Read Makhuwa-Shirima Nuumeru 25 Bible Online

Nuumeru 25 - Makhuwa-Shirima bible

Nuumeru 25

¹aYixrayeli ereene oXitimi, asilopwana aYixrayeli yaapacera wiixinnyerera mooraruwani ni asithiyana a oMowabe,

²mwa yaawo yaalattunlaaya opakano sooveleela sa milukusaya. Muloko wannaca, okokhorelaka milukusaya.

³Hiiho, aYixrayeli yaahiitakansano omulapa Bahali-Peyori. Vano isara sa Yave saahaapattela aYixrayeli.

⁴Yave aamweerela Moisesi: “Mwaatthuke asitokweene ootheene a muloko ola, ni ngwiivele vamaithoni wa Yave, mwaatthuni, weera isara soowoopiha sa Yave sisuse wa aYixrayeli.”

⁵Vano Moisesi aaweerela aphuki a oYixrayeli: “Khula mutthu a nyuwo awiiveke yaawo ari a eriyari ya atthwaawe yiitakansenre omulapa Bahali-Peyori.

⁶muYixrayeli mmoha aamurongha owaani muthiyana mmoha a oMidiyani, vamaithoni wa Moisesi ni wa muloko wootheene wa aYixrayeli weera wiinlaka vamulako wa Eheema ya Muthukumano*.

⁷Pinehasi, mwaana mulopwana a musaserdoti* Eleyazari, osuulu wa musaserdoti* Aharoni, oonaka yeeyo, aakuxa nivaka,

⁸anamutthara muYixrayeli mpaka oheemani, anaahomasa ooweeli ni nivaka; aamuhoma muYixrayeli ni muthiyana. Hiiho naamala nihooxo naarweenle aYixrayeli.

⁹Vaheera yaawo yaakhwiiye mwaha wa nihooxo yaari 24 000.

¹⁰Yave aamweerela Moisesi:

¹¹“Pinehasi, mwaana mulopwana a musaserdoti* Eleyazari, osuulu wa musaserdoti* Aharoni, oohapuxa isarasaka kaapattihenraaka aYixrayeli, niwoko kaari ni ehace ni ehaceene yeeyo kaakhalenlaaka yaawosa, weera muhacenimwaka Miyo kihaamalamalihe.

¹²Munleele weera vano kimpaka wiiraanawaka wa murettele ni yoowo.

¹³Okhuma vanaano vaava owo mpaka ikhapirasawe onookhala wiiraana wa osaserdoti* woohimala, niwoko owo oomukhalela nthiti Mulukwaawe aarehererelaka aYixrayeli wiiwanana ni Muluku.

¹⁴muYixrayeli iiviwe vamoha ni muthiyana a oMidiyani iitthaniwa Zimeri, mwaana mulopwana a Salu, muhooleli a emusi emoha ya aSimeyoni.

¹⁵Muthiyana iiviwe iitthaniwa Kozebi, mwaana mulopwana a Zuri, pwattapwattha a nihimo nimoha na aMidiyani.

¹⁶Yave aamweerela Moisesi:

¹⁷“Mwaawanane aMidiyani ni ngwiivakase,

¹⁸niwoko awosa yaahoopakani ntoko amwiittana, yeereraka woohapuxerani omulapa Bahali-Peyori ni niwoko na Kozebi, mwaana muthiyana a pwattapwattha mmoha a oMidiyani, muthiyana ole iiviwe ni nihooxo kaaruminghaaka niwoko na Peyori.”