Read Makhuwa-Shirima Mikeyasi 2 Bible Online

Mikeyasi 2 - Makhuwa-Shirima bible

Mikeyasi 2

¹Ii! Wa yaawo amvaanelela yoonanara, wa yaawo anuupuwela soovaanela soonanara ankonaayawo! Waaxaaka ankwanihera sootheene seiyo, niwoko angwera opaka seiyo.

²Anghaawela ittima, enaakha; anghaawela impa, enakuxa. Animulokotthela mukina empaawe; aani, mwaattamanaawe ni yoohiyeriwaawe.

³Tivawo Yave oneeraawe ha: “Kinaavaanelela erisa atthu ala, mwa yeeyo nyuwosa muneeranyu muhiwere wiitapuxa. Nyuwosa khamweettatho ngwiixoonani, niwoko enookhala ehuhu ya erisa.

⁴Nihuku nno, nyuwosa munootthebwiwa; animootheyani ni ecipo yoothananiha ela: ‘Nooheleyaxa nthala; ettima ya mulokwaaka yookawanyeya. Owo ookaakha! Ittimasahu ohaavaha anamavariha.’ ”

⁵Tivawo nyuwosa muneeraanyu muhikhalanase mutthu munthukumanoni moothemwene mwa Yave aakawaka elapo, apakelaka mwaathanle.

⁶“Muhilaleiye moota hiiho,” aneera maprofeetaaya. “Muhilaleiye mwaha wa itthusene seiya; erisa kheeniphwanya.”

⁷Weeraka ekhapira ya Yakobe eneera: “Munepa wa Yave, khoonyoonyiwa? Owo ompaka hiihaawo? Maswaaka animpakela nnene yoowo orino mweettelo wooreera.

⁸Vaheera mweehuhuni soomalihera iya, mulokwaaka wookivenyera ntoko amwiittana. Munimwiiyera mukaandyo nthamwene, yoole onghokolowa mmuretteleni, muntatuxaka ntoko aahokolowa okhottoni.

⁹Nyuwosa munaavenxa asithiyana a mulokwaaka mmatthokonimwaya moosiveleya. Nyuwosa mumvenxa mareelihowaaka wa anamwanaaya wa mahuku ootheene.

¹⁰Mvenye, mpwahe! Vano nna khanihiyono nipuronanyu noowiitthuuwa, niwoko nna noovaliheya ohikhalakaru murette.

¹¹Namootha ni namalokottha arwa, aneera: ‘Miyo kohoolaleerani waatta wa eviinyu ni wa yoowura yoohapala,’ owo onookhala ti mprofeeteene a muloko ola!”

¹²“Ii! Yakobe, vekhaikhai kinimoothukumanyihasani ootheene nyuwo, aani, kinimwaathukumanyiha oohalahala a oYixrayeli. Miyo kinimwaathukumanyiha ntoko ikhondoolo sireene munikhoolani, aani ntoko muhuwo oreene muncihiwa; awosa animwaatta moota wooweera onookhala onyakuleleya wa nakupa owo.

¹³Yoowo onghula ephiro, onoorowa ohoolowaya; anoovira vamulako, ekhumeke. Mwenaaya onoovira ohoolowaya, Yave onimwaahoolela.”