Read Makhuwa-Shirima Nuumeru 6 Bible Online

Nuumeru 6 - Makhuwa-Shirima bible

Nuumeru 6

¹Yave aamweerelatho Moisesi:

²“Mwaaleele ha aYixrayeli: “Mulopwana hoye hoye muthiyana atthuna omuroromeliha etthu yooreera, aani yoororomeliha ya omwalanyiha wa Yave ntoko muNaziri*,

³ahiwureke eviinyu ni soowura sikina soohapala ni ahiwure eviinyu yoonyuunya naari yoowura ekina yoohapala. Ahiwure iwuuva* naari ahikhuure iwuuva* hata iwuuva* soowuuma.

⁴Areene muNaziri*, ahiceru etthu ekuxingwe ngwuuvani, hata inukusene hoye hoye makacapha.

⁵Mweehuhuni yootheene ya ororomelihawanyu omwalanyiha, muhimetthiweru. Mpaka omala ehuhu ya omwalamwaliheriwa Yave, owo akhaleke ootteelihiwa ni ahiyeke yunnuwaka mayihi a mmurumwawe.

⁶Mweehuhuni yootheene ya omwalamwaliheriwa Yave, ahaattameleru muttembo.

⁷Naari ekhalaka atithawe hoye hoye amayawe hata murokoriye naari munneiye okhwiiye, owo ahithatuwe oohitteela mwaha wa yaawosa, niwoko mayihi a mmurumwawe ti eneneero ya omwalanyihereyawawe ni Muluku.

⁸Mweehuhuni yootheene ommwalanyiheriwaawe, anaakhale ootteeliheriwa Yave.

⁹Mukina akhwa wootutuxereya vakhiviruwawe, hiiho avalihaka mayihi otteelihalaawe, owo amettheke mayihi mmahukuni mathannameeli — eyo tiiyo ehuhu ya otteelihiwawawe.

¹⁰Vanihukuni nanaathannamararu aruuheke aximasiya meeli hoye hoye makhinda meeli wa musaserdoti* areene vamulako wa Eheema ya Muthukumano*.

¹¹Musaserdoti* amveleeleleke mmoha ntoko yooveleelela yoottheka ni mukinoowo ntoko yooveleela yoohisa, weera amurehererele wiiwanana ni Yave, niwoko oottheka woowaattamela muttembo. Nihuku nenenenno muNaziri* onootteelihatho muruwaawe.

¹²Owo iitteelihereleke Yave mweehuhuni ya wiimwalanyiherawawe ni aruuheke eputtiputthi ya eyaakha emoha ntoko yooveleelela nthowa. Khayaalikeliwa mahuku a khalayi niwoko oovaliheya mweehuhuni ya omwalanyihereyawawe.

¹³Eyo ti ekano ya muNaziri* yaamalaka ehuhu ya omwalamwalawawe: Owo aruuhiweke vamulako wa Eheema ya Muthukumano*.

¹⁴Vano amuruuhelekewo Yave yooveleelaawe: Eputtiputthi elopwana ya eyaakha emoha ni yoohirakala ntoko yooveleela yoohisa, eputtiputthi ethiyana ya eyaakha emoha ni yoohirakala ntoko yooveleelela yoottheka, napunci oohirakala ntoko yooveleelela murettele,

¹⁵vamoha ni yooveleelaawe ya irooro ni soowura ni mpapara wa ipaawu soohikhalano eferementu, iboolu soopakeliwa ephepa yooreerela yooweetheeliwa makhura ni ipaawu soozazaala soottikittheliwa makhura a sooliveira*.

¹⁶Musaserdoti* amuruuheleke Yave ni apakeke yooveleelela yoottheka ni yoohisa.

¹⁷Aruuheke mpapara wa ipaawu soohikhalano eferementu ni amveleeleke napunci ntoko yooveleelela murettele wa Yave, vamoha ni yooveleela ya irooro ni soowura.

¹⁸Woottharelana, muNaziri* amettheleke mayihi otteelihalaawe vamulako wa Eheema ya Muthukumano* ni avonyereke vamooroni ori vathi wa yooveleelela murettele.

¹⁹muNaziri* amenttheene mayihi a otteeliherawawe, musaserdoti* amwinnyerereke mmatatani khakobe mmoha oowaapeiwa a napunci, eboolu ni epaawu yoozazaala sikhumihiwe mumpaparani, soopiili iyo soohikhalano eferementu.

²⁰Musaserdoti* iinainihereke iyo ohoolo wa Yave ntoko yooveleela yoowiinainihiwa; ti sootteela ni sa musaserdoti*, hiihotho ehoce yiinainihiwe ni etakhwi yooniheriwe. Vahoolowaya, muNaziri* awureke eviinyu.

²¹Ela ekano ya yoororomeliha ya muNaziri* ni ya yooveleela yootteeliheriwa Yave, ottharihiwaka omwalamwalawawe, ehaalikeleliwaka yakhalaru etthu ekinoowo ongweraawe oliva weera aandyeereke. Akwanihereke yoororomeliha opankaawe, attharihaka ekano ya muNaziri*.

²²Yave aamweerela Moisesi:

²³“Munleele Aharoni ni anamwanaawe asilopwana weera mwaareelihe aYixrayeli moota ola:

²⁴‘Yave ooreeliheni ni oothokororeni;

²⁵Yave awaariheleni ekhovaawe ni awoonihereni murima wooreera;

²⁶Yave ooweheeni ni oovaheeni murettele.

²⁷Ola moota asaserdoti* eneeraaya yaareeliheke aYixrayeli mwa Nsinanaka, ni Miyo kinimwaareelihasa.