Read Makhuwa-Shirima Yoonasi 1 Bible Online

Yoonasi 1 - Makhuwa-Shirima bible

Yoonasi 1

¹Masu a Yave yaamurweenle Yoonasi, mwaana a Amitai, ni nlamulo nna:

²“Murowe woowaakuveya esidade etokweene ya oNinive ni mwalaleerewo, niwoko otakhalawaya woowela mpaka wa Miyo.”

³Yoonasi aatthawelatho ottaiwene wa Muluku arowaka oTaresisi. Aarowa mpaka esidade ya oYafa, mwa weiwo aaphwannyaawewo nikula ntokotoko naarowa oTaresisi. Alivakaru musurukhu wa mukwaha, aavolowa, arowaka oTaresisi weera amutthawe Yave.

⁴Wa soothesene, Yave aahoopihera epheyo etokotoko mphareiyani. Mitekuteku saari sitokotoko mpaka nikula naahanle vakhaani ottatta.

⁵Anamiteko a munikulani yaahoova, khula mutthu avekelaka okhaviheriwa wa mulukwaawe. Yaakhumbweliha mirindi mphareiyani weera niveruwe. Eyo eri hiiho, Yoonasi aarowa waakhurukutuwela, aniixaatalela, anakonaxa.

⁶Mutokweene a nikula aarowa wa yoowo, anamukoha: “Mungwera hai okhala vawo mukonaka? Mvenye ni munkhuwelele Mulukwaanyu. Apaale anaanimoreliwe ikharari weera nihikhwe.”

⁷Vano anamiteko a nikula yaahiiwanana yaaworu yeerelanaka: “Nrowe nipake macitta weera nimusuwele taani ori ni nthowa mwa yeela enikhumelenle.” Yaapaka macitta ni yaamphwanyano Yoonasi.

⁸Vano yaamukohakoha: “Munileele, taani ori ni nthowa na yoonanara ela? Mutekwaanyu tuuvi? Munrweela woowi? Elapwaanyu tiivi? Nyuwo a muloko heeni?”

⁹Yoonasi aawaakhula: “Miyo muHeberi, kinimulapa Yave, Muluku a wiirimu opattuxale ephareiya ni elapo ya vathi.”

¹⁰Anamiteko yaahookhwa maririmela, enamukoha: “Mpankeni?” Vano awo yaasuwela weera owo aamutthawa Yave, niwoko owo aahaaleela.

¹¹Woonaka weera mphareiya sannatepa mitekuteku, awo yaamukoha: “Nyuwo niweerihekeni eheeni weera ephareiya emaale?”

¹²Yoonasi aawaakhula: “Mukivare ni mukivonyere mphareiyani ni ela enoomaala. Miyo koosuwela weera ettheku etokotoko ela yoorweenleni nyuwo niwoko na miyo.”

¹³Wa soothesene, anamiteko a nikula yaakhurula ni ikuru sootheene yeereraka weera ehokoleele mukerekhere. Mene yaahooceela, niwoko ettheku yaahaattaxa.

¹⁴Yaamudyoonttelela Yave: “Dyoontte Yave, muhinihiye nikhwaaka niwoko noomwiiva mulopwana ola. Nihikhaleno nthowa woomwiiva mutthu oohikhalano nthowa. Vano Nyuwo Yave, moopaka yeeyo mwaatthunaanyu.”

¹⁵Vanonto yaamvara Yoonasi, enamvonyera mphareiyani yoosareya owali ni ele yaamaala.

¹⁶Yoonaka yeeyo, anamiteko a nikula yaamulapa Yave, yoovaka, empakelaka sooveleela ni emuroromelihaka itthu.

¹⁷Yave aarumiha ehopa etokotoko weera emmire Yoonasi. Owo aakhala mmirimani mwa ehopa ele othana miraru ni ohiyu miraru.