Read Makhuwa-Shirima Nuumeru 34 Bible Online

Nuumeru 34 - Makhuwa-Shirima bible

Nuumeru 34

¹Yave aamweerelatho Mosesi:

²Mwaalamulele aYixrayeli ni mwaaleele: Mwaavolowasaka oKanaani, elapo muneeraanyu mureereliwe ntoko yoohiyeriwa, ekhalaneke nyiinano iya:

³Mpatta wa ohitto opacereke munikareni na oSini muxerexere mwiinano wa wEdomi. Mpatta ninkhuma nsuwa, mwiinanowaaya wa ohitto opacereke muxerexere Ephareiya ya Maakha,

⁴ovireke ohitto wa ekhato ya Walisi, opwaherereke mpaka oSini ni orowoke ohitto wa oKadexi-Bareneya. Vahoolowaya, ovireke mpaka oHazari-Adari ni orowoke mpaka wAzemoni,

⁵oneeraaya wakottoombe ni waphiye munxaapwani na wExipitu, okotelaka mphareiyani.

⁶Mwiinanowaanyu wa mpatta ninkela nsuwa okhaleke muxerexere Ephareiya Etokweene. Owo onuukhale mwiinano wa mpatta ninkela nsuwa.

⁷Vano mwiinano wa mpatta wa ottuttuwani okhaleke ha: mulepelele okhuma Ephareiya Etokweene mpaka mwaako Hori,

⁸ni wookhuma omwaako Hori mpaka oLebo-Hamati. Omakoteloni wa mwiinano okhaleke oZedadi,

⁹opwaherereke mpaka oZifroni ni okoteleke oHazari-Enani. Owo onuukhale mwiinanowaanyu wa mpatta wa ottuttuwani.

¹⁰Mwiinano wa mpatta ninkhuma nsuwa onuukhale ha: Mulepelele okhuma oHazari-Enani mpaka oXefami.

¹¹Mwiinano okhumeke oXefami oroweke mpaka oRibela, mpatta ninkhuma nsuwa wa wAyini, ni opwaherereke mpatta ninkhuma nsuwa muxerexere nyaako sa ephareiya ya oKinereti.

¹²Mwiinano okhuruweleke muxerexere Yordanu ni okoteleke mphareiyani ya Maakha. Eyo eniikhale elapwaanyu ni nyiinanosaya sa mipatta sootheene.”

¹³Moisesi aahaalamulela aYixrayeli ikano iya: “Ti yeela elapo muneeraanyu mwaakhele mooreereliwani. Muluku oolamula weera evahiwe wa ipuumba ithanniixexe ni eriyari ya epuumba ya Manaxe.

¹⁴Vano imusi sa epuumba ya Rubeni, Gadi ni eriyari ya epuumba ya Manaxe sohaakhela yoohiyeriwaaya.

¹⁵Ipuumba piili iya ni eriyari ya epuumba ya Manaxe sohaakhela yoohiyeriwaaya mpatta ninkhuma nsuwa, muxerexere Yordanu okhopela wa oYeriko.”

¹⁶Yave aamweerela Moisesi:

¹⁷“Masina a asilopwana eneera yookawelaseni elapo ntoko yoohiyeriwa ti ala: Musaserdoti* Eleyazari ni Yoxuwa, mwaana mulopwana a Nuni.

¹⁸Munthanle muhooleli mmoha a khula epuumba weera ookhavihereni okawana elapo.

¹⁹Masinaaya ti ala: Kalebi, mwaana mulopwana a Yefune, a epuumba ya Yuda;

²⁰Xemuweli, mwaana mulopwana a Amihudi, a epuumba ya Simeyoni;

²¹Elidadi, mwaana mulopwana a Kiseloni, a epuumba ya Benyamini;

²²Buki, mwaana mulopwana a Yogeli, muhooleli a epuumba ya Dani;

²³Haniyeli, mwaana mulopwana a Efodi, muhooleli a epuumba ya Manaxe, mwaana mulopwana a Yoseefe.

²⁴Kemuweli, mwaana mulopwana a Xifitani, muhooleli a epuumba ya Efrayimi, mwaana mulopwana a Yoseefe;

²⁵Elisafani, mwaana mulopwana a Parnakhi, muhooleli a epuumba ya Zebuloni;

²⁶Palitiyeli, mwaana mulopwana a Azani, muhooleli a epuumba ya Isakari;

²⁷Ahihudi, mwaana mulopwana a Xelomi, muhooleli a epuumba ya Axeri;

²⁸Pedaheli, mwaana mulopwana a Amihudi, muhooleli a epuumba ya Nafitali.

²⁹Yaari ti yaalasa Muluku aalamulenlaawe weera yaakaweleke aYixrayeli elapo ya oKanaani.