Read Makhuwa-Shirima Nuumeru 30 Bible Online

Nuumeru 30 - Makhuwa-Shirima bible

Nuumeru 30

¹Moisesi aaweerela mapwattapwattha a ipuumba sa aYixrayeli: “Yeeyo Yave onlamulelaawe ti ela:

²Mulopwana mmoha amuroromeliha Yave hoye hoye alipela okwanihera etthu, ahinanarihe maswaawe, mene akwanihere sootheene ohimmaawe.

³Mwaamwali onkhala nlelo vaate wa atithawe, amuroromeliha Yave hoye hoye iinyesererihaka ni nlipelo

⁴ni atithawe yasuwela yoororomelihaawe hoye hoye nlipelonawe, mene yaahimuleela, vano soororomelihasawe sootheene ni khula nlipelo, mwa seiyo iinyesereringhaaweno, sinimooneleyamo.

⁵Vaheera, tiithi amukhoottiha asuwenleene yoororomeliha, khasooneleyamo soororomelihasawe hoye hoye nlipelonawe mwa seiyo iinyesereringhaaweno; Yave onoomutapuxa niwoko atithawe aamukhoottiha.

⁶Owo atheliwa aroromelingheene hoye hoye iinyesereringheene ni nlipelo ahitthokelelaka,

⁷ni iyawe asuwenleene ahinamuleelaru etthu vanihukuni aneeraawe asuwele, hiiho soororomelihasawe sootheene ni khula nlipelo, mwa seiyo iinyesereringhaaweno, sinimooneleyamo.

⁸Vaheera, iyawe amukhoottiha asuwenleene, kheevareleya muteko yoororomeliha enimunyesereriha hoye hoye yoororomeliha opankaawe ahitthokelelaka mwa yeeyo owo iinyesereringhaaweno, ni Yave onoomutapuxa.

⁹Yakhalaru yoororomeliha hoye hoye nlipelo nipakingwe ni akhalaru naamukhweli hoye hoye ni muthiyana omwalanne enimooneleyamo.

¹⁰Muthiyana othelingwe aroromeliha hoye hoye iinyesereriha ni nlipelo

¹¹ni iyawe asuwenleene ahinamuleelaru etthu ni aahimukhoottiha, hiiho soororomelihasawe sootheene ni khula nlipelo, mwa seiyo iinyesereringhaaweno, sinimooneleyamo.

¹²Vaheera iyawe asuwenleene anakhoottela, hiiho kheewoworu yoororomeliha hoye hoye nlipelo uulummaawe eniyooneleyemo. Iyawe ookhootha ni Yave onoomutapuxa.

¹³Iyawe amwaakhuleleke hoye hoye aamukhootteleke mwaariye yakhalaru yoororomeliha naari nlipelo nnimunyesereriha wiikhootta.

¹⁴Vaheera, iyawe aahimuleelaru etthu mwaha wa yeeyo mpaka waaxiiye, eyo enimwaakhuleliha soororomelihasawe sootheene, hoye hoye soolipelasawe sootheene mwa seiyo iinyesereringhaaweno. Owo aakhuleleke ohimuleelawawe etthu iiwaleene.

¹⁵Wa soothesene, ooceeliha mweehuhuni ekina iiwaleene, owo onoohaawa makacamiho a nthowanawe.

¹⁶Ti seiya soolamulela Yave aamvanghaawe Moisesi mwaha wa mulopwana ni mwaariye ni eriyari ya tiithi ni mwaniye muthiyana onkhala nlelo vaate wa atithawe.