Read Makhuwa-Shirima Habakuki 3 Bible Online

Habakuki 3 - Makhuwa-Shirima bible

Habakuki 3

¹Nivekelo na mprofeeti, Habakuki, attharaka moota wa ecipo eniitthaniwa Xigiyonoti*.

²Yave kohiiwa sa epilaanyu; Ii! Yave, kootikhiniheya niwoko na mitekosanyu. Mpaketho seiye mweehuhunimwahu; musuweliheke mmahukunimwahu. Musaranimwanyu muupuwelele ikharari.

³Yave orweenle oTemani; Ootteela orweenle wa mwaako Parani. Sela*. Ovuwawawe wookhuneela erimu ni ottottopeleyawawe woosareya elapo ya vathi.

⁴Waarawawe onlikana ni woopa wa nsuwa, mmatatanimwawe otuthaka siraayamo ikurusawe sitokotoko.

⁵Mahooxo onrumihela ohoolowawe; iretta soowoopiha sintthara ottuliwawe.

⁶Aaheemela, ni elapo yaathukumela; aaweha ni miloko saasareya woova. Nyaako sa khalayi soophwateya; mattumuxa a khalayixa aamwaramwareya. Iphirosawe ti soohimala.

⁷Kohoona iheema sa oKuxani moothananani; iluttu sa iheema sa oMidiyani sithukumelaka ni woova.

⁸Yave, weeraka mwaanyoonyeringwe nyooloko hoye hoye mirora? Weeraka mwaanyoonyeringwe ephareiya, Nyuwo mweettihaanyu ikavalusanyu* ni ikaarosanyu sa owina?

⁹Mooreherera muuraanyu; movekela nyuupa sincipale. Sela*. Moototoxa etthaya ni nyooloko.

¹⁰Nyaako soowoonani sinatetereya. Nyooloko sa maahi simvira ni wuupa; moowiixera onruma ni mitekutekusaya sitokotoko.

¹¹Nsuwa ni mweeri saaheemela wiirimu woowoona otutha wa nyuupasanyu sivavaka; waara wa nivakananyu noowaaraxa.

¹²Munyoonyiweene mwaavira elapo ya vathi ni musaranimwanyu mwaanyikalasa miloko.

¹³Mwaakhuma weera mvuluxe mulokwaanyu ni weera muntapuxe oottikittheliwaanyu. Moomphwata mutokweene a elapo ya atakhali; munrulaka okhuma waamuru mpaka waametto. Sela*.

¹⁴Mwaamuthorola ni nivakanawe muneenaawe, anakhottwaawe ekhumaka weera enimwaramwaxe. Yaakhuma enitthukuruwelaka oohakalaleene weera yiive ahikhalaka ompwattha.

¹⁵Mwaanyikala ephareiya ni ikavalusanyu* mutekumihaka maahi mancipale.

¹⁶Kohiiwa ni murimaaka woosareya woova; eyanowaaka yaathukumela; ophwata waakitteengula ni nyettosaka saaveveleya. Hata hiiho kinooweherera ni ovilela nihuku noowuuliha muru nneera niphiyere muloko onniwanano.

¹⁷Naari ohittuvaka mwiri wa efiigu* hata sihooneyaka iwuuva* muvideirani*; naari wooceeleyaka ohepha wa sooliveira* ni imatta sihiruwereyaka; naari sihikhalaka ikhondoolo hoye hoye imombe munikhoolani —

¹⁸hata hiiho, kinoomuhakalalela Yave; aani kinoomuhakalalela Muluku Mvuluxaaka.

¹⁹Yave onlamula soothesene ti ikurusaka. Onaaluxa nyettosaka ntoko sa naahe ni ekhomaci. Onkiweriha weetta oolipeene mapuro a osulu mwaako woowoopiha. Wa mutokweene a icipo, ni ikaruma sa mikhoyi.