Read Makhuwa-Shirima Nuumeru 19 Bible Online

Nuumeru 19 - Makhuwa-Shirima bible

Nuumeru 19

¹Yave aamweerelatho Moisesi ni Aharoni:

²“Yoonyesereriha emoha ya Nlamulo Yave olamulenlaawe ti ela: Mwaalamulele aYixrayeli omuruuha mwaamombe muthiyana ooxeera, oohirakala ni oohikhalano malepa, mwa yoowo ohitonke oreiwa murindi.

³Nyuwosa mumvaheke musaserdoti* Eleyazari; owo aronghiweke okerekhere wa okonelingwe ni iiveliweke vamaithoniwawe.

⁴Vano musaserdoti* Eleyazari akuxeke ephome vakhaani yawawe, amisereke ni ikatha imaara ithannapiili mpatta wa mulako wa Eheema ya Muthukumano*.

⁵Mwaamombe ahisiweke vamaithoniwawe: Exapala, ethai, ephome ni marupo.

⁶Musaserdoti* akuxeke etthaabwa ekhaanene ya esidari*, hisopo* ni mapururu ooxeera a ekhondoolo ni avonyereke vasulu wa mwaamombe azaaka.

⁷Vahoolowaya, musaserdoti* acapeke soowarasawe ni arapeke. Vano avoloweke okonelingwe, mene onookhala oohitteela mpaka wiilaka.

⁸Yoowo aneera amuhise mwaamombe acapeketho soowarasawe ni arapeke; onookhalatho oohitteela nihuku nootheene.

⁹Mutthu ori ootteeleene akhupeke ettuura ya mwaamombe ni iikaathiki vaNipuroni Nootteela*, okerekhere wa okonelingwe. Ethokororiweke ni muloko wa aYixrayeli weera evareliwe muteko mmaahini a otteelihera — wa oorapihela soottheka.

¹⁰Yoowo aneera akhupe ettuura ya mwaamombe acapeketho soowarasawe, ni onookhala oohitteela mpaka wiilaka. Ela ekano yoohimala, ekhalaka wa aYixrayeli mpaka anamarwa ankhala ni nyuwo.

¹¹Yoowo aneera atave muttembo onookhala oohitteela mweehuhuni ya mahuku mathannameeli.

¹²Iitteeliheke ni maahi awo munihukuni nanaararu ni nanaathannameeli. Hiiho owo onookhala ootteela. Vaheera, aahiitteeliha munihukuni nanaararu ni nanaathannameeli, khatteela.

¹³Yoowo aneera atave muttembo ahiniitteeliha, onoovaliha etabernaakulu* ya Yave. Owo amalamalihiweke mmulokoni wa aYixrayeli. Onookhala oohitteela niwoko khamiseriweno maahi ootteelihera; ohitteelawawe onoopwaherera.

¹⁴Nlamulo nimvareliwa muteko mukina aakhwelaka muheemani ti nna: Yoowo anaavolowe muheemani ni yoowo anaakhalemo, onookhala oohitteela mmahukuni mathannameeli,

¹⁵ni yakhalaru ekaruma eneera ehittiyeliwe nnene, enookhala yoohitteela.

¹⁶Yoowo anaakhale mmatta, anamutava mutthu iiviwe ni ekatana, hoye hoye mukina ohaawiye mookhwaani onkhweliwaaya naari vanikhuvani na mutthu, hata munihiyeni, onookhala oohitteela mmahukuni mathannameeli.

¹⁷Wa mutthu oohitteela aheliweke ettuura vakhaani ya yooveleela yoohisa yootteelihera muxaaruni ni amiineliwekemo maahi ooluusi.

¹⁸Vano mutthu ori ootteeleene, akuxeke hisopo*, axuweyeke mmaahini ni amiserekeno eheema, ikaruma sootheene ni atthu ootheene yaarimo. Ammisereketho akhalaru mutthu otamve nikhuva na mutthu, hoye hoye nihiye, hata mukina okhwiiye naari ohaangwe okhwa onkhweliwaaya.

¹⁹Yoowo ori ootteeleene ammisereke mutthu oohitteela munihukuni nanaararu ni nanaathannameeli, ni munihukuni nanaathannameeli owo amutteeliheke. Yoowo ontteelihiwa acapeke soowarasawe ni arapeke, hiiho oxekuwa wa nihuku nno onookhala ootteeleene.

²⁰Vaheera, yoowo ori oohitteela aahiitteeliha, amalamalihiweke mmuthukumanoni, niwoko oovaliha Nipuro Nootteela* na Yave. Khamiseriwe maahi ootteelihera ni owo khatteenle.

²¹Ela ekano yoohimala wa yaawosa. Mutthu anaamisereno maahi ootteelihera acapeketho soowarasawe, ni akhalaru mutthu anaatave maahi ootteelihera, onookhala oohitteela mpaka wiilaka.

²²Yakhalaru etthu mwa yeeyo eneera etaviwe ni mutthu oohitteela enoothatuwa yoohitteela, ni akhalaru mutthu aneera atave yeeyo, onookhala oohitteela mpaka wiilaka.