Read Makhuwa-Shirima Nuumeru 31 Bible Online

Nuumeru 31 - Makhuwa-Shirima bible

Nuumeru 31

²“Ngwiinlele ikukuttula aMidiyani mwa yeeyo yaapakenlaaya aYixrayeli. Vahoolowaya, nyuwo munoothukumanyihiwa ni makholowaanyu.”

³Vano Moisesi aaheerela muloko: “Mwaareherere asilopwana akina akina variyariwanyu weera erowase okhottoni waawanano aMidiyani ni omwiinlelela ikukuttula Yave yaawosa.

⁴Khula epuumba ya aYixrayeli yaarumiheke okhottoni asilopwana macira muloko.

⁵Asilopwana 12 000 oolikaneene orowa okhottoni, macira muloko wa khula epuumba, yaarumihiwa mmahimoni a aYixrayeli.

⁶Moisesi aahaarumihasa okhottoni asilopwana macira muloko a khula epuumba, vamoha ni Pinehasi, mwaana mulopwana a musaserdoti* Eleyazari, aakuxale ikaruma sa Nipuro Nootteela* ni mapalapatta oowiipa okhottoni.

⁷Vano yaahaawanano aMidiyani, ntoko Yave aamulamulenlaawe Moisesi, enawiivakasa asilopwana ootheene.

⁸Eriyari ya yaawo yaakhwiiye, yaari mamwene mathanu a oMidiyani ala: Evi, Rekemi, Zuri, Huri, ni Reba. Yaamwiivatho ni ekatana Biliyami, mwaana mulopwana a Peyori.

⁹aYixrayeli yaahaavarasa asithiyana ni anamwane a aMidiyani, enakuxatho mihuwosaya ni sooreelasaya sootheene ntoko soohuhula.

¹⁰Yaahisa isidade sootheene yiitekihalaayamo aMidiyani ni yaakonelaayamo moothemwene.

¹¹Yaakuxasa soohuhula sootheene, vamoha ni atthu nitho axinama,

¹²enaakuxasa anamatthukiwa ni soohuhula, enaarongha wa Moisesi, musaserdoti* Eleyazari ni muloko wa aYixrayeli, yaakonenlaayawo, mureyareyani mwa oMowabe, okhopela wa oYeriko.

¹³Moisesi, musaserdoti* Eleyazari ni ahooleli ootheene a muloko, yaarowa owaakhelela okerekhere wa waakonelingwe.

¹⁴Vaheera Moisesi aahaanyoonyeriwa asitokweene a anakhotto yaahokolongwe okhottoni — ahooleli a anakhotto macira muloko ni a ncira nimoha.

¹⁵Owo aahaakohasa: “Mwaahiyenreni asithiyana ootheene ni okumi?

¹⁶Ti yaawosa yeettenle ikano sa Biliyami, enaahapuxa aYixrayeli wa Yave mwa yeele yeereiye oPeyori, moota wooweera nihooxo nimoha naalaliha muloko wa Yave.

¹⁷Vano ngwiivakase asimiravo ootheene. Ngwiivetho asithiyana ootheene akonne ni asilopwana,

¹⁸mene mwiixuurelele asimwali oowiikosoopa ootheene.

¹⁹Ootheene nyuwo mmwiivale mutthu hoye hoye mutamve muttembo, mukhale okerekhere wa okonelingwe wa mahuku mathannameeli. Vanihukuni nanaararu ni nanaathannameeli, ontthuneya wiitteeliha nyuwo ni anamatthukiwaanyu.

²⁰Mutteelihe soowara sootheene ni sootheene sipakelingwe exapala, mapururu a epuri hoye hoye sa nakotto.”

²¹Vahoolowaya, musaserdoti* Eleyazari aaweerela anakhotto yaarongwe okhottoni: “Yoonyesereriha ya Nlamulo Yave aamulamulenlaawe Moisesi ti ela:

²²Eyuuma yoorikaxa, eparatha*, ebronze*, eyuuma, eyuuma ya eseeta, eyuuma yoolemela

²³ni sootheene sihinza, nyuwosa mviriheke vayikho weera mutteelihe, mene mutteeliheketho ni maahi ootteelihera. Vaheera sootheene sinza sirapihiweke ni maahi.

²⁴Vanihukuni nanaathannameeli mucapeke soowarasanyu, ni nyuwosa munookhala ootteela. Vahoolowaya, mvolowaseke okonelingwe.

²⁵Yave aamweerela Moisesi:

²⁶“Nyuwo, musaserdoti* Eleyazari ni mapwattapwattha a muloko, mwawaalikele atthu ootheene ni axinama avaringwe.

²⁷Mukawanyihe soohuhula eriyari ya anakhotto yaarongwe okhottoni ni muloko mukina waahanle owo.

²⁸Mwa yeeyo aruuhalaaya anakhotto okhottoni, mmwalamwaxe ntoko mucaango wa Yave mmoha wa khula macira mathanu — ekhalaka atthu, imombe, abuuru, ikhondoolo hoye hoye ipuri.

²⁹Mpatta owo mmwinnyerere musaserdoti* Eleyazari; ti mucaango wa Yave.

³⁰Wa mpatta avahingwe aYixrayeli, muthanle mmoha wa khula miloko mithanu — ekhalaka atthu, imombe, abuuru, ikhondoolo, ipuri hoye hoye axinama akina. Mwaavahe aLeevi avahereriwe okosoopa etabernaakulu* ya Yave.

³¹Moisesi ni musaserdoti* Eleyazari yaapakasa ntoko Yave aamulamulenlaawe Moisesi.

³²Soohuhula saahanle mwa seiyo yaattottannyaaya anakhotto a aYixrayeli saari ikhondoolo 675 000,

³³imombe 72 000,

³⁴abuuru 61 000

³⁵ni aximwali oowiikosoopa 32 000.

³⁶Mpatta wa eriyari yaavahiwaaya yaawo yaawanne waari ikhondoolo 337 500,

³⁷mwa seiyo mucaango wa Yave waari 675;

³⁸wa imombe waari 36 000, mwa seiyo mpatta wa mucaango wa Yave waari miloko mithannamiili ni piili;

³⁹wa abuuru waari 30 500, mwa seiyo mpatta wa mucaango wa Yave waari miloko mithannamosa nimmoha;

⁴⁰ni mpatta wa atthu waari 16 000 mwa seiyo mpatta wa mucaango wa Yave waari miloko miraru neeli.

⁴¹Moisesi aamvaha mucaango musaserdoti* Eleyazari ntoko mucaango wa Yave, hiihoweene aalamuleliwaawe ni Yave.

⁴²Mpatta mukinoowo waari wa aYixrayeli, mwa yoowo Moisesi aahaamwalamwalihera anakhotto.

⁴³Vano mpatta owo wa muloko waari ikhondoolo 337 500,

⁴⁴imombe 36 000,

⁴⁵abuuru 30 500

⁴⁶ni atthu 16 000.

⁴⁷Wa mpatta wa eriyari waari wa muloko wa aYixrayeli, Moisesi aathanla mmoha wa khula miloko mithanu — okhalaka wa atthu mpaka wa axinama, ntoko Yave aamulamulenlaawe, anawinnyerera aLeevi yaavahereriwe okosoopa etabernaakulu* ya Yave.

⁴⁸Vano asitokweene a anakhotto yaari ohoolo wa mikuttula sa anakhotto — asitokweene a macira muloko ni a ncira nimoha, yaarowasa wuuluma ni Moisesi,

⁴⁹enamweerelasa: “Arumeiyaanyu aawaalikela anakhotto nnaahoolelaahu, ni khawoworu ohaleenle.

⁵⁰Tivawo niruuhalaahu ntoko soomveleelela Yave ikaruma sa eyuuma yoorikaxa mwa seiyo khula mutthu a hiyo okuxalaawe — mangosa, ipangiiri, annela oottittano, axiveeve ni mikhova — weera niirehererele wiiwanana ni Yave ohoolowawe.”

⁵¹Moisesi ni musaserdoti* Eleyazari yaahaakhelasa wa yaawo itthu sooreerela sootheene sa eyuuma yoorikaxa.

⁵²Eyuuma yoorikaxa eyo, yaavahiwe ni asitokweene a mikuttula sa macira muloko ni sa ncira nimoha sa anakhotto ntoko mucaango wa Yave, yaalemela ikiilu* ncira ni miloko mithannamiili.

⁵³Khula nakhotto aahiikuxera soohuhula.

⁵⁴Moisesi ni musaserdoti* Eleyazari yaahaakhelasa eyuuma yoorikaxa ya asitokweene a mikuttula sa macira muloko ni sa ncira nimoha sa anakhotto, enaronghasa Muheemani ya Muthukumano*, ntoko eyuupuxero weera ti Yave aawuupuwelenle aYixrayeli.