Read Makhuwa-Shirima Zakariya 10 Bible Online

Zakariya 10 - Makhuwa-Shirima bible

Zakariya 10

¹Mumvekele Yave epula mutthulo; ti Yave ompaka etari. Owo onaarupihela epula atthu, aameliheraka soomela.

²Miluku soowootha sinuuluma soowootha; anahako anoona nyoonelo siri soowootha. Awosa anthalihera sooloha soolokottha ni ampepesa wa siiyo. Tivawo muloko onxoraxoraaya ntoko ikhondoolo soothananela ohikhalano mukukhuli.

³“Isara sa Yave sinaapattela akukhuli ni onimwaattaruxa ahooleli, niwoko Yave a ikuru sootheene onookosoopa mulokwaawe, empa ya oYuda ni onoopakiha ntoko ekavalu* yooreerela mukhottoni.

⁴Nluku noottittimiheyaxa nnoorweela oYuda, hiihotho ekhomo ya eheema, muura wa okhottoni ni anamalamula ootheene.

⁵Awosa anoolikana asilopwana ooweraxa enyikalaka nttoko mmiseweni okhottoni. Eenre Yave akhala ni yaawosa, awosa anoowana, yaawineke anamweettiha a ikavalu*.

⁶Kinoolipiha ekhapira ya oYuda ni kinoovuluxa ekhapira ya Yoseefe. Kinooreherera niwoko koosarela ikharari. Atthwaaya anookhala ntoko nkinaakhootte, niwoko Miyo ti Yave Mulukwaaya ni kinoowaakhulasa.

⁷awEfrayimi anoothatuwa ntoko asilopwana ooweraxa ni mirimasaya sinoohakalala ntoko soowura eviinyu. Anamwanaaya animoona, ehakalaleke; mirimasaya sinoomuhakalalela Yave.

⁸Kinoowuuvela ntata, kaathukumanyeke. Vekhaikhai kinoowoopola ni anookhala oowaattaxa ntoko yaaraaya khalayi.

⁹Naari Miyo kaamwaraxelaka variyari wa miloko soorakamela, awosa anookuupuwelela. Animwaahuwa anamwanaaya ehokoloweke.

¹⁰Miyo kinimwaahokoloxa wExipitu ni kinimwaathukumanyiha wAsiriya. Kinimwaarongha oGileyade ni oLebanoni, ni vano elapo kheekhalano nipuro nowaakwanelela.

¹¹Awosa anoovira mphareiyani mwa makacamiho; ephareiya yoowali enoomaalihiwa ni maahi ootheene a Nilu animuuma. Wiikuxa wa wAsiriya onoohononiwa ni ekopo ya emwene ya wExipitu enoolakaseya.

¹²Miyo kinimwaalipiha mwa Yave ni mwa Nsinanawe awosa animweetta,” onghima Yave.