Read Makhuwa-Shirima Mikeyasi 5 Bible Online

Mikeyasi 5 - Makhuwa-Shirima bible

Mikeyasi 5

¹Ii! Esidade ya anakhotto, mwaathukumanyihe anakhottwaanyu, niwoko oYerusaleemu wooriciwa. Muhooleli a oYixrayeli, onoovulalihiwa ekhove ni ekopo.

²“Vaheera nyuwo Beteleheemu Efrata, murookhalaru mukhaani eriyari ya mahimo a oYuda, wa nyuwo onimoorwa wa Miyo mmoha aneera akhale mulamuli a oYixrayeli — mwa yoowo epacererowaawe ekhumale khalayixa.”

³Tivawo aYixrayeli eneeraaya ehiiwe mpaka eneeraaya ephiye ehuhu yooyara ya yoole ongyara. Vano ephuwela ya axunna a mulamuli, enoohokolowa weera ethukumane ni aYixrayeli.

⁴Owo onimweemela ni onookukhula muhuwaawe mukuruni sa Yave, mootokweeneni wa Nsina na Yave, Mulukwaawe. Hiiho awosa anookhala oolipeene niwoko wunnuwawawe onoophiyera elapo yootheene.

⁵Owo onookhala murettelaaya. awAsiriya yaavoleelaka elapwaahu, ni yeetteettaka moolipamwahu, nnimwaakhumihera akukhuli athanneeli, mpakatho ahooleli athannaararu oothanliwa.

⁶Awosa anoolamula elapo ya awAsiriya ni ekatana, ni elapo ya Ninrode evarenleene ekatana. Mwenaahu onoonitapuxa awAsiiriya yaavoleelaka elapwaahu, ni yaalapuwaka nyiinanosahu.

⁷Oohalahala a oYixrayeli anookhala eriyari ya miloko sincipale, ntoko nikame na mpatta wa Yave, aani, ntoko epula yincipale enrupela munnyepuni; kheeningweherera mutthu, hata kheenkhalela omutthu.

⁸Oohalahala a Yakobe anookhala eriyari ya miloko, aani, eriyari ya miloko sincipale, ntoko mwatto eriyari ya axinama a ntuphini, ntoko mwatto oolipa eriyari ya mihuwo sa ikhondoolo, mwa yoowo omvara ni onnyaanya yoovara, ahikhalakaru ongwera otapuxa.

⁹Ntatananyu nnimwaavenyera amwiittanaawe ni ootheene awosa anoophwatiwa.

¹⁰“Nihuku nno,” onghima Yave, “kinimwiiva ikavalusanyu*, ni kinoophwata ikaarosanyu sa ekhotto.

¹¹Kinoophwatatho isidade sa elapwanyu, kikurumuleke moolipamwanyu.

¹²Kinoomaliha okhwiraanyu ni nyuwosa khamwaaherasatho ihako.

¹³Kinoophwata icaambulosanyu soopatthiwa ni amarimbwaanyu ootteeliheriwa; nyuwosa khamukokhoratho ohoolo wa soopakiwa ni matataanyu.

¹⁴Kinoophela eriyaraanyu nyiri soothipeleliwa sa Axera, kiphwateke milukusanyu.

¹⁵Kinimwiinlela ikukuttula musarani ni moonyoonyeriwani miloko sihikiiwelenle.”