Read Makhuwa-Shirima Mikeyasi 7 Bible Online

Mikeyasi 7 - Makhuwa-Shirima bible

Mikeyasi 7

¹Moota kinghaawaaka! Kinlikana ni yoole onrukula soowiima mweelimweni singhalahala mmatta mwa iwuuva*; kheewoworu ekhuce ya iwuuva* weera kilawihe, kheewoworu efiigu* enyowani kinghaawelaxaaka.

²Yaawo a murima woororomeleya aalakaseya mulaponi; khawoworu oororomeleya. Ootheene aniipithela weera eyeehe ephome; khula mutthu onimulupattha munneiye ni ntapha.

³Oolikaneene opaka yoonanara, mulamuli onnyesereriha soovaha, mphuki onaakhulela makhwankwa, aweri annyeserera yeeyo antthunaaya; ootheene awo amvaanelela vamoha.

⁴Yoowaareerelaaya eri ntoko rupulula, ni yoowookoleleyaaya ti yootepaxa opwaha ekintali ya nyiiwa. Noophiyera nihuku na anamalipelelaanyu, nihuku na nttaruxo na Muluku, ehuhu ya munyakunyakwaanyu.

⁵Muhaaroromele amwaattamanaanyu; hata muhiwaakhulele asinthamwenaanyu. Mpaka yoowo munkupaleelanxaanyu, khula mutthu iipasoope ni yeeyo onghimaawe.

⁶Vano, mwaana mulopwana onaanyoosa atithawe, ni mwaana muthiyana onaavaanya amayawe, pwiyamwaana ni apwiyamwaanaawe; amwiittana a mutthu ti amusaawe xaxaxa.

⁷Vaheera wa miyo, kiningwiriyanela Yave, kiwehereraka mwa Muluku, Mvuluxaaka; Mulukwaaka onookiiwa.

⁸Amwiittanaaka, muhiixoone ni miyo. Naari miyo kimoraka, kinoovenyatho. Naari miyo kikhalaka mpiphini, Yave onookhala yoomwaleelaaka.

⁹Keenre miyo kimutthekela Yave, kinoovilela isarasawe mpaka Owo aneeraawe akaakihe ni awerihe ekaikaiyaaka. Owo onookikhumihera ngwaarani; Miyo kinimoona wookoleleyawawe.

¹⁰Vano mwiittanaaka anoone yeeyo uulihiheyaxeke muru, yoole aakeerenle: “Ori woowi Yave, Mulukwaanyu?” Maithwaaka animoona omorawawe; owo onoonyikalasiwa ntoko nttoko na munseweni.

¹¹Nnoophiyera nihuku na oraseliwa ixirisanyu, nihuku sineeraaya sithanuliwe nyiinanosanyu.

¹²Nihuku nno, atthu animoorwa wa nyuwo okhuma wAsiriya mpaka wExipitu, ni okhuma wExipitu mpaka wEfratesi, ni okhuma ophareiya mpaka ophareiya ni omwaako mpaka omwaako.

¹³Elapo enoohala ttewu niwoko na yeeyo amakaaya apankaaya.

¹⁴Mukukhule mulokwaanyu ni ekopwaanyu, muhuwo wa yoohiyeriwaanyu onkhala mpattaaya moothakoni, moocihamo moopomba. Muhiye ocaaka oBaxani ni oGiliyade, ntoko khalayi.

¹⁵Ntoko mmahukuni mwaakhumaanyu wExipitu, kinimoonihera sootikhinihasaka.

¹⁶Miloko sinimoona yeeyo, suulihiheyeke muru, sihuhuleliweene owerawaya wootheene. Sinoophuta iyano, sittiyeyeke maaru.

¹⁷Sinimweesela ntthupi ntoko enowa, aani ntoko axinama aniipurula. Sinookhuma moolipamwaya sithukumelaka; ngwoovani, sinoomuhokoleela Yave, Mulukwaahu, ni sinoowoovani.

¹⁸Ii! Muluku, khawoworu muluku mukina ntoko Nyuwo, munttiwala soottheka ni ovaanya wa yaawo anghalahala a mmulokonimwanyu! Nyuwo khamunnyoonyiwa wa mahuku ootheene, mene munghakalalela woowoonihera murima wooreera.

¹⁹Munoonimorelatho ikharari; munoonyikalela sootakhalasahu ni munoorihela sootthekasahu sootheene moowiixera mwa ephareiya.

²⁰Munoomoonihera Yakobe ororomeleya, ni munoommorela ikharari Abrahaamu, ntoko mwaaroromelinghaanyu ni nlipelo makholowaahu khalayeene.