oSamariya ni aBenyamini anookuxa oGiliyade.

²⁰Anamavariwa a aYixrayeli anookuxasa elapo ya oKanaani mpaka oZarefati. Anamavariwa a oYerusaleemu ari oSefaradi anookuxa mittetthe sa oNegeba.

²¹Yaale yoopongwe anoowela vamwaako wa oSiyoni weera elamule nyaako sa Esawu. Ni omwene onuukhale wa Yave.