Read Makhuwa-Shirima Nuumeru 14 Bible Online

Nuumeru 14 - Makhuwa-Shirima bible

Nuumeru 14

¹Ohiyu ole muloko wootheene waapacera wiinla okhuwelaxaka.

²aYixrayeli ootheene yaamukhupanya Moisesi ni Aharoni, ni muloko wootheene waaweerelasa: “Fataari naakhwenle wExipitu hoye hoye mulaponimu mwa nikare!

³Yave onnironghela heeni elapo eyo? Weera niiviwe ni ekatana? Axaarihu ni anamwaniihu anookuxiwa ntoko soohuhuliwa mukhottoni. Khawaareerela ohokoleela wExipitu?”

⁴Vano yaaheerelana: “Nimuthanleke muhooleli, nihokoleeleke wExipitu!”

⁵Hiiho, Moisesi ni Aharoni yaahuuramihela ekhovaaya vathi, ohoolo wa muthukumano wootheene wa aYixrayeli.

⁶Yoxuwa, mwaana mulopwana a Nuni, ni Kalebi, mwaana mulopwana a Yefune, yaari eriyari ya yaawo yaarongwe ohottela elapo, yaahaahulasa soowarasaya,

⁷eneerela muloko wootheene wa aYixrayeli: “Elapo niviravinraahu nihottelaka ti yooreera.

⁸Yave asiveleya wa hiyo, Owo onoonivolongha mulaponi mmo, eraayamo emana*, mukaka ni oravo, ni onoonivaha.

⁹Muhimvaanye Yave. Muhoove muloko wa mulaponi, niwoko hiyo nnoottukuttula. Okhapeleleyawaya woomala, mene Yave ori ni hiyo. Muhiwoovase!”

¹⁰Vaheera muloko wootheene waatthuna waavonyasa maluku. Vano ovuwa wa Yave waahaakhumelela aYixrayeli ootheene Muheemani ya Muthukumano*.

¹¹Yave aahuuluma ni Moisesi, amweerelaka: “Mpaka yaakhani muloko ola opwahereraka ohikoonelamo? Onuuhiye yaakhani okihovela, kirimooniheraru ineneero sootikhiniheya kipankaaka variyariwaya?

¹²Miyo kinimwaavulalihasa ni nihooxo ni kinimwaaphwatasa, mene kinimoopakasani muloko mutokotoko ni woolipaxa waapwaha yaawosa.”

¹³Moisesi aamweerela Yave: “Vano awExipitu animwiiwa yeeyo. Mooweranimwanyu mookhumiha muloko ola eriyaraayasa,

¹⁴ni anoowuulumela yeeyo amaki a elapo ela. Awosa ahiiwa weera Nyuwo, Yave, muri ni muloko ola ni weera Nyuwo mohooniwa ttunda ttunda. Ahiiwa weera nihutte ninkhala mwa yaawosa, ni weera munrowa ohoolowaya munrimbuni na nihutte othana, ni ohiyu munrimbuni na mooro.

¹⁵Mwamalamaliha muloko ola, miloko siiwa sa epilaanyu sinimweera:

¹⁶‘Yave khawenre orongha muloko ola mulaponi aaroromelinghaawe munlipeloni, tivawo owiivenlaawe munikareni.’

¹⁷Vaheera vano, ikuru sa Yave soonihereye, ntoko muroromelinghaanyu:

¹⁸Yave ompisa onyoonyiwa ni oosareya osivela woohimala, alevelelaka otakhala ni ovaanya. Vaheera khanghiya yoottheka woohittaruxa, ni onaattaruxa anamwane mwa sootakhala sa asitiithi mpaka ekhapira yanaararu ni yanaaxexe.

¹⁹Muttharihaka osivelawanyu otokotoko, mulevelele sootakhala sa muloko ola, mooteene yoole mulevelenlaanyu muloko ola okhuma evenyakaru wExipitu mpaka vano.”

²⁰Yave aamwaakhula: “Miyo koolevelela, ntoko nyuwo mvekenlaanyu.

²¹Wa soothesene, kinlipela mwa ovuwa wa Yave onsariha elapo yootheene,

²²weera khakhalaru naari mmoha a yaawo yoonne ovuwawaka ni ineneero sootikhiniha kipankaaka wExipitu ni munikareni, ekootaka murima ni ehikiiwelelaka imaara muloko,

²³aani khakhalaru naari mmoha a yaawosa anoone elapo kiroromelinghaaka ni nlipelo wa makholowaaya. Ootheene yaawo ahikoonenleru khayoona.

²⁴Vaheera, eenre murumeiyaaka Kalebi akhalanaka munepa mukina ni akitthara ni moota wookwanela, Miyo kinoopakiha weera avolowe mulaponi aarongwaawe ohottela, ni ekhapiraawe enookuxa elapo eyo.

²⁵Yeenre awAmaleki ni aKanaani emaka mureyareyani, omaalo muhokolowe ni muttimule murowaka onikareni mukuxeraka ephiro enrowa ophareiya yooxeera.”

²⁶Yave aamweerelatho Moisesi ni Aharoni:

²⁷“Mpaka yaakhani muloko ola wootakhala okikhupanyaka? Kohiiwa wiikhupanyera wa aYixrayeli ala anamattaandawula.

²⁸Mwaaleele: ‘Kinlipela mwa Nsinanaka, onghima Yave, weera kinimoopakelasani sootheene mvekenlaanyu:

²⁹Sinoomorela munikareni mittembo sa ootheene nyuwo, okhuma a iyaakha miloko miili woorowa ohoolo, yaalikeliwe munamalepelani ni akikhupannye.

³⁰Khakhalaru naari mmoha a nyuwo anaavolowe mulaponi kaalipelenlaaka keemenxeene ntata woovahani weera mmakemo, ahikhanle paahi Kalebi, mwaana mulopwana a Yefune, ni Yoxuwa, mwaana mulopwana a Nuni.

³¹Vaheera, wa anamwaniinyu, mwa yaawosa nyuwosa mweenraanyu weera yaamukuxiwa ntoko soohuhuliwa mukhottoni, Miyo kinimwaavolongha weera yakuxe elapo nyuwosa mukhoottiyaanyu.

³²Wa soothesene, mittembosanyu sinoomorela munikarenimu.

³³Anamwaniinyu asilopwana anookhala akukhuli a muumu, mweehuhuni ya iyaakha miloko mixexe, ehaawaka mwa ohiroromeleyawanyu, mpaka muttembwaanyu wookisera oneeraaya ophwateliwe munikareni.

³⁴Mweehuhuni ya iyaakha miloko mixexe, nyuwosa munoohaawa sookacamiha sa sootthekesanyu ni munoosuwela etaphulelo ya okikhootta Miyo; khula eyaakha eniilikaneleke wa khula nihuku a miloko mixexe mwa yaawo mwaarongwaanyu ohottela elapo.

³⁵Miyo, Yave, kohuuluma ni vekhaikhai kinoopakela itthu iyo muloko wootheene wootakhala ola, okivaanelenle. Anoophwanya ommaleloniwaya munikarenimu; anookhwela muumu.’”

³⁶Vanonto asilopwana yaarumihiwe ni Moisesi weera yahottele elapo — yaawosa ehokolongweene yaatannyera muloko wootheene omukhupanya Moisesi woomwaraxa mutthenga wookhootteya;

³⁷asilopwana awo yaamwaramwaxenle mutthenga wookhootteya mwaha wa elapo yaahottelingwe, yaahookhwa ni nihooxo ohoolo wa Yave.

³⁸Wa ootheene yaarongwe ohottela elapo, yaapwaherenre ni okumi aari Yoxuwa, mwaana mulopwana a Nuni, ni Kalebi, mwaana mulopwana a Yefune.

³⁹Moisesi athaliherakaru masu ala wa aYixrayeli ootheene, awosa yaahiinlaxa.

⁴⁰Oxeexeloxa wa waaxiiye yaawelasa vasulu mwaako, eneera: “Noottheka! Vaheera vano nri oolikaneene owela vanipuroni Yave onithoonyenraawe.”

⁴¹Wa soothesene, Moisesi aaheera: “Muhiniiwelelela heeni Nlamulo na Yave? Eyo kheeweettelani nnene!

⁴²Muhiwelase, niwoko Yave khakhanle ni nyuwosa. Munoowiniwa ni amwiittana,

⁴³niwoko awAmaleki ni aKanaani animoowanananiwo, ni nyuwosa munimwiiviwa ni ekatana. Mweenre muhiyaka omutthara Yave, Owo khakhanle ni nyuwosa.

⁴⁴Waarookhalaru hiiho, awosa yaawela moovaanyanimwaya vasulu wa elapo ya nyaako, mene okhuma Moisesi mpaka Arka* a wiiraana a Yave yaahanle waakonelingwe.

⁴⁵Vano awAmaleki ni aKanaani yaakhalawo yaakhuruwa, enaawinasa yaattharelelaka mpaka oHorema.