Read Makhuwa-Shirima Zakariya 13 Bible Online

Zakariya 13 - Makhuwa-Shirima bible

Zakariya 13

¹“Vanihukuni nenenenno anaattuuttu anoopiluwela ekhapira ya Davide ni amaki a oYerusaleemu weera yaatteelihe mwa soottheka ni soohitteela.

²Vanihukuni nenenenno kinoomalamaliha mweelaponi masina a miluku soowootha ni seiyo khasuupuweleliwatho,” onghima Yave a ikuru sootheene. “Kinimwaavenxa mulaponi maprofeeti nitho munepa wa ohitteela.

³Vano mukina nlelo atthuna othalihera ntoko mprofeeti atithawe ni amayawe anoomweerela: ‘Muntthuneya okhwa niwoko mohootha mwa Nsina na Yave.’ Owo eerera opaka oprofeeti, asinaangolowaawe anoomuhomasa.

⁴Vanihukuni nenenenno maprofeeti ootheene animuulihiheya muru niwoko na nyoonelosaya sa oprofeeti. Awosa kheewara mukaandyo wa eprofeeti woopakiwa ni exapala weera elokotthe.

⁵Owo onimweera: ‘Miyo nkihiyono mprofeeti; kiri namalima; onkiciha olima okhuma emiravowaaka.’

⁶Mukina amukoha: ‘Mvulanle hai?' owo onimwaakhula: ‘Kivulalihiwe mpaani mwa asinthamwenaaka.’”

⁷“Ii! Ekatana, muvenye ni ngwaneke ni mukukhulaaka, yoowo ori mukhwaaka!” ongima Yave a ikuru sootheene.”Mummane mukukhuli ni muhuwo onoomwaraxeya ni kinimwaarukunuwela asikhaani.

⁸Mweelaponi yootheene,” onghima Yave, “mipatta miili sa miraru sinoohononasiwa, siriheyeke; vaheera mpatta mukinoowo onoohala.

⁹Mpatta wanaararu owo kinohela vayikho; kinootteelihamo ntoko eparatha*, aani ntoko eyuuma yoorikaxa. Awosa animwiitthana Nsinanaka ni Miyo kinoowaakhula, keeraka: ‘Awosa ti mulokwaaka’ ni awosa animweera: ‘Yave ti Mulukwaahu.’”