Read Makhuwa-Shirima Nuumeru 12 Bible Online

Nuumeru 12 - Makhuwa-Shirima bible

Nuumeru 12

¹Miriyami ni Aharoni yaapacera omukhupanya Moisesi niwoko owo aamuthenle muthiyana muKuxe.

²Awosa yaakohasa: “Apaale Yave onuuluma paahi ni Moisesi? Owo khanuuluma ni hiyo?” Vano Yave aahiiwa yeeyo.

³Moisesi aari mulopwana oowiiyevihaxa, ahilikanxereyaka ni akhalaru mutthu mukina a mulaponi.

⁴Woowaakuveya, Yave aamweerela Moisesi, Aharoni ni Miriyami: “Nyuwosa ooraaru, murowase oHeemani ya Muthukumano.” Hiiho ooraaru ale yaarowawo.

⁵Vano Yave aakhuruwa munrimbuni na nihutte ni, areene vamulako wa Eheema, aamwiitthana Aharoni ni Miriyami. Ooweeli awo yaarowa ohoolo,

⁶ni Owo aaweerela: “Mwiiwe maswaaka: Aakhalaka eriyaraanyu mprofeeti a Yave, kiniixoonihera mwa yoowo mmooneloni; kinuuluma ni yoowo moolohani.

⁷Wa soothesene, khoohiyono hiiho, ni murumeiyaaka Moisesi — owo ti oororomeleya waapwaha arumeiyi ootheene akina.

⁸Kinuuluma ni yoowo ttunda ttunda, woohivitheya, ohikhanle ni marikarika; ni owo onoona moota okhanlaawe Yave. Muhoovenle heeni omukhupanya murumeiyaaka Moisesi?”

⁹Vano isara sa Yave saahaapattelasa ni Owo aahaahiyasa.

¹⁰Nihutte nisusaleene vaheemani, Miriyami aakhalanowo makokho; yaari ntoko etthapwe. Aharoni aangweha Miriyami, anoona weera owo aakhalano makokho.

¹¹Aharoni amweerela Moisesi: “Dyoontte apwiyaaka, muhinittaruxele yoottheka nipankaahu moololoni.

¹²Muhitthunihere weera owo akhale ntoko mwaana oovirela weiwo onkhuma mmirimani mwa amayawe, ophwateiyeene mpatta mukina wa erutthu.”

¹³Vano Moisesi aamukhuwelela Yave: “Ii Muluku, mummorele ikharari ni munlamihe!”

¹⁴Yave aamwaakhula Moisesi: “Atithawe yaamusenyenle owiitho, owo aamuulihiheya muru mmahukuni mathannameeli. Munsusihe weera akhale meekhaawe okerekhere wa okonelingwe wa mahuku mathannameeli; vahoolowaya owo ahokoloxiweke.”

¹⁵Hiiho, Miriyami aakhala meekhaawe mahuku mathannameeli okerekhere wa waakonelingwe, ni muloko khawaattimunle owo ahihokoloxiwe.

¹⁶Vahoolowaya yaattimula oHazeroti, enakonelasa munikareni na oParani.