Read Makhuwa-Shirima Nuumeru 29 Bible Online

Nuumeru 29 - Makhuwa-Shirima bible

Nuumeru 29

¹Vanihukuni noopacera na mweeri wanaathannamiili, mpake muthukumano wootteela ni muhivareru muteko. Nihuku nno nyuwosa mwiipe mapalapatta.

²Mumveleele mwaamombe, napunci a ikhondoolo ni iputtiputthi ithannapiili sa eyaakha emoha, sootheene iyo soohirakala ntoko yooveleela yoohisa, yoowunkhela yoomusiveliha Yave.

³Wa khula mwaamombe ekhaleke yooveleela ya irooro ya iliitru* ithannamosa ni nttikha sa ephepa ya etrigu yooreerela yooweetheeliwa makhura; wa napunci a ikhondoolo iliitru* ixexe;

⁴ni iliitru* piili wa khula eputtiputthi.

⁵Mumveleele napunci a ipuri ntoko yooveleelela yoottheka, weera mwiirehererelase wiiwanana ni Muluku.

⁶Ohiya sooveleela soohisa sa khula mweeri ni sa khula nihuku vamoha ni sooveleelasaya sa irooro ni sooveleela soowura, ntoko silempwalaaya. Ti sooveleela soorehereriwa vayikho, soowunkhela soomusiveliha Yave.

⁷Vanihukuni nanaamuloko na mweeri wanaathannamiili owo, mpake muthukumano wootteela. Nyuwosa mwiiyevihaseke ni muhivareru muteko.

⁸Mumveleele mwaamombe, napunci a ikhondoolo ni iputtiputthi ithannapiili sa eyaakha emoha, sootheene iyo soohirakala ntoko yooveleela yoohisa, yoowunkhela yoomusiveliha Yave.

⁹Wa khula mwaamombe ekhaleke yooveleela ya irooro ya iliitru* ithannamosa ni nttikha sa ephepa ya etrigu yooreerela yooweetheeliwa makhura; wa napunci a ikhondoolo iliitru* ixexe;

¹⁰ni iliitru* piili wa khula eputtiputthi.

¹¹Mumveleelasetho napunci a ipuri ntoko yooveleelela yoottheka, ohiya yooveleelela yoottheka weera mwiirehererele wiiwanana ni Yave ni sooveleela soohisa sa khula nihuku vamoha ni sooveleelasaya sa irooro ni sooveleela soowura.

¹²Vanihukuni nanaamuloko ni mathanu na mweeri wanaathannamiili mpake muthukumano wootteela ni muhivareru muteko. Mumpakele efesta Yave mmahukuni mathannameeli.

¹³Mpakase yooveleela yoorehereriwa vayikho, yoowunkhela yoomusiveliha Yave moota ola: Yooveleela yoohisa ya aximombe muloko naararu, anapunci a ikhondoolo eeli ni iputtiputthi muloko niixexe sa eyaakha emoha, sootheene iyo soohirakala.

¹⁴Wa khula aximombe muloko naararu ekhaleke yooveleela ya irooro iliitru* ithannamosa ni nttikha sa ephepa ya etrigu yooreerela yooweetheeliwa makhura; wa khula napunci a ikhondoolo, iliitru* ixexe;

¹⁵ni wa khula iputtiputthi ithanniixexe iliitru* piili.

¹⁶Mumveleelasetho napunci a ipuri ntoko yooveleelela yoottheka, ohiya yooveleela yoohisa ya khula nihuku ni sooveleelasaya sa irooro ni soowura.

¹⁷Vanihukuni nanaaveeli mwaareherere aximombe muloko neeli, anapunci a ikhondoolo eeli ni iputtiputthi muloko niixexe sa eyaakha emoha, sootheene iyo soohirakala.

¹⁸Wa sooveleela sa aximombe, anapunci a ikhondoolo ni iputtiputthi, murehererase sooveleelasaya sa irooro ni soowura, ntoko silempwalaaya.

¹⁹Mumveleeletho napunci mmoha a epuri ntoko yooveleelela yoottheka, ohiya sooveleela soohisa sa khula nihuku ni sooveleelasaya sa irooro ni soowura.

