Read Makhuwa-Shirima Nuumeru 32 Bible Online

Nuumeru 32 - Makhuwa-Shirima bible

Nuumeru 32

¹Ipuumba sa aRubeni ni aGadi saakhalano mihuwo sincipale. Yoonaka weera elapo ya oYazeri ni oGileyade yaari yooreera ohuwawo mihuwo,

²yaarowa wuuluma ni Moisesi musaserdoti* Eleyazari ni asitokweene a muloko enaweerelasa:

³“Ilapo sa wAtaroti, oDiboni, oYazeri, oNimera, oHexeboni, wEleyaleni, oSebami, oNebo ni oBeyoni,

⁴owinnaawe Yave eerelaka muloko wa aYixrayeli, ti ilapo sooreerela wa muhuwo. Vano hiyo arumeiyaanyu nookhalano axinama ancipale.

⁵Moonihere murimaanyu wooreera ni munivahe elapo ela ntoko yawihu ohiya elapo ya okhopela wa Yordanu.”

⁶Moisesi aahaakhula ikhapira sa Rubeni ni Gadi: “Vano axunninyu yaarowaka okhottoni nyuwosa munookhala vaava?

⁷Heeni nyuwosa munaapororihaanyu aYixrayeli ovolowa mulaponi Yave aavanghaawe?

⁸Ti yeeyo yaapankaaya asitithinyu kaaruminghaaka oKadexi-Bareneya weera yahottele elapo.

⁹Yaarowasa mpaka nreyareya na wExekoli, enoona elapo, vahoolowaya yaarowasa waapororiha aYixrayeli weera awosa ehivolowe mulaponi mwa yeeyo Yave aneeraawe aavahe.

¹⁰Nihuku nne, isara sa Yave saapatta ni Owo aalipela ha:

¹¹“Mweenre muhittharaka ni murima wookwanela, khakhalaru naari mutthu mmoha a iyaakha miloko miili woorowa ohoolo okhumme wExipitu anoone elapo kiroromelinghaaka munlipeloni wa Abrahaamu, Isaki ni Yakobe.

¹²Paahi Kalebi, mwaana mulopwana a Yefune, a ekhapira ya Kenazi, mpakatho Yoxuwa, mwaana mulopwana a Nuni, eniivolowe elapo niwoko yaamutthara Yave ni murima wookwanela.

¹³Isara sa Yave saahaapattela aYixrayeli, ni Owo aahaaxoraxoriha munikareni mweehuhuni ya iyaakha miloko mixexe, mpaka omalamala ekhapira ya yaawo yaamutthekenle Yave ni mweettelowaaya woonanara.

¹⁴Nyuwo muri vawo — ekhapira ya anamattheka, mwiikhalihaka vanipuroni na makholowaanyu ni saapattelakatho aYixrayeli isara sa Yave.

¹⁵Mwahiya omutthara Yave, Owo onimoohiyanitho munikareni, ni nyuwosa munookhalano nthowa na ophwatiwa wa muloko ola.”

¹⁶Vano, awosa yaamwaattamelasa Moisesi, enamweerelasa: “Nintthuna opaka va makhoola a mihuwosahu ni isidade sa axaarihu ni anamwaniihu.

¹⁷Vaheera hiyo nohiireherera ni nnookhala oolikaneene orowa ohoolo wa aYixrayeli mpaka nneeraahu naphiye vanipuroniwaya. Eyo eri hiiho, axaarihu ni anamwaniihu anoomaka musidadeni soolipihiwa weera yiixaakiheno wa amaki ootheene a mulaponi.

¹⁸Khanihokoleela mmatthokonimwahu aYixrayeli ootheene ehaakhenle yoohiyeriwaaya.

¹⁹Khanaakhelaru yoohiyeriwa ni yaawo okhopela Yordanu, yeenre yoohiyeriwaahu nivahiwaka mpatta ninkhuma nsuwa wa oYordanu.”

²⁰Moisesi aaweerelasa: “Mwapaka yeeyo ohoolo wa Yave, muniireherera orowa okhottoni,

²¹ni ootheene nyuwo mwiireherera, munamulapuwa Yordanu ohoolo wa Yave mpaka Owo aneeraawe awoomole amwiittanaanyu ohoolowawe,

²²vano, elapo ewiniweene ohoolo wa Yave, nyuwosa munoowera ohokolowa ni munootapuxeya mwa soonyesererihiwasanyu wa Yave ni aYixrayeli. Hiiho elapo ela enookhala yawinyuweene ohoolo wa Yave.

²³Vaheera, nyuwosa mwaahipaka yeeyo, munoomutthekela Yave; ni musuwele weera nyuwosa khamoopowa wa yoottheka epakingwe.

²⁴Mwaatekele isidade axaarinyu, anamwaniinyu, ni makhoola a mihuwosanyu, mene mpake yeeyo muroromelinghaanyu.”

²⁵Vano asilopwana a Gadi ni Rubeni yaamweerelasa Moisesi: “Hiyo arumeiyaanyu nnoopaka ntoko apwiyaahu anilamulenlaaya.

²⁶Anamwaniihu, axaarihu ni mihuwosahu sootheene sinookhala musidadenimu sa oGiliyade.

²⁷Vaheera arumeiyaanyu, asilopwana ootheene oolikaneene orowa okhottoni, anoolapuwa weera yawane ohoolo wa Yave, ntoko apwiyaahu anghimaaya.”

²⁸Vano Moisesi, aamulamula musaserdoti* Eleyazari, Yoxuwa mwaana mulopwana a Nuni ni mapwattapwattha a imusi sa ipuumba sa aYixrayeli mwaha wa yaawosa aweerelaka:

²⁹“Asilopwana a Gadi ni a Rubeni, ootheenaawo oolikaneene orowa okhottoni, yamulapuwa Yordanu ni nyuwosa ohoolo wa Yave, vano elapo yaawiniwaka ohoolowanyu, ngwinnyererase elapo ya oGiliyade ntoko yawayeene.

³⁰Vaheera, yaahilapuwa oolikaneene ni nyuwosa, mwaakhuleleke ettimaaya oKanaani.”

³¹Asilopwana a Gadi ni a Rubeni, yaahaakhula: “Arumeiyaanyu anoopaka yeeyo ohimmaawe Yave.

³²Nnoomulapuwa Yordanu ohoolo wa Yave ni nnoovolowa oKanaani nikunxeene ikapwitthi, vaheera ettima naakhenlaahu ntoko yoohiyeriwa, enookhala ekhopela ela nno ya Yordanu.

³³Vano Moisesi aavaha ipuumba sa Gadi ni sa Rubeni ni eriyari ya epuumba ya Manaxe, mwaana mulopwana a Yoseefe, omwene wa Sihoni, mwene a awAmori, ni omwene wa Ogi, mwene a oBaxani — elapo yootheene ni isidadesaya ni mittetthe saarukureenrewo.

³⁴Epuumba ya Gadi yaarasela oDiboni, wAtaroti, wAroweri,

³⁵wAtaroti-Xopani, oYazeri, oYogebeha,

³⁶oBeti-Nimera ni oBeti-Harani ntoko isidade soolipihiwa, ni yaapaka makhoola a mihuwosaya.

³⁷Epuumba ya Rubeni yaarasela oHexeboni, wEleyaleni ni oKiriyatayimi,

³⁸mpakatho oNebo ni oBahali-Meyoni (masina ala yaaceendyiwa) ni oSibema. Yaatteha masina makina isidadesene seiye yaarasenlaaya.

³⁹Ikhapira sa Makiri, mwaana mulopwana a Manaxe, saarowa oGileyade, sinamakawo sinawoomolasa awAmori yaakhalawo.

⁴⁰Vano Moisesi aahaavaha oGileyade aMakiri, ikhapira sa Manaxe ni awosa yaamakawo.

⁴¹Yahiri, a ekhapira ya Manaxe, aakuxa mittetthesaya, anatteha Havoti Yayiri.

⁴²Noba aawina oKenati ni mittetthesaya, anatteha Noba, nikhalaka nsinanaya.