Read Makhuwa-Shirima Zakariya 14 Bible Online

Zakariya 14 - Makhuwa-Shirima bible

Zakariya 14

¹Moone, nihuku na Yave nnimoowa mwa nenno soohuhulasanyu sinookawaniwa variyariwanyu.

²Kinoothukumanyiha miloko sootheene weera siwaneno oYerusaleemu; esidade enookuxiwa, impasaya sinoohuhuliwa ni asithiyana anoopuheriwa. Eriyari ya amaki a esidade anooronghiwa ottai ootthukiweene, mene akinaawo kheeronghiwa.

³Vano Yave onookhuma awananeke milokosene seiyo, ntoko ongwanaawe vanihukuni na ekhotto.

⁴Vanihukuni nenenenno inaawosawe sinimweemela vasulu mwaako wa Sooliveira*, mpatta ninkhuma nsuwa wa oYerusaleemu. Vano mwaako owo onookawanyeya eriyariru okhuma mpatta ninkhuma nsuwa mpaka ninkelaayawo ni nnookhala nreyareya ntokotoko. Vanonto mpatta mmoha wa mwaako onoosusiheriwa mpatta wa ottuttuwani ni mpatta mukinoowo mpatta wa ohitto.

⁵Nyuwosa munootthawela oreyareyaniwaka, niwoko nno nnimwaataleya mpaka wAzeli. Munootthawa ntoko mwaatthangwaanyu otetereya mweehuhuni mwa Uziya, mwene a oYuda. Vano Yave Mulukwaaka onimoowa vamoha ni ootteelaawe ootheene.

⁶Vanihukuni nenenenno khooviha hata khooriira.

⁷Nnikhale nihuku noohilikanxereya, nihikhalanaka othana naari ohiyu — nihuku noosuweliwa ni Yave paahi. Naari wiilaleene onoomwaleeleya.

⁸Vanihukuni nenenenno nyooloko sinoopiluwa oYerusaleemu, mpatta mmoha wa seiyo sinrowa wa ephareiya ya ninkhuma nsuwa ni mpatta mukinoowo mpatta wa ephareiya ya ninkela nsuwa. Eyo enimweereya okhuma elimwe mpaka eyiita.

⁹Yave onookhala Mwene a elapo ya vathi yootheene. Vanihukuni nenenenno onookhala Yave mmoha ni Nsinanawe nimoharu paahi.

¹⁰Elapo yootheene okhuma oGeba mpaka oRimoni, mpatta wa ohitto wa oYerusaleemu enookhala ntoko wAraba. Vaheera oYerusaleemu onookhalihiwa ni onookhala vanipuroniwaya, okhuma mulako wa Benyamini mpaka nipuro waaraayawo Mulako Woopacera, mpakatho Mulako wa oNloothoni ni okhuma etoore* ya Hananeli mpaka nipuro emvottiwa eviinyu ya mwene.

¹¹oYerusaleemu onoomakiwa; khoorwaru ophwatiwa. Iwo onookhala woolipeene.

¹²Nihooxo mwa nenno Yave aneeraawe attaruxele miloko sootheene singwananne Yerusaleemu ti nna: irutthusaya sinimuntta yeemelelo; maithwaaya animuntta mpuurunimwaya ni malumaaya animuntta mmwaanomwaya.

¹³Vanihukuni nenenenno Yave onootannyera munyakunyaku mutokotoko. Khula mutthu onoongwanano mutthu ori mukhwipimwawe.

¹⁴oYuda onoowananotho oYerusaleemu. Mihakhu sa miloko soowaattamela sootheene sinoowawaanyiwa — eyuuma yoorikaxa, eparatha* ni ikuwo sincipalexa.

¹⁵Nihooxo nenenenno nnoohasula ikavalu*, abuuru ootheene, ikamelu* ni axinama ootheene a miloko iyo.

¹⁶Vano yaale eneera ehale variyari wa miloko saawananne oYerusaleemu anoorowa khula eyaakha weera yamulape Mwene, Yave a ikuru sootheene, ni weera yapake Efesta ya Mmikotthani.

¹⁷Mukina a miloko sa mulaponi aahirowa oYerusaleemu weera amulape Mwene, Yave a ikuru sootheene, vano owo kheenimurupela epula.

¹⁸awExiputu yaahirowa oYerusaleemu weera yapakele mpatta, awosa khayaarupela epula. Vano Yave onimwaarumihela nihooxo mwa nenno aneeraawe ahooxere miloko sineera sikhootte orowa opakano Efesta ya Mmikotthani.

¹⁹Aani nno nnikhale nttaruxo wa awExipitu ni miloko sootheene sineera sihirowe opakano Efesta ya Mmikotthani.

²⁰Vanihukuni nenenenno “OOTTEELIHERIWA YAVE” anoolempwa mungilingilini sa ikavalu* ni nyaapu sa Mpaani mwa Yave sinootteelihaxiwa ntoko siraaya ibasiya sootteela ohoolo wa altaari*.

²¹Khula mwaapu wa oYerusaleemu ni oYuda onootteeliheriwa Yave a ikuru sootheene ni ootheene eneera erwe weera epake yooveleela anookuxa nyaapu sikina, yaapeyekemo. Vanonto okhuma nihuku nenenenno kheekhalatho ananakoso Mpaani mwa Yave a ikuru sootheene.