Read Makhuwa-Shirima Nuumeru 1 Bible Online

Nuumeru 1 - Makhuwa-Shirima bible

Nuumeru 1

¹Vanihukuni noopacera na mweeri wanaaveeli wa eyaakha yanaaveeli, aYixrayeli ekhumaleene wExipitu, Yave aahuuluma ni Moisesi Muheemani ya Muthukumano*, munikareni na oSinayi. Owo aamweerela:

²“Mumpake namalepela wa muloko wootheene wa aYixrayeli, mmahimoni ni mweemusinimwaya, mwaalepaka atthu ootheene, mutthu ti mutthu ni nsinanawe.

³Nyuwo ni Aharoni ngwaalikele asilopwana ootheene oolikana orumeela okhottoni, okhuma a iyaakha miloko miili woorowa ohoolo, muttharihaka okawanyeyawaya.

⁴Mulopwana a khula epuumba, mapwattapwattha a imusi, ookhavihereni.

⁵Masina a yaawo eneera yookhavihereni ti ala: a epuumba ya Rubeni, Elisuri, mwaana mulopwana a Sediwuri;

⁶a epuumba ya Simeyoni, Xalumiyeli, mwaana mulopwana a Zurixadayi;

⁷ya Yuda, Nahexoni, mwaana mulopwana a Aminadabi;

⁸ya Isakari, Netaneli, mwaana mulopwana a Zuwari;

⁹ya Zebuloni, Eliyabi, mwaana mulopwana a Heloni;

¹⁰a anamwane a Yoseefe: a epuumba ya Efrayimi, Elixama, mwaana mulopwana a Amihudi; ya Manaxe, Gamaliyeli mwaana mulopwana a Pedazuri;

¹¹ya Benyamini, Abidani, mwaana mulopwana a Gidiyoni;

¹²ya Dani, Ahizeri, mwaana mulopwana a Amixadayi;

¹³ya Axeri, Pagiyeli, mwaana mulopwana a Okrani;

¹⁴ya Gadi, Eliyasafi, mwaana mulopwana a Deyuweli;

¹⁵ya Nafitali, Ahira, mwaana mulopwana a Enani.

¹⁶Ti yaala yaathanliwe eriyari ya muloko, ahooleli a ipuumba sa makholowaaya, mapwattapwattha a mahimo a aYixrayeli.

¹⁷Vano Mosesi ni Aharoni yaahaathukumanyiha asilopwana yaathanliwe,

¹⁸enathukumanyiha muloko wootheene munihukuni noopacera na mweeri wanaaveeli. Asilopwana a iyaakha miloko miili woorowa ohoolo yaahiilepiha ettharihaka mahimwaaya ni imusisaya, khula mutthu ni nsinanawe,

¹⁹ntoko Yave aamulamulenlaawe Moisesi. Vano owo aawaalikela munikareni na oSinayi moota ha:

²⁰A ikhapira sa Rubeni, mwaana a ntthaara na Yixrayeli: asilopwana ootheene a iyaakha miloko miili woorowa muhoolo yeera erumeeleke okhottoni yaalepeliwe, khula mutthu ni nsinanawe, ottharihiwaka olepeliwa wa mahimwaaya ni imusisaya.

²¹Waatta wa epuumba ya Rubeni yaari asilopwana 46 500.

²²A ekhapira ya Simeyoni: asilopwana ootheene a iyaakha miloko miili woorowa ohoolo yeera erumeeleke okhottoni yaalepeliwe, khula mutthu ni nsinanawe ottharihiwaka olepeliwa wa mahimwaaya ni imusisaya.

²³Waatta wa epuumba ya Simeyoni yaari asilopwana 59 300.

²⁴A ekhapira ya Gadi: asilopwana ootheene a iyaakha miloko miili woorowa ohoolo yeera erumeeleke okhottoni yaalepeliwe, khula mutthu ni nsinanawe attharihiwaka namalepela a mahimwaaya ni imusi.

²⁵Waatta wa epuumba ya Gadi yaari asilopwana 45 650.

²⁶A ekhapira ya Yuda: asilopwana ootheene a iyaakha miloko miili woorowa ohoolo yeera erumeeleke okhottoni yaalepeliwe, khula mutthu ni nsinanawe attharihiwaka namalepela a mahimwaaya ni imusi.

²⁷Waatta wa epuumba ya Yuda yaari asilopwana 74 600.

²⁸A ekhapira ya Isakari: asilopwana ootheene a iyaakha miloko miili woorowa ohoolo yeera erumeeleke okhottoni yaalepeliwe, khula mutthu ni nsinanawe, attharihiwaka namalepela a mahimwaaya ni imusi.

²⁹Waatta wa epuumba ya Isakari yaari asilopwana 54 400.

³⁰A ekhapira ya Zebuloni: asilopwana ootheene a iyaakha miloko miili woorowa ohoolo yeera erumeeleke okhottoni yaalepeliwe, khula mutthu ni nsinanawe, attharihiwaka namalepela amahimwaaya ni imusi.

³¹Waatta wa epuumba ya Zebuloni yaari asilopwana 57 400.

³²Wa anamwane asilopwana a Yoseefe: A ekhapira ya Efrayimi: asilopwana ootheene a iyaakha miloko miili woorowa ohoolo yeera erumeeleke okhottoni, yaalepeliwe, khula mutthu ni nsinanawe, ottharihiwaka olepeliwa wa mahimwaaya ni imusi.

³³Waatta wa epuumba ya Efrayimi yaari asilopwana 40 500.

³⁴A ekhapira ya Manaxe: asilopwana ootheene a iyaakha miloko miili woorowa ohoolo, yeera erumeeleke okhottoni, yaalepeliwe, khula mutthu ni nsinanawe, ottharihiwaka olepeliwa wa mahimwaaya ni imusi.

³⁵Waatta wa epuumba ya Manaxe yaari asilopwana 32 200.

³⁶A ekhapira ya Benyamini: asilopwana ootheene a iyaakha miloko miili woorowa ohoolo, yeera erumeeleke okhottoni yaalepeliwe, khula mutthu ni nsinanawe, ottharihiwaka olepeliwa wa mahimwaaya ni imusi.

³⁷Waatta wa epuumba ya Benyamini yaari asilopwana 35 400.

³⁸A ekhapira ya Dani: asilopwana ootheene a iyaakha miloko miili woorowa ohoolo, yeera erumeeleke okhottoni, yaalepeliwe, khula mutthu ni nsinanawe, ottharihiwaka olepeliwa wa mahimwaaya ni imusi.

³⁹Waatta wa epuumba ya Dani yaari asilopwana 62 700.

⁴⁰A ekhapira ya Axeri: asilopwana ootheene a iyaakha miloko miili woorowa ohoolo, yeera erumeeleke okhottoni yaalepeliwe, khula mutthu ni nsinanawe, ottharihiwaka olepeliwa wa mahimwaaya ni imusi.

⁴¹Waatta wa epuumba ya Axeri yaari asilopwana 41 500.

⁴²A ekhapira ya Naftali: asilopwana ootheene a iyaakha miloko miili woorowa ohoolo, yeera erumeeleke okhottoni, yaalepeliwe, khula mutthu ni nsinanawe, ottharihiwaka olepeliwa wa mahimwaaya ni imusi.

⁴³Waatta wa epuumba ya Naftali yaari asilopwana 53 400.

⁴⁴Ala yaari asilopwana yaalikeliwe ni Moisesi vamoha ni Aharoni ni mwa ahooleli muloko neeli a aYixrayeli, khula muhooleli akhalaka vanipuroni na emusaawe.

⁴⁵aYixrayeli ootheene a iyaakha miloko miili woorowa ohoolo yeera erumeeleke okhottoni yaalikeliwe sittharihiwaka imusisaya.

⁴⁶Ootheene awo yaari asilopwana 603 550.

⁴⁷Wa soothesene, imusi sa epuumba ya Leevi khasaalikeleliwe vamoha ni sikina,

⁴⁸niwoko Yave aamweerela Moisesi:

⁴⁹“Muhimpake namalepela a epuumba ya Leevi naari muhilepele eriyari ya aYixrayeli akinaawo.

⁵⁰Ohiya yeeyo, mwaakhalihe aLeevi ntoko ookhapelela etabernaakulu* enthokorora itthaabwa sa wiiraana, soovarelasaya muteko sootheene ni mwa sootheene sirimo. Awosa eteexeke etabernaakulu* ni soovarelasaya muteko sootheene; ekhapeleleke ni ekoneleleke mukhwipimwaya.

⁵¹Imaara sootheene etabernaakulu* eneeraaya eteexiweke, aLeevi yuukululeke, ni imaara sootheene enkungiwaaya, aLeevi epakeke hiiho. Akhalaru mutthu mukina anaakhuveele etabernaakulu*, iiviweke.

⁵²aYixrayeli ekungeke iheemasaya, ettharihaka okawanyeyawaya, khula mutthu okonenlaawewo ni eneneerowaawe.

⁵³Wa soothesene, aLeevi ekungeke iheemasaya muxerexere wa etabernaakulu* enthokorora itthaabwa sa wiiraana, weera isara sa Muluku sihimorele muloko wa aYixrayeli. Ti aLeevi eniikosoope etabernaakulu* enthokorora itthaabwa sa wiiraana.

⁵⁴aYixrayeli yaapaka sootheene hiihoweene ntoko Yave aamulamulenlaawe Moisesi.