Read Makhuwa-Shirima Nuumeru 16 Bible Online

Nuumeru 16 - Makhuwa-Shirima bible

Nuumeru 16

¹Kora, mwaana mulopwana a Yizehara, mwaana mulopwana a Kohati, mwaana mulopwana a Leevi vamoha ni Datani ni Abirami, anamwane asilopwana a Eliyabi ni Oni, mwaana mulopwana a Peleti, ootheenaawo a epuumba ya Rubeni, yaathatuwa anamavaanelela

²ni awosa yaamurukunuwela Moisesi. Yaakhala ni yaawosa aYixrayeli macira meeli ni miloko mixexe — ahooleli oosuwanyeyaxa mmulokoni yaathanliwe ohoolela muthukumano.

³Awosa yaamwaattamela Moisesi ni Aharoni, enaweerelasa: “Wookwana! Muthukumano wootheene ola ti wootteela, khula mutthu a yaawosa ti ootteela, ni Yave ori eriyaraayasa. Vano heeni nyuwosa muniixunnuwihaanyu mmuthukumanoni wa Yave?”

⁴Iiwakaru yeeyo Moisesi aahuuramihela ekhovaawe vathi.

⁵Vahoolowaya aamweerela Kora ni anamattharaawe: “Oxeexelo Yave onoomoonihera yoowo ori awawe ni onimwiikhuveelihera yoole ori ootteela. Mulopwana Muluku aneeraawe amuthanle, onimwiikhuveelihera.

⁶Nyuwo Kora, ni anamattharaanyu ootheene mpake ha: Mukuxe yoohisera erubani* ni

⁷omaalo muhelemo mooro ni erubani* ohoolo wa Yave. Yoowo Yave aneeraawe amuthanle onookhala mulopwana ootteelihiwa. Nyuwosa aLeevi wookwana mpaka vaava!”

⁸Moisesi aamweerelatho Kora: “Vano mukiiwe nyuwosa aLeevi!

⁹Khawookwanneni oomwalamwalinghaaweni Muluku a oYixrayeli ni muloko mukinoowo wa oYixrayeli ni iiruuhenlaawe weera mvare muteko mutabernaakuluni* ya Yave ni weera mukhale oolikaneene orumeela muloko?

¹⁰Owo ohooruuhani nyuwo ni axunninyu aLeevi ootheene vamaithoniwawe, ni vano muntthunatho osaserdoti*?

¹¹Nyuwo ni anamattharaanyu moomvaanya Yave! Aharoni taani oomukhupanya?”

¹²Vano Moisesi aamwiitthaniha Datani ni Abirami, anamwane asilopwana a Eliyabi, mene awosa yaaheera: “Hiyo khaninrowa!

¹³Khawookwanneni onikhumihawanyu mulaponi oraayamo mukaka ni oravo weera muniivele munikareni? Muntthunatho wiikhaliha mutokweenaahu?

¹⁴Ohiya yeeyo, nyuwo khamunikunxe mulaponi oraayawo mukaka ni oravo hata khamunivangheru yoohiyeriwa ya imatta ni imatta sa iwuuva*. Nyuwo munuupuwela weera munoowera waalokottha asilopwana ala? Hiyo, khaninrowa!”

¹⁵Vano Moisesi aanyoonyaxiwa, anamweerela Yave: “Muhaakhulele sooveleelasaya, niwoko miyo nkimwaakhenle mwa yaawo naari buuru mmoha hata nkaapakenleru yoonanara.”

¹⁶Moisesi aamweerela Kora: “Nyuwo ni anamattharaanyu ootheene mwiixooniheraseke omaalo wa Yave — nyuwo, awosa ni Aharoni.

¹⁷Khula mutthu akuxeke yoohiseraawe erubani*, ahelekemo erubani* ni arongheke wa Yave. Sootheene iyo sikhaleke soohisera erubani* macira meeli ni miloko mithanu. Nyuwo ni Aharoni muruuhaseketho soohiserasanyu erubani*.”

¹⁸Hiiho khula mutthu a yaawosa aakuxa yoohisera erubani*, anapattiha erubani*, anakhala vamoha ni Moisesi ni Aharoni vamulako wa Eheema ya Muthukumano*.

¹⁹Kora aathukumanyihaleene anamattharaawe ootheene vamulako wa Eheema ya Muthukumano*, ovuwa wa Yave waahoonihereya wa muloko wootheene.

²⁰Yave aamweerela Moisesi ni Aharoni:

²¹“Mususe wa muloko ola weera Miyo kaamalihase woowaakuveya.”

²²Vaheera Moisesi ni Aharoni yaahuuramihelasa ekhove vathi, enamwaakhula: “Ii Muluku, Muluku onaavaha okumi ootheene, munoonyoonyeriwa muloko wootheene atthenkeene mutthu mmoha paahi?”

²³Vano Yave aamweerela Moisesi:

²⁴“Muleele muloko weera osuse muheemani sa Kora, Datani ni Abirami.”

²⁵Moisesi aavenya, anarowa aaraawewo Datani ni Abirami, ni asitokweene a aYixrayeli yaamutthara.

²⁶Owo aahooperera muloko: “Mususe muheemani mwa atakhali ala! Muhitaveru etthwaaya, weera muhimalamalihiwe niwoko na sootthekasaya.”

²⁷Awosa yaasusa muheemani sa Kora, Datani ni Abirami. Vano Datani ni Abirami yaakhala yeemelelo vamulako wa iheemasaya vamoha ni axaaraya, anamwanaaya mpaka asikhaani.

²⁸Moisesi aaheera: “Nyuwosa munoosuwela weera Yave ookirumiha weera kipake itthu sootheene iya, ni weera eyo kheekhumme mwa miyo moota ola:

²⁹Alasa yakhwa onkhweliwaaya eneereya paahi yeele engweereela atthu ootheene, eyo ti eneneero yooweera Muluku khakiruminghe.

³⁰Vaheera Yave oonihera etthu enyowanixa ni etthaya yahula eyanowaaya, enaamirasa vamoha ni sootheene siri sawaya ni awosa yakhuruwela mulittini akumi, vano nyuwosa munoosuwela weera asilopwana ala aamveiha Yave.

³¹Moisesi amalihakaru ohima sootheene iyo, mpatta wa etthaya yeemelansaaya yaahaaleleya

³²ni etthaya yaahuleya, enaamirasa vamoha ni imusisaya, anamatthara ootheene a Kora ni mihakhusaya sootheene.

³³Yaakhuruwela mulittini eri akumi, ni sootheene yaarinaaya; etthaya yaawuuheelela, ni yaariheya elakaseyaka eriyari ya muthukumano.

³⁴Woowiiwa okhuwelawaya, aYixrayeli yaari muxerexere yaatthawa yoovaka omiriwatho ni etthaya.

³⁵Vano waahoorwa mooro waakhumelela wa Yave onaalaliha asilopwana macira meeli ni miloko mithanu yaaveleela erubani*.

³⁶Vanonto Yave aamweerela Moisesi:

³⁷“Mwamuleele Eleyazari, mwaana mulopwana a musaserdoti* Aharoni, weera akuxe soohisera erubani* eriyari ya yeeyo ehanle evihaka ni amwaramwaxe makhala, niwoko soohisera erubani* ti sootteela.

³⁸Soohisera erubani* sa atthu siwiivale mwa sootthekasaya sinoohaniwa ntoko ireesa ni sinoovareliwa muteko woowaahuruwelano altaari*, niwoko sooveleeleliwa Yave ni soothatuwa sootteelihiwa. Iyo sikhaleke eneneero wa aYixrayeli.”

³⁹Musaserdoti* Eleyazeri aathukumanyiha soohisera erubani* sa ebronze* saaveleeliwe ni yaale yaalalihiwe ni mooro. Soohisera erubani* seiye saahaniwa sinavareliwa muteko woowaahuruwelano altaari*,

⁴⁰ntoko Yave aalamulenlaawe mwa Moisesi. Eyo yaapakiwe ntoko eyuupuxero wa aYixrayeli weera ahikhaleru anaahise erubani* ohoolo wa Yave ahikhanle a ekhapira ya Aharoni. Ovirikanawaya onoothatuwa ntoko Kora ni anamattharaawe.

⁴¹Oxaawaya, muloko wootheene wa aYixrayeli waapacera omukhupanya Moisesi ni Aharoni, weeraka: “Nyuwosa mohiiva muloko wa Yave.”

⁴²Wa soothesene, muloko omuthukumanenleene Moisesi ni Aharoni, ni awosa ekhuveelakaru oHeemani ya Muthukumano, wootutuxereya nihutte naakhuneela Eheema ni ovuwa wa Yave waahooneya.

⁴³Vano Moisesi ni Aharoni yaarowasa ohoolo wa Eheema ya Muthukumano*,

⁴⁴ni Yave aamweerela Moisesi:

⁴⁵“Mvenye eriyari ya muloko ola weera Miyo kaamalihase woowaakuveya.” Vaheera awosa yaahuuramihelasa ekhovaaya vathi,

⁴⁶ni Moisesi aamweerela Aharoni: “Mukuxe yoohiseraanyu erubani* ni muhelemo erubani* vamoha ni mooro woovaliwa valtaarini*, ni murowe woowaakuveya omulokoni weera mwarehererele wiiwanana ni Yave, niwoko wa Yave sookhumelela isara sitokotoko ni nihooxo noopacera.”

⁴⁷Aharoni aapaka yeeyo aamulamulenlaawe Moisesi, anatthimakela eriyari ya muthukumano. Nihooxo naapacera eriyari ya muloko, mene Aharoni aaveleela erubani*, anarehererela wiiwanana ni Yave.

⁴⁸Aharoni aaheemela eriyari ya ookhwa ni akumi ni nihooxo naamala.

⁴⁹Yaawo yaakhwiiye ni nihooxo nne yaari 14 700, waahiya yaale yaakhwiiye mwaha wa Kora.

⁵⁰Vano Aharoni aahokoleela wa Moisesi vamulako wa Eheema ya Muthukumano*, niwoko nihooxo naamala.