Read Makhuwa-Shirima Zakariya 11 Bible Online

Zakariya 11 - Makhuwa-Shirima bible

Zakariya 11

¹Ii! oLebanoni, muhule milakosanyu weera mooro olalihe nyirisanyu sa esedari*.

²Ii! Epinyeiru*, mwiipulele, niwoko esedari* yaamora; nyiri sooreerelaxa sohuuhiwa! Mulalamike, ekaravalyu* ya oBaxani, niwoko othakwaanyu woowiilihana woophwateya!

³Mwiiwe olalamika wa akukhuli; moocihamwaya mooruwereyaxa moophwatiwa! Mwiiwe wiipa wa amwatto; othako woowunttelana wa oYordanu woohononiwa!

⁴Yave Mulukwaaka oneera ha: “Mukukhule muhuwo olakeliwe wiiviwa.

⁵Anamathumaaya aniiva, epwahereraka ohittaruxiwa. Yaale anthumiha muhuwo aneera: ‘Yave atthapeliwe, miyo koopuhaxa!’ Mpaka akukhulaaya khaanuurela yoowo.

⁶Miyo nkirwatho kaamorela ikharari amaki a elapo,” onghima Yave. “Khula mutthu kinoomwinnyerera wa mwaattamanaawe ni wa mwenaawe. Awosa anoohasula elapo ni Miyo khaawo kineeraaka kimutapuxe mmatatanimwaya.”

⁷Vano kaakukhula muhuwo waalakeliwe wiiviwa — oohasulaxiwa a muhuwo. Vanonto kaakuxa ikopo piili, emoha kinatteha Weerela ni ekina Wiiwanana, kinakukhulelano muhuwo.

⁸Kohaamaliha akukhuli araru mmweerini mmoha paahi. Muhuwo waakihovela ni Miyo kaakhulumuwano.

⁹Vano kaaheera: “Nkinkhalatho mukukhulaanyu. Yaale ankhwa, ekhweeke ni yaale anriheya, eriheyeke. Yaale eneera ehale ekhuuraneke.”

¹⁰Vano kaakuxa ekopwaaka yiitthaniwa Weerela, kinintaka, kimalihaka wiiraana kaapankaaka ni miloko sootheene.

¹¹Waamalihiwa nihuku nenenenne ni hiiho oohasuliwa a muhuwo yaakiweha yaasuwela weera yaari masu a Yave.

¹²Kaaweerela: Wooreerelani hiiho, mukiliveke; waahooreerelani, muhikilive.” Vano yaakiliva makhoobiri miloko miraru a eparatha*.

¹³Vanonto Yave aakeerela: “Mumvonyere yaawo namoopa” — nlivo nooreera awosa yaalakenlaaya! Miyo kaakuxa makhoobiri ale, kinamvonyera namoopa Mpaani mwa Yave.

¹⁴Vano kaahintaka ekopwaaka yanaaveeli yiitthaniwa Wiiwanana, kimalihaka hiiho wiiwanana variyari wa aYuda ni aYixrayeli.

¹⁵Vanonto Yave aakeerela: “Mukuxetho ikaruma sa mukukhuli oohikhalano miruku.

¹⁶Miyo kinoomukhaliha mukukhuli mweelaponi aneera ahitthukuruwele ikhondoolo sooriheya, naari ahaasaase yootaphuliwa, hata ahilamihe soovulala hoye hoye ahicihe seiye siri salaama, mene anaakhuure enama ya ikhondoolo sooreerelaxa, awottholaka nyettosaya.

¹⁷Ii! Wa mukukhuli oohisambwaneya mwa yoowo onghiya muhuwo! Ekatana evulalihe moonowaawe ni ethorole niithonawe noolopwana! Moonowaawe oriire woomalela ni niithonawe noolopwana nihoone woomalela!”