Read Makhuwa-Shirima Zefaniya 1 Bible Online

Zefaniya 1 - Makhuwa-Shirima bible

Zefaniya 1

¹Yave aahuuluma ni Zefaniya, mwaana mulopwana a Kuxi, mwaana mulopwana a Gedaliya, mwaana mulopwana a Amariya, mwaana mulopwana a Hezekiya. Zefaniya aalaleiya mutthenga ola mweehuhuni ya olamula wa mwene Yosiya, mwaana mulopwana a Amoni, mwene a oYuda:

²“Kinoophwata itthu sootheene sa mulaponi,” onghima Yave.

³“Kinimwaaphwata atthu ni axinama; kinoophwata ipalame sa wiirimu ni ihopa, ni yaawo antannyera okwattula vamoha ni atakhali. Kinoopaka yeeyo, kiphwataka omutthu mulaponi,” onghima Yave.

⁴Kinootheteela ntata oYuda vamoha ni amaki a oYerusaleemu. Kinimwaamalamaliha nipuro nna ahalahanle a Bahali*, masina a yaawo anrumeela miluku ni asaserdotaaya,

⁵yaawo anlapa ithenyeeri sa wiirimu vasulu vanipathoniwaya, ni yaawo ankokhora elipelaka mwa Yave nitho mpaka Moleki;

⁶Yaawo anghapuwa ehiyaka omutthara Yave, hata ehimwaasaka naari ehimukohereraka.

⁷Mmaale ohoolo wa Yave onlamula sootheene, niwoko nihuku na Yave nookhuveela. Yave ooreherera yooveleela; ohaatteeliha yaawo aalattunlaawe.

⁸Vanihukuni na yooveleela ya Yave, kinimwaattaruxa ahooleli, anamwane asilopwana a mwene, ni ootheene awanre ikuwo sa enamarwa.

⁹Nihuku nno kinimwaattaruxa ootheene anraramela waathi nsele, esarihaka mpaani mwa milukusaya nipuhero ni olokottha.

¹⁰“Nihuku nno,” onghima Yave, “onookhuweliwa vakhiviru wa mulako wa Ihopa, olalamikiwa munttettheni munyowani, ni oruma otokotoko mmattumuxani.

¹¹Mulalamike nyuwosa munkhala mmuttettheni wa nakoso a esidade; ananakoswaanyu ootheene anoophwatiwa woomalela. Anooheleya nthala ootheene anthumiha eparatha*.

¹²Ehuhuweene yeeyo, kinoomukungura Yerusaleemu ni onyaari, kaattaruxeke atthu mootthekanimwaya ahimpwattharu etthu ni yiixuupuwelaka: ‘Yave khapakaru yooreera naari yoonanara.’

¹³Mihakhusaya sinoohuhuliwa; impasaya sinookurumuliwa. Naari etekaka impa inyowani, kheekhalamo; anoophatteya imatta sa iwuuva*, mene kheewura eviinyuwaaya.”

¹⁴Nihuku ntokweene na Yave, nookhuveela; nookhuveela, ningwa woowaakuveya. Mwiiwe! Nihuku na Yave nnoowaawa ni okhuwelaxa woowaawa wa anakhotto.

¹⁵Nihuku nno, nnikhale na isara, nihuku na makacamiho ni othanana, nihuku na ohaawa ni oheleya nthala, na epiphi ni ewiriphi, na mahutte ni oriipihana,

¹⁶nihuku na wiipiwa mapalapatta ni okhuweleliwa ekhotto isidade soolipihiwa ni itoore* sa mmaloothoni.

¹⁷“Kinimwaaruuhela atthu ohaawa, ni animweetta ntoko oohoona, niwoko aamutthekela Yave. Ephomaaya enoomwaraxiwa ntoko ntthupi ni erutthwaaya ntoko mahiloka.

¹⁸Eparathaaya* ni eyuumaaya yoorikaxa khayaatapuxa vanihukuni na isara sa Yave. Mmooroni wa ehacaawe, enoolalihiwa elapo yootheene, niwoko Owo onimwaamaliha wootutuxereya ootheene ankhala mulaponi.”