Read Makhuwa-Shirima Nuumeru 10 Bible Online

Nuumeru 10 - Makhuwa-Shirima bible

Nuumeru 10

¹Yave aamweerela Moisesi:

²“Mpake mapalapatta meeli a eparatha* yoohaniwa weera mvarele muteko woothukumanyiha muloko ni wooniherela okonelingwe eneneero yoottimulela.

³Yaarumaka mapalapatta meeli, muloko wootheene othukumaneke ohoolowanyu vamulako wa Eheema ya Muthukumano*.

⁴Vano, naruma nimoha paahi, ahooleli, mapwattapwattha a mahimo a aYixrayeli, ethukumaneke ohoolowanyu.

⁵Nipalapatta naarumaka, ipuumba sikonenle mpatta ninkhuma nsuwa sittimuleke.

⁶Naarumaka emaara yanaaveeli, okonelingwe mpatta wa ohitto ottimuliweke. Oruma onuukhale ethoonyero weera ottimuliwe.

⁷Waatthuneyaka othukumanyiha muloko, murumihe mapalapatta, mene ohikhaleke ntoko oruma wa ottimula.

⁸Anamwane asilopwana a Aharoni, asaserdoti* yiipeke mapalapatta. Ela ti ekano yoohimala wa nyuwo ni ikhapirasanyu.

⁹Mwaavolowaka mukhottoni mulaponimwanyu, mungwananaka mwiittana anoohasuleni mwiipe mapalapatta. Vano Yave, Mulukwaanyu, onoowuupuwelelani ni onimootapuxani mwa amwiittanaanyu.

¹⁰Mmahukunimwanyutho a ifesta soothanliwa ni vanihukuni noopacera na khula mweeri, nyuwosa mwiipeke mapalapatta mweehuhuni ya sooveleela soohisa ni ya sooveleelasanyu sa murettele, ni iyo nsikhale soowuupuweleleliwasanyu ohoolo wa Mulukwaanyu. Miyo ti Yave, Mulukwaanyu.

¹¹Vanihukuni nanaamiloko miili na mweeri wanaaveeli wa eyaakha yanaaveeli, nihutte naaheemela vasulu etabernaakulu* enthokorora itthaabwa sa wiiraana.

¹²Vano aYixrayeli yaattimula munikareni na oSinayi, yeeraka ekelanno ekelanno mpaka nihutte neemenlaaya munikareni na oParani.

¹³Hiiho yaattimulasa emaara yoopacera, ntoko Yave aalamulenlaawe mwa Moisesi.

¹⁴Anakhotto a waakonelingwe wa oYuda ti yaapacenre ottimula, vathi wa eneneerowaaya. Nahexoni, mwaana mulopwana a Aminadabe, ti aahoolela.

¹⁵Netaneli, mwaana mulopwana a Zuwari, aari mutokweene a anakhotto a epuumba ya Isakari,

¹⁶ni Eliyabe, mwaana mulopwana a Heloni, ti aahoolela anakhotto a epuumba ya Zebuloni.

¹⁷Etabernaakulu* yuukululiwaaya, aGerexoni ni aMerari yaamuteexa, enattimula.

¹⁸Woottharelana yaattimunle ti anakhotto a waakonelingwe wa aRubeni, vathi wa eneneerowaaya. Elisuri, mwaana mulopwana a Sediwuri, ti aahoolela.

¹⁹Xalumiyeli, mwaana mulopwana a Zurixadayi, ti aahoolela anakhotto a epuumba ya Simeyoni,

²⁰ni Eliyasafi, mwaana mulopwana a Deyuweli, ti aahoolela anakhotto a epuumba ya Gadi.

²¹Vano aKohati yaattimula ekuxaleene itthu sootteelihiwa. Awosa ehinaaye ophiya, waatthuneya weera etabernaakulu* ekhaleke yookungiweene.

²²Woottharelana yaattimunle ti anakhotto a waakonelingwe wa awEfrayimi, vathi wa eneneerowaaya. Aahoolela ti Elixama, mwaana mulopwana a Amihudi.

²³Gamaliyeli, mwaana mulopwana a Pedazuri, ti aahoolela anakhotto a epuumba ya Manaxe,

²⁴ni Abidani, mwaana mulopwana a Gidiyoni, ti aahoolela anakhotto a epuumba ya Benyamini.

²⁵Woomalihera yaattimunle ti anakhotto a waakonelingwe wa aDani, vathi wa eneneerowaaya; awo yaari ookisera wa waakonelingwe wootheene. Ahizeri, mwaana mulopwana a Amixadayi, ti aahoolela.

²⁶Pagiyeli, mwaana mulopwana a Okrani, ti aahoolela anakhotto a Axeri,

²⁷ni Ahira, mwaana mulopwana a Enani, ti aahoolela anakhotto a epuumba ya aNafitali.

²⁸Ola waari moota wa anakhotto a aYixrayeli yaattharihaaya ngweettanimwaya.

²⁹Vano Moisesi aamweerela Hobabi, mwaana mulopwana a mMidiyani Rewuyeli, atatawe oowaathelela Moisesi: “Ninttimula nirowaka vanipuroni mwa nenne Yave eenraawe: ‘Miyo kinimoovahasani.’ Murowe ni hiyo, ni nnimookosoopani nnenesene niwoko Yave oororomeliha itthu sooreera wa aYixrayeli.”

³⁰Owo aamwaakhula: “Hoye, nkinrowa. Kinoohokoleela elapwaaka ni wa mulokwaaka.”

³¹Wa soothesene, Moisesi aamweerela: “Dyoontte, muhinihiye. Nyuwo moosuwela weiwo ontthuneya weera nikonele munikareni. Munihooleleke.

³²Mwarowa ni hiyo, nnookawana ni nyuwo itthu sooreera sootheene Yave aneeraawe anivahe.”

³³Vano awosa yaattimula vamwaako wa Yave, eneetta mahuku mararu. Arka* a wiiraana a Yave yaari ohoolowaya mmahukuni mararu ale weera ephwanye nipuro noowiitthuuwa.

³⁴Othana nihutte na Yave naakhala vasuluwaya imaara sootheene yaattimulaaya erowaka okonela nipuro nikina.

³⁵Imaara sootheene yaattimulaaya Arka*, Moisesi eera: “Mweemele Yave! Emwaraxiwe amwiittanaanyu ni awananaanyu etthawe ohoolowanyu!”

³⁶Imaara sootheene yeemelaaya Arka*, owo eera: “Muhokoleele Yave wa aYixrayeli oohaalikeleyaru.”