Read Makhuwa-Shirima Zakariya 12 Bible Online

Zakariya 12 - Makhuwa-Shirima bible

Zakariya 12

¹Ala ti masu a Yave mwaha wa aYixrayeli. Yave onkunga erimu, ompaceriha mathipelo a elapo ya vathi ni opattunxe munepa wa mutthu mpuwamwawe, vano Owo onghima:

²“Kinoopaka oYerusaleemu ekoomixi eneera eveveleihe miloko sa mukhwipimwaya. oYuda onooriciwa ni hiihotho oYerusaleemu.

³Vanihukuni nenenenno, miloko sootheene sa elapo ya vathi sithukumanneene weera siwaneno oYerusaleemu, Miyo kinootatuxa oYerusaleemu mwala woolemela wa miloko sootheene. Sootheene sineera seerere weemexa, sinoovulalaxa.

⁴Vanihukuni nenenenno kinoorukureeriha nyuru ikavalu* sootheene ni anamweettihaaya kinimwaapupurumiha,” onghima Yave. “Miyo kinookosoopa nnenesene ekhapira ya oYuda, mene kinoohela evaasi ikavalu* sootheene sa miloko.

⁵Vano ahooleli a aYixrayeli animwiixeerela: ‘Muloko wa oYerusaleemu ori woolipaxa niwoko Yave a ikuru sootheene ti Mulukwaaya.’

⁶Vanihukuni nenenenno kinoopakiha weera ahooleli a oYuda elikane ni niikho eriyari ya ikhuuni sincipale, ni ntoko muthuko ovarelaka eriyari ya ithatu. aYuda anoohisa woomalela miloko sa mukhwipimwaya sootheene, mene oYerusaleemu onookhala vanipuroniwaya woolipeene.

⁷Yave onoovuluxa toko woomaka wa oYuda weera nttittimiho na ekhapira ya Davide ni amaki a oYerusaleemu nihipwahe nno na oYuda.

⁸Vanihukuni nenenenno Yave onimwaakosoopa amaki a oYerusaleemu, moota wooweera oohilipaxa variyariwaya anaakhale ntoko Davide, ni ekhapira ya Davide eniikhale ntoko Muluku, ntoko ndyelo a Yave onaahoolela.

⁹Vanihukuni nenenenno kinimwaasa ophwata miloko sootheene sineera siwaneno oYerusaleemu.

¹⁰Kinooyeehera ekhapira ya Davide ni amaki a oYerusaleemu munepa wa oreera murima ni odyoonttelela. Awosa anookiweha — yoowo yaamuhommaaya — ni anoomwiinlela ntoko oniinlelaawe yoole okhwiiye mwaniye aari mmoharu ni ntoko onlalamikeliwaaya okhwa wa ntthaara.

¹¹Vanihukuni nenenenno olalamika oYerusaleemu onookhala otokotoko, ntoko wiinliwaaya oHadadi-Rimoni vanreyareyani na oMegido.

¹²Khula epuumba ya elapo enimwiinla; axaaraya mukhwipimwaya: epuumba ya ekhapira ya Davide ni axaaraya, epuumba ya ekhapira ya Natani ni axaaraya,

¹³epuumba ya ekhapira ya Leevi ni axaaraya, epuumba ya ekhapira ya Ximeyi ni axaaraya,

¹⁴ni ipuumba sootheene sikina vamoha ni axaaraya.”