²⁰Vanihukuni nanaararu mwaareherere aximombe muloko nimmoha, anapunci a ikhondoolo eeli ni iputtiputthi muloko niixexe sa eyaakha emoha, sootheene iyo soohirakala.

²¹Wa sooveleela sa aximombe, anapunci a ikhondoolo ni iputtiputthi, murehererase sooveleelasaya sa irooro ni soowura, ntoko silempwalaaya.

²²Mumveleelasetho napunci a ipuri ntoko yooveleelela yoottheka, ohiya yooveleela yoohisa ya khula nihuku ni sooveleelasaya sa irooro ni soowura.

²³Vanihukuni nanaaxexe mwaareherere aximombe muloko, anapunci a ikhondoolo eeli ni iputtiputthi muloko niixexe sa eyaakha emoha, sootheene iyo soohirakala.

²⁴Wa sooveleela sa aximombe, anapunci a ikhondoolo ni iputtiputthi, murehererase sooveleelasaya sa irooro ni sa soowura, ntoko silempwalaaya.

²⁵Mumveleelasetho napunci a ipuri ntoko yooveleelela yoottheka, ohiya yooveleela yoohisa ya khula nihuku ni sooveleelasaya sa irooro ni soowura.

²⁶Vanihukuni nanaathanu mwaareherere aximombe athannaaxexe, anapunci a ikhondoolo eeli ni iputtiputthi muloko niixexe sa eyaakha emoha, sootheene iyo soohirakala.

²⁷Wa sooveleela sa aximombe, anapunci a ikhondoolo ni iputtiputthi, murehererase sooveleelasaya sa irooro ni soowura, ntoko silempwalaaya.

²⁸Mumveleelasetho napunci a ipuri ntoko yooveleelela yoottheka, ohiya yooveleela yoohisa ya khula nihuku ni sooveleelasaya sa irooro ni soowura.

²⁹Vanihukuni nanaathannamosa, mwaareherere aximombe athannaararu, anapunci a ikhondoolo eeli ni iputtiputthi muloko niixexe, sootheene iyo sa eyaakha emoha ni soohirakala.

³⁰Wa sooveleela sa aximombe, anapunci a ikhondoolo ni iputtiputthi, murehererase sooveleelasaya sa irooro ni sa soowura, ntoko silempwalaaya.

³¹Mumveleeletho napunci mmoha a epuri ntoko yooveleelela yoottheka, ohiya sooveleela soohisa sa khula nihuku ni sooveleelasaya sa irooro ni sa soowura.

³²Vanihukuni nanaathannameeli, mwaareherere aximombe athanneeli, anapunci a ikhondoolo eeli ni iputtiputthi muloko niixexe sa eyaakha emoha, sootheene iyo soohirakala.

³³Wa sooveleela sa aximombe, anapunci a ikhondoolo ni iputtiputthi, murehererase sooveleelasaya sa irooro ni soowura, ntoko silempwalaaya.

³⁴Mumveleeletho napunci mmoha a epuri ntoko yooveleelela yoottheka, ohiya sooveleela soohisa sa khula nihuku ni soveleelasaya sa irooro ni soowura.

³⁵Vanihukuni nanaathannamararu mpake muthukumano ni muhivareru muteko.

³⁶Mpake yooveleela yoorehereriwa vayikho, yoowunkhela, yoomusiveliha Yave, yooveleela yoohisa ya mwaamombe, napunci mmoha a ikhondoolo ni iputtiputthi ithannapiili sa eyaakha emoha, sootheene iyo soohirakala.

³⁷Wa sooveleela sa aximombe, anapunci a ikhondoolo ni iputtiputthi, murehererase sooveleelasaya sa irooro ni soowura, ntoko silempwalaaya.

³⁸Mumveleeletho napunci mmoha a epuri ntoko yooveleelela yoottheka, ohiya sooveleela soohisa sa khula nihuku ni soveleelasaya sa irooro ni soowura.

³⁹Ohiya sooveleela soororomeliha muneeraanyu mpake ni seiyo sa otthunawanyu, munrehererele yeeyo Yave mmafestani muthanleliwaanyu: Sooveleelasanyu soohisa, sooveleelasanyu sa irooro; sooveleelasanyu soowura ni sa murettele.”

⁴⁰Moisesi aahaaleela aYixrayeli sootheene aalamuleliwaawe ni Yave.