Read Makhuwa-Shirima Zakariya 1 Bible Online

Zakariya 1 - Makhuwa-Shirima bible

Zakariya 1

¹Mmweerini wanaathannamiraru wa eyaakha yanaaveeli ya olamula wa Dariyu, Yave aahuuluma ni mprofeeti Zakariya, mwaana mulopwana a Berekiya, mwaana mulopwana a Ido, amweerelaka:

²“Yave aahaanyoonyeraxiwa makholowaanyu.

³Tivawo, mwaaleele aYixrayeli: ‘Yave a ikuru sootheene oneera ha: ‘Muhokoleele wa Miyo,’ onghima Yave a ikuru sootheene, ‘ni Miyo kinoohokoleela wa nyuwosa,’ onghima Yave a ikuru sootheene.

⁴Muhikhale ntoko makholowaanyu, wa yaawo yaalaleeriwe ni maprofeeti a khalayi masu ala: ‘Yave a ikuru sootheene oneera ha: ‘Muhiyeke iphirosanyu ni mitekosanyu soonanara.’ Mene awosa khayaatthunne wiiwa naari khayaakipwantthe, onghima Yave.

⁵Vano ari woowi makholowaanyu? Ni maprofeeti — weeraka anookhala mahuku ootheene?

⁶Vaheera maswaaka ni ikanosaka mwa seiyo kaalamulenlaaka arumeiyaaka, maprofeeti, saahaaphwanya makholowaanyu. Vano yaakurunuxa mirimasaya yeeraka: ‘Yave a ikuru sootheene oonipakela yeeyo iphirosahu ni mitekosahu simphwanelaaya, ntoko aalakenlaawe opaka.’”

⁷Vanihukuni nanaamiloko miili ni maxexe na mweeri wanaamuloko nimmoha oniitthaniwa Xebati, vayaakhani yanaaveeli ya olamula wa Dariyu, Yave aahuuluma ni mprofeeti Zakariya, mwaana mulopwana a Berekiya, mwaana mulopwana a Ido.

⁸Moohiyuni kaahoona moonelo ni ohoolowaka aakhala mulopwana eettiha ekavalu* yooxeera! Owo aari yeemelelo variyari wa imurta* vanxaapwani. Ottuliwawe saakhala ikavalu* sooxeera, sancano ni sootteela.

⁹Miyo kaakoha: “Pwiiyaaka, iya iheeni?” Ndyelo uuluma ni miyo aakaakhula: “Kinoowooniherani seiyo.”

¹⁰Vano mulopwana aari eriyari ya murta* aakithalihera: “Ti seiya Yave orumihenlaawe weera siviravire elapo ya vathi yootheene.”

¹¹Vano seiyo saahuuluma ni ndyelo a Yave eemenle eriyari ya murta* simweerelaka: “Hiyo nooviravira elapo ya vathi yootheene, nnaphwanya elapo yootheene yoomaaleleya munretteleni.”

¹²Vano ndyelo a Yave aamweerela Yave: “Yave a ikuru sootheene, mpaka yaakhani muhimorelaka ikharari oYerusaleemu ni mittetthe sa oYuda, mwa seiyo munyoonyeringwaanyu wa iyaakha miloko mithannamiili iya?”

¹³Vano Yave aahuuluma masu ooreera ni oolipiha murima ni ndyelo uuluma ni miyo.

¹⁴Vano ndyelo uuluma ni miyo aakeerela: “Mulaleiye masu ala: Yave a ikuru sootheene oneera ha: ‘Koosareya ihace ni oYerusaleemu ni oZiyoni,

¹⁵mene koonyoonyeriwa miloko siniixoona okhala soolipasene. Kaanyoonyeriwa vakhaani paahi, mene iyo saahaandyeerera erisa.’

¹⁶Tivawo, ti yeeyo Yave eenraawe: “Kinghokoleela oYerusaleemu ni ikharari ni Empaaka enooraseliwawo. Vano efiiyu yooringelano enimookoleliwa oYerusaleemu,” onghima Yave a ikuru sootheene.

¹⁷Mulaleiyetho: “Yave a ikuru sootheene oneera ha: ‘Mittetthesaka sinoosareyatho weetteleya nnene ni Yave onoopepesatho oSiyoni athanlakatho oYerusaleemu.’”

¹⁸Vano kaaweha osulu kinoona ohoolowaka manyaka maxexe!

¹⁹Miyo kaamukoha ndyelo uuluma ni miyo: “Iheeni iya?” Owo aakaakhula: “Ala ti manyaka amwaranxe oYuda, oYixrayeli ni oYerusaleemu.”

²⁰Vanonto Yave aakoonihera anamaratta axexe.

²¹Miyo kaakoha: “Awosa anrweelani?” Owo aakaakhula: “Ala ti manyaka amwaranxe oYuda moota wooweera khaawo angwera weemexa muru, mene anamaratta aarweenle woopopiha ni wiintaka manyaka awo a miloko avenyenre muloko wa oYuda weera yaamwaraxe amakaaya.”