Read Makhuwa-Shirima Nuumeru 17 Bible Online

Nuumeru 17 - Makhuwa-Shirima bible

Nuumeru 17

¹Yave aamweerela Moisesi:

²“Mwaavekele aYixrayeli weera eruuhe ikopo muloko ni piili, emoha wa khula pwattapwattha a epuumba. Mulepe nsina na khula muhooleli mukoponimwawe.

³Mukoponi ya Leevi mulepe nsina na Aharoni, niwoko ontthuneya weera ekhale ekopo emoha wa khula pwattapwattha a khula epuumba.

⁴Mvolonghe Muheemani ya Muthukumano*, ohoolo wa Arka* arino itthaabwa sa wiiraana, weiwo kinkumanaakawo ni nyuwosa.

⁵Ekopo ya yoowo kineeraaka kimuthanle enoottuva, ni Miyo kinimwiitapuxa mwa okhupanyaxa anoopakelasaayani aYixrayeli.”

⁶Hiiho, Moisesi aahaaleela aYixrayeli, ni ahoolelaaya yaavahasa ikopo muloko ni piili, emoha wa khula pwattapwattha a epuumba ni ekopo ya Aharoni yaari eriyari ya seiyo.

⁷Moisesi aavolongha ikopo ohoolo wa Yave, Muheemani enthokorora itthaabwa sa wiiraana.

⁸Oxaawaya Moisesi aavolowa Muheemani, anoona weera ekopo ya Aharoni yaathoonyera epuumba ya Leevi, yaattuva, ekhalanaka mihupu ni ithutu, mpakatho soowiima sa imandoweira*.

⁹Vano Moisesi aakhumiha ikopo sootheene saari ohoolo wa Yave, anarongha ohoolo wa aYixrayeli ootheene. Awosa yaahoona ikopo, ni khula pwattapwattha aakuxa ekopowaawe.

¹⁰Yave aamweerela Moisesi: “Muronghetho ekopo ya Aharoni ohoolo wa Arka* arino itthaabwa sa wiiraana weera ethokororiwe ntoko woopereriwa wa anamavaanya. Eyo enoomaliha okikhupanyawaya weera ehikhwe.”

¹¹Moisesi aapaka yeeyo Yave aamulamulenlaawe.

¹²aYixrayeli yaamweerelasa Moisesi: “Hiyo nnimookhwa! Nooriheya, ootheene hiyo, nooriheya!

¹³Ootheene yaawo eniyaattamele Nipuro Nootteela* na Yave animookhwa. Weeraka ootheene hiyo nnimookhwa?”