Read Makhuwa-Shirima Zakariya 2 Bible Online

Zakariya 2 - Makhuwa-Shirima bible

Zakariya 2

¹Vano miyo kaaweha ni aakhalawo ohoolowaka mulopwana avarenleene efiiyu yooringelano.

²Miyo kaamukoha: “Munkela woowi?” Owo aakaakhula: “Kinkela oringa oYerusaleemu weera kisuwele mweerakamelonimwaya ni mweekhuveelonimwaya.”

³Vano ndyelo uuluma ni miyo aapwaha ni ndyelo mukina aarowa omukumanano,

⁴anamweerela: “Mutthimake ni mwamuleele mmiravo ole: ‘oYerusaleemu eniikhale esidade yoohikhalano ixiri niwoko na waatta wa atthu ni mihuwo.

⁵Vano Yoomeene kinookhala exiraaya ya mooro mukhwipimwaya, onghima Yave, ‘ni mpuwamwaya kinookhala ovuwawaya.’

⁶Ngweeke, ngweeke, mutthawe mweelaponi ya ottuttuwani,” onghima Yave, “niwoko kohoomwaraxelani mipatta mixexe sa mulaponi, onghima Yave.

⁷Ngweeke, oSiyoni, mutthawe, nyuwo munkhala mwa mwaana muthiyana a oBalilonia!”

⁸Vano Yave a ikuru sootheene oneera ha: “Owo okirumihenle ohokoloxera ovuwawawe variyari wa miloko soohuhunleni, niwoko ootheene aneera ootannyeni onimweera wiitutha.

⁹Vekhaