Read Makhuwa-Shirima Nuumeru 27 Bible Online

Nuumeru 27 - Makhuwa-Shirima bible

Nuumeru 27

¹Anamwane asithiyana athanu a Zelofehadi, mwaana mulopwana a Heferi, mwaana mulopwana a Gileyadi, mwaana mulopwana a Makiri, mwaana mulopwana a Manaxe yaari a epuumba ya Manaxe, mwaana mulopwana a Yoseefe. Vano masina a anamwane asithiyana ale yaari: Mahela, Nowa, Hogela, Mileka ni Tireza. Awosa yaarowa

²wa mulako wa Eheema ya Muthukumano* aakhalaawewo Moisesi, musaserdoti* Eleyazari, mapwattapwattha ni muloko wootheene, enaweerelasa:

³“Atithihu akhwenle munikareni, mene khayaahiyono a mpatta wa yaale yaatakanseranne ni Kora, yaamurukunuwenle Yave. Atithihu siwiivale soottheka yaapankaaya ni khayaahingye anamwane asilopwana oophwanela waakhela yoohiyeriwaaya.

⁴Nnilakaseere heeni nsina na atithihu mweemusini niwoko noohikhalano anamwane asilopwana? Munivahe elapo yoophwanela ya okuxa mpatta wa yoohiyeriwa ntoko axunnaya atithihu.”

⁵Moisesi aarongha mulattu ole ohoolo wa Yave,

⁶ni Yave aamweerela:

⁷“Anamwane asithiyana a Zelofehadi ahuupuwela nnene. Mwaavahaseke yoophwanela ya okhalano mpatta wa yoohiyeriwa, ntoko axunnaya atithaya, ni opakiha weera awosa yaakhelase soohiyera sa atithaya.

⁸Mwaaleele aYixrayeli: ‘Mulopwana akhwa ahimuyanre mwaana mulopwana, mumvaheke yoohiyeriwaawe mwaana muthiyana.

⁹Owo aahikhalano mwaana muthiyana, yoohiyeriwaawe evahiweke axunneiye.

¹⁰Aahikhalano axunneiye, mwaavaheke axunnaya atithawe.

¹¹Atithawe yaahikhalanotho axunnaya, yoohiyeriwaawe avahiweke mmusi xaxaxa a munihimonimwawe weera owo akuxe. Eyo ekhaleke yoonyesereriwa wa aYixrayeli, ntoko Yave aamulamulenlaawe Moisesi.’”

¹²Vano Yave aamweerela Moisesi: “Ngwele mwaako ola ori mpatta wa nyaako siniitthaniwa Abarimi ni moone elapo kaavanghaaka aYixrayeli.

¹³Moonneene, nyuwotho munoothukumanyihiwa ni makholowaanyu ntoko munninyu Aharoni,

¹⁴niwoko muloko waavaanyaaya mmaahini a munikareni na oZini, nyuwosa ooweeli khamwiiwelenle Nlamulonaka na ottittimiha otteelawaka ohoolowayasa. Vano eyo yeereiye mmaahini a oMeriba, oKadexi, munikareni na oZini.

¹⁵Moisesi aamweerela Yave:

¹⁶“Ii! Dyoontte, Yave Muluku onaavaha okumi akumi ootheene athanlele mutokweene muloko ola,

¹⁷weera eettihe mmapuroni ootheene eneeraaya erowe ni weera avolonghe, ni muloko wa Yave ohikhale ntoko ikhondoolo soohikhalano mukukhula.”

¹⁸Vano Yave aamwaakhula Moisesi: Mmwiitthane Yoxuwa, mwaana mulopwana a Nuni, mwa yoowo oraayamo Munepa ni mmwiikaathere matata.

¹⁹Mwamoonihere wa musaserdoti* Eleyazari ni wa muloko wootheene munkhalihaka vamaithoniwaya.

²⁰Mumvahe mpatta wa olamulawanyu weera muloko wootheene wa aYixrayeli omwiiwelele.

²¹Owo iixoonihereke wa musaserdoti* Eleyazari, anaakoherere soolakela sa Urimi* amweerelaka Yoxuwa, ohoolo wa Yave. Ti moota ola Yoxuwa ni muloko wootheene wa aYixrayeli oneeraaya weettele mpaka ohoolo.

²²Moisesi aapaka ntoko Yave aamulamulenlaawe. Aamwiitthana Yoxuwa, anamoonihera musaserdoti* Eleyazari ni muloko wootheene.

²³Aamwiikaathera matata, anamukhaliha ntoko Yave aahimmaawe mwa Moisesi.