Read Makhuwa-Shirima Nuumeru 28 Bible Online

Nuumeru 28 - Makhuwa-Shirima bible

Nuumeru 28

¹Yave aamweerela Moisesi:

²“Mwaalamulele aYixrayeli ni mwaaleele: ‘Mwiipasoope wookivaha yooca mweehuhuni ethanleliwe sooveleeleliwasaka soorehereriwa vayikho, ntoko yoowunkhela eniikhale yookisiveliha.’

³Mwaaleele: ‘Yooveleela yoorehereriwa vayikho muneeraanyu mumvahaseke Yave ti ela: Iputtiputthi piili sa eyaakha emoha, soohirakala, ntoko yooveleela ya khula nihuku.

⁴Mveleele eputtiputthi emoha oxeexelo ni ekineeyo oxekuwa,

⁵vamoha ni yooveleela ya irooro ya ikiilu* piili ya ephepa yooreerela yooweetheeliwa eliitru* emoha ya makhura a sooliveira* ooreerela.

⁶Ela ti yooveleela yoohisa ya khula nihuku, epacerihiwe omwaako Sinayi ntoko yoowunkhela yoosiveliha, yoomveleelela Yave ni yoorehereriwa vayikho.

⁷Vano eliitru* emoha ya soowura yooheliwa eferementu evareliweke muteko vamoha ni khula eputtiputthi. Yoomveleelela Yave yooveleela yoowura vaNipuroni Nootteela*.

⁸Mveleele eputtiputthi yanaaveeli oxekuwa, vamoha ni mooteene yoowo wa yooveleela ya irooro ni yoowura munrehereraanyu oxeexelo. Ti yooveleela yoorehereriwa vayikho, yoowunkhela yoomusivelha Yave.

⁹Vanihukuni na eSaabadu, mpakase yooveleela ya iputtiputthi piili sa eyakha emoha ni soohirakala, vamoha ni sooveleela soowura ni yooveleela emoha ya irooro ya ikiilu* piili sa ephepa yooreerela yooweetheeliwa makhura.

¹⁰Ela ti yooveleela yoohisa wa khula eSaabadu, ohiya yooveleela yoohisa ya khula nihuku ni ya yooveleela yoowura.

¹¹Vanihukuni noopacera na khula mweeri, mumveleelele Yave yooveleela yoohisa ya aximombe piili, napunci mmoha a ikhondoolo ni iputtiputthi ithannapiili sa eyaakha emoha, sootheene iyo soohirakala.

¹²Wa khula mwaamombe ekhaleke yooveleela ya irooro ya iliitru* ithannamosa ni nttikha sa ephepa ya etrigu yooreerela yooweetheeliwa makhura; wa napunci ekhaleke yooveleela ya irooro ya iliitru* ixexe sa ephepa ya etrigu yooreerela yooweetheeliwa makhura;

¹³ni wa khula eputtiputthi, ekhaleke yooveleela ya irooro ya ikiilu* piili sa ephepa yooreerela yooweetheeliwa makhura. Eyo enookhala yooveleela yoohisa, yoowunkhela yoomusiveliha Yave, yoomurehererela vayikho Yave.

¹⁴Wa khula mwaamombe ekhaleke yooveleela yoowura ya iliitru* piili, eliitru* ni nttikha wa khula napunci a ikhondoolo ni eliitru* emoha wa khula eputtiputthi. Ela ti yooveleela yoohisa eneeneene ya nihuku noopacera na khula mweeri munyowani, wa eyaakha yootheene.

¹⁵Ohiya yooveleela yoohisa ya khula nihuku, ni yooveleela yoowura, napunci a epuri aveleeleliweke Yave ntoko yooveleelela yoottheka.

¹⁶Vanihukuni nanaamuloko ni maxexe na mweeri woopacera ti mPaska* a Yave.

¹⁷Vanihukuni nanaamuloko ni mathanu na mweereene yoowo, ekhaleke efesta; mmahukuni mathannameeli muceeke epaawu yoohikhalano eferementu.

¹⁸Vanihukuni noopacera na efesta eyo mpake muthukumano wootteela ni muhivareru muteko.

¹⁹Mumveleelele Yave yooveleela yoorehereriwa vayikho, yooveleela yoohisa ya aximombe eeli, napunci mmoha a ikhondoolo ni iputtiputthi ithannapiili sa eyaakha emoha, sootheene iyo soohirakala.

²⁰Wa khula mwaamombe ekhaleke yooveleela ya irooro ya iliitru* ithannamosa ni nttikha sa ephepa ya etrigu yooreerela yooweetheeliwa makhura; wa napunci a ikhondoolo iliitru* ixexe

²¹ni iliitru* piili wa khula eputtiputthi.

²²Mumveleele napunci a ipuri ntoko yooveleelela yoottheka, weera mwiirehererelase wiiwanana ni Muluku.

²³Mpake sooveleela iyo, ohiya sooveleela soohisa sa khula nihuku simveleeliwa oxeexelo.

²⁴Khula nihuku na mathannameeli awo mureherereke yooca mooteene owo; Muruuhe yooca wa yooveleela yoorehereriwa vayikho, yoowunkhela yoomusiveliha Yave; eyo epakiweke, ohiya yooveleela yoohisa ya khula nihuku ni yooveleela yoowura.

²⁵Vanihukuni nanaathannameeli, mpake muthukumano wootteela ni muhivareru muteko.

²⁶Vanihukuni na ohepha wa soowiima soopacera, mwaampakelaka Yave sooveleela sa irooro inyowani mufestani ya isimana, mpake muthukumano wootteela ni muhivareru muteko.

²⁷Mpake yooveleela yoohisa ya aximombe piili, napunci a ikhondoolo mmoha ni iputtiputthi ithannapiili sa eyaakha emoha, ntoko yoowunkhela yoomusiveliha Yave.

²⁸Wa khula mwaamombe ekhaleke yooveleela ya irooro ya iliitru* ithannamosa ni nttikha sa ephepa ya etrigu yooreerela yooweetheeliwa makhura; wa napunci a ikhondoolo iliitru* ixexe;

²⁹ni iliitru* piili wa khula eputtiputthi.

³⁰Mumveleeletho napunci mmoha a ipuri weera mwiirehererele wiiwanana ni Yave.

³¹Sootheene iyo mureherere vamoha ni yooveleela yoowura, ohiya sooveleela soohisa sa khula nihuku ni sooveleelasaya sa irooro. Mwaawehaweheke toko axinama weera ehikhale oorakala.