Read Makhuwa-Shirima Nuumeru 23 Bible Online

Nuumeru 23 - Makhuwa-Shirima bible

Nuumeru 23

¹Biliyami aamweerela Balaki: “Mukitekele va altaari* athanneeli ni mukirehererele aximombe athanneeli ni anapunci a ikhondoolo athanneelitho.”

²Balaki aapaka yeeyo aamvekenlaawe Biliyami, ni ooweeli yaamveleela mwaamombe ni napunci a ikhondoolo mmoha mmoha wa khula altaari*.

³Biliyami aamweerela Balaki: “Mukhale va muxerexere wa sooveleelasanyu soohisa, miyo kivenyaka. Apaale Yave anaakikumaneno. Yeeyo Owo aneeraawe akoonihere, miyo kinimoothaliherani.” Vahoolowaya aarowa vamwaako woohimela etthu.

⁴Muluku aamukumanano, ni Biliyami aamweerela: “Kohaareherera altaari* athanneeli, ni khula altaari* koomveleela mwaamombe mmoha ni napunci mmoha a ikhondoolo.”

⁵Yave aamuleela Biliyami yeeyo yaatthuneya ohima, amweerelaka: “Murowetho mwakumane ni Balaki ni muulume mooteene yoowo kooleenlaakani.”

⁶Biliyami aahokolowa, anamphwanya Balaki nlelo yeemelelo muxerexere wa sooveleelasawe soohisa vamoha ni ahooleli a oMowabe.

⁷Vano Biliyami aalaleiya mutthenga ola: “Balaki okiruuhale oHarani, mwene a oMowabe okikuxale mmanyaakoni sa mpatta ninkhuma nsuwa. Owo aaheera: ‘Murwe mukilaphele Yakobe, murwe mulaleiye woopopiheya wa aYixrayeli!’

⁸Nkimulapheleni yoowo Muluku ohimulamphaawe? Nkilaleere heeni soowoopopiha wa yoowo Yave ohitthunnaawe omoopopiha?

⁹Miyo kingwoona kireene vasulu wa nyaako soosareya nyala; kinoona kireene osuluxa. Kinnoona muloko onkhala yooworu ni ohiniixoonaru ntoko wakhalaru muloko.

¹⁰Taani ongwera waalikela waatta wa Yakobe ori ntoko ntthupi, hata waatta wa mpatta wanaaxexe wa aYixrayeli? Fataari kikhwe okhwa wa oororomeleya ni ommaleloniwaka okhale ntoko wa muloko ola.”

¹¹Balaki aamweerela Biliyami: “Munkipakani? Miyo kooruuhenleni nno weera munlaphe mwiittanaaka, vano nyuwo munimweera omureeliha paahi!”

¹²Owo aamwaakhula: “Kintthuneya ohima paahi yeeyo Yave okileenlaawe.”

¹³Balaki aamweerela: “Nrowe ni miyo vanipuroni nikina nyuwo muneeraanyu ngwoone; nyuwo mmoone paahi mpatta mmoha, mene khaahiyono ootheenaawo. Vahoolowaya mukilaphele muloko owo.”

¹⁴Vano owo aamurongha ematta ya oZofimi, vasulu mwaako Pisega, ni vawo aahaateka altaari* athanneeli, anamveleela mwaamombe ni napunci a ikhondoolo wa khula altaari*.

¹⁵Biliyami aamweerela Balaki: “Mukhale va muxerexere wa yooveleelaanyu yoohisa miyo kirowaka omukumanano Muluku ohoolo iwo.”

¹⁶Akumanneene Yave ni Biliyami, aamvaha mutthenga amweerelaka: “Muhokoleele wa Balaki ni mwamuleele mutthengeene yoola.”

¹⁷Owo aahokolowa, anamphwanya eemenleene muxerexere wa yooveleelaawe yoohisa, vamoha ni ahooleli a oMowabe. Balaki aamukoha: “Ohimaleni Yave?”

¹⁸Vano owo aalaleiya mutthenga ola: “Mvenye Balaki ni mukiiwe; mukiwiriyane, mwaana mulopwana a Zipori.

¹⁹Muluku khanootha ntoko atthu; khanceendya soowuupuwelasawe ntoko ompakaaya omutthu. Yeeyo onghimaawe enookhumelela, ni yeeyo onroromelihaawe enookwanihereya.

²⁰Kohaakhela nlamulo weera kireelihe; Owo ooreeliha ni nkingwera oceendya yeeyo.

²¹Kheewoworu erisa enooneya wa Yakobe, khoowoworu ohaawa oYixrayeli. Yave, Mulukwaaya, ori ni yaawosa; oruma wa okhuwela wa Mwene ori ni yaawosa.

²²Muluku onaakhumiha wExipitu; awosa aakhalano ikuru sa enari.

²³Khaawowo macitta angwera ongwina Yakobe, hata sa okhwiri singwera waalowa aYixrayeli. Vano onimweereliwa Yakobe ni aYixrayeli: “Moone yeeyo Muluku opankaawe!”

²⁴Muloko oneemela ntoko mwatto muthiyana; oneemela ntoko mwatto mulopwana, ohiniixaatalelaru mpaka onyaanya yoovaraawe ni owura ephome ya seiyo iivalaawe.”

²⁵Vano Balaki aamweerela Biliyami: “Muhaalaphe hata muhaareelihe!”

²⁶Biliyami aamwaakhula: “Nkooleenleni weera ontthuneya opaka sootheene aneeraawe ahime Yave?”

²⁷Balaki aamweerela Biliyami: “Nrowe, koorongheni vanipuroni nikina. Apaale Muluku anaavahere weera wu munoowera okilaphela.”

²⁸Balaki aamurongha Biliyami vasulu mwaako Peyori. Vaavale waawereyaaya woona muhawalawa wootheene.

²⁹Biliyami aamweerela Balaki: “Mukitekele va altaari* athanneeli ni mukirehererele aximombe athanneeli ni anapunci a ikhondoolo athanneelitho.”

³⁰Balaki aapaka yeeyo aahimalaawe Biliyami, anamveleela mwaamombe ni napunci mmoha a ikhondoolo wa khula altaari*.