Read Makhuwa-Shirima Habakuki 2 Bible Online

Habakuki 2 - Makhuwa-Shirima bible

Habakuki 2

¹Miyo kinimweemela vanipuronivaka noolipelela; vaxirini ya esidade. Kinoowehererawo weera kiiwe yeeyo Yave aneeraawe akaakhule; aani yoowaakhulaawe ya ottaandawulawaka.

²Vano Yave aamwaakhula: "Mulepe nnenesene moonelo vatthaabwani weera namutthenga atthimakeno.

³Vanonto moonelo oniweereiye mweehuhuni yootthuneya; onghima sa ommaleloni ni ti wa ekhaikhai. Naari opisaka, ngweherere yoowo, niwoko vekhaikhai enoophiya ehuhuwaaya.

⁴Mmoone, owo ti oowiixoona; soohaawelasawe khasireenre; vaheera oororomeleya onookhala niwoko na nroromelonawe.

⁵Aani eviinyu ti enimulokottha; owo ti oowiixoona ahiitthuuwaka mahuku ootheene. Khamvona ntoko okhwa okhalawawe ti wootthunatthuna, awinaka miloko sincipale. Onthukumanyiha mukhwipimwawe milokosene seiyo.

⁶Nihuku na muhoolo miloko sootheene iyo sinoomutthebwa ni icipo sa munyemu, seeraka: ‘Ii! Yoowo onthukumanyiha itthu soohuhula ni oniipuhiha ni wiixoopopiha. Mpaka yaakhani eyo eneeraaya epwaherere?’

⁷Anamakopaanyu anoovenya woowaakuveya; yaawosa avennye animoothukumelihani. Vano munoothatuwa oovariwa ni yaawosa.

⁸Mweenre muhuhulaka miloko sincipale, seiyo sihalahanle sinimoohuhulani nyuwo niwoko na owiivawanyu oohinthowa. Moophwata ilapo ni isidade ni amakaaya ootheene.

⁹Ootakhaliwa yoole onteka empaawe ni musurukhu woowiiyiwa. Mulopwana owo onreherera epuurwaawe vanipuroni na osuluxa weera atthawe ngwoopihani moothemwene.

¹⁰Moovaanela waaphwata atthu ancipale muulihihaka muru vaatevanyu ni mutthekihaka okumaahu.

¹¹Maluku a exiri animookhuwelelani ni itthaabwa sa mapatho sinimookhalelani namalwe.

¹²Ootakhaliwa yoole onteka esidade ni ephome ni oniitekela muttetthe ni nipuhero!

¹³Yave a ikuru sootheene oolakela weera miteko sa miloko sinoomala ni mooro paahi. Mitekosaya soovihaxa sinookhala soohivareleya etthu.

¹⁴Vaheera elapo ya vathi eniisareye ni osuwela ovuwa wa Yave, ntoko maahi ansareyaaya mphareiya.

¹⁵Ootakhaliwa yoowo onimvaha eviinyu mukhwaawe, atakanseraka yoohapala weera amuhapalihe eerelaka omoona tiriya.

¹⁶Munoosareya wuuliwa muru ohikhanle ovuwa. Vano, ti emaaraanyu! Ngwureke ni mwiixoonihere etiriyaanyu. Ekoomixi ya ntata noolopwana na Yave mumvahiwa nyuwo ni ovuwawanyu onoosareya wuuliwa muru.

¹⁷Nipuhero mwaapakenlaanyu oLibanu nnimoophwanyani ni munoosareya woova niwoko na owiivawanyu axinama. Nyuwo mooyeeha ephome yincipale, munapuhera ilapo, isidade ni amakaaya.

¹⁸Muluku oolokottha khamvareleya muteko, eenre apakiwaka ni mutthu. Hiihotho ecaambulo enxuttiha soowootha kheemvareleya muteko. Vano yoowo opanke onroromela yeeyo opankaawe, apakaka miluku sihingwera wuuluma.

¹⁹Ootakhaliwa yoowo oneerela mwiri: ‘Okhaleke ni okumi!’ Hoye hoye oneerela nluku noohikhalano okumi: ‘Ovenyeke!’ Nno nnoowera woovahani miruku? Nihuruweliwe eyuuma yoorikaxa ni eparatha*, mene khanimmumula.”

²⁰Vaheera Yave ori Mpaanimwawe yootteela; elapo ya vathi yootheene emaaleke vahoolowawe.