Read Makhuwa-Shirima Nuumeru 5 Bible Online

Nuumeru 5 - Makhuwa-Shirima bible

Nuumeru 5

¹Yave aamweerela Moisesi:

²“Mwaalamulele aYixrayeli weera yaakhumihere okerekhere wa okonelingwe ootheene eniikhaleno makokho, hoye hoye yakhalaru enaakhuma ephome, naari anaakhale oohitteela niwoko na otava muttembo.

³Mwaakhumihere okerekhere wa okonelingwe, okhuma asilopwana mpaka asithiyana, weera ehivalihe akonenlaayawo, mwa weiwo kinkhalaakawo eriyaraaya.

⁴aYixrayeli yaapaka hiiho, enaakhumihera okerekhere waakonelingwe ntoko Yave aamulamulenlaawe Moisesi.

⁵Yave aamweerelatho Moisesi:

⁶“Mwaaleele aYixrayeli: ‘Mulopwana hoye hoye muthiyana ampahula mutthu mukina, khammoonelamo Yave ni hiiho onookhala ni nthowa.

⁷Alapeke yoottheka opankaawe, aliveke woomalela, andyeerereke mpatta wanaathanu wa yeeyo olimvaawe ni amvaheke sootheene iyo yoowo ompahunlaawe.

⁸Vaheera, opahulingwe aahikhalanaru mmusi xaxaxa oowaakhela yooliviwa, eyo enookhala ya Yave ni innyereriweke musaserdoti* vamoha ni napunci ooreherereliwano wiiwanana ni Yave wa nanthowa.

⁹Micaango sootteela sootheene, aYixrayeli animuruuhelaaya musaserdoti* sikhaleke sawawe.

¹⁰Soovaha sootteelihiwa sa khula mutthu ti sawawe, vaheera yeeyo owo aneeraawe amvahe musaserdoti*, eniikhale ya musaserdoti*.

¹¹Vano Yave aamweerela Moisesi:

¹²“Mwaaleele ha aYixrayeli: ‘Mwaara a mutthu ahapuwa, anamukhalela oohiroromeleya,

¹³ni mulopwana mukina amukonano, ni eyo yiipithiheya wa iyawe ni ohitteelawawe waahooneleliwa (niwoko na ohimukhalela anamoona naari ohivariwano yeeyo),

¹⁴ni iyawe akhala ehace ni amuhovela mwaariye, akhalaka ootteela naari oohitteela,

¹⁵owo amurongheke wa musaserdoti*. Mulopwana akuxeke yoovaha ya ikiilu* piili sa ephepa ya esevada* amweerelaka mwaariye. Ahiyeehere makhura hata ahihele erubani* vaphepani niwoko ti yoovaha ya irooro mwa ehace weera yoonihereye ekhaikhai ya yoottheka.

¹⁶Musaserdoti* amuruuheke muthiyana ni amwiikaathiki ohoolo wa Yave.

¹⁷Vano akuxeke maahi vakhaani ootteelihiwa muyoopweni ni aheleke mmaahini mwaantthupi na vathi wa etabernaakulu*.

¹⁸Amwiikaathiyeene muthiyana ohoolo wa Yave, musaserdoti* ataphuleke mayihi a muthiyana owo ni amuheleleke mmatatanimwawe yooveleela yoowuupuwelela, aani yooveleela ya irooro mwa ehace musaserdoti* muneenaawe akuxaleene maahi oowaawa anruuha nlapho.

¹⁹Vano musaserdoti* amulipeliheke muthiyana ni amweereleke: “Mwaahimukonanneru mulopwana mukina ni nyuwo mwaahikhanle oohiroromeleya naari mwaahithatungwe oohitteela mutheliweene, maahi oowaawa ala anruuha nlapho ehoopakeni yoonanara.

²⁰Vaheera, mwaahiroromeleiye mutheliweene ni mwiivalingheene woomukonano mulopwana ohoothenleni,…”

²¹vano hiiho musaserdoti* amulipeliheke ni nlapho muthiyana amweerelaka: “Yave oopakeeni etthu yoolamphwa ni onyoosiwa eriyari ya muloko, apakihaka weera erukulwaanyu esare ni muhiyarerutho.

²²Maahi ala anruuha nlapho evolowe mweerutthunimwanyu ni esare erukuluwaanyu ni ewooceeliheni oyara.” Vano muthiyana eereke: “Ame. Okhale hiiho.”

²³Musaserdoti* alepeke malapho ala mukarattani, vahoolowaya arapiheleke mmaahini oowaawa.

²⁴Owo angwuriheke maahi oowaawa anruuha nlapho, ni maahi awo evoloweke mweerutthunimwawe, emutannyeraka ohaawaxa.

²⁵Musaserdoti* akuxeke mmatatani mwa muthiyana owo yooveleela ya irooro mwa ehace, iinainihereke ohoolo wa Yave ni aruuheke valtaarini*.

²⁶Vano musaserdoti* anyottoleke yooveleela ya irooro ntoko yooveleela yoowuupuwelela ni ahisereke valtaarini*. Vahoolowaya angwuriheke maahi muthiyana owo.

²⁷Muthiyana owo avaliheya, akhalaka oohiroromeleya wa iyawe, musaserdoti* angwurihaleene maahi anruuha nlapho, maahi awo anoovolowa mweerutthunimwawe ni anoomutannyera ohaawaxa; erukulwaawe enoosara ni owo khaweraru oyara; onoothatuwa oolaphiwa eriyari ya mulokwaawe.

²⁸Wa soothesene, muthiyana aahivaliheya, anakhala ootteeleene, khahaawa nttaruxo ni onoowera oyara.

²⁹Vano eyo ekano mwaha wa ehace, muthiyana akhala oohiroromeleya ni iivaliha atheliweene,

³⁰hoye hoye ehace yamukhalaxa mulopwana niwoko noomuhovela mwaariye. Musaserdoti* amwiikaathiki ohoolo wa Yave ni amviriheke mukanoni yootheene ela.

³¹Ihovasi saakhuleleya naari saahaakhuleleya, iyawe khakhalano nthowa; vaheera muthiyana onoohaawa mwa soopakasawe sootakhala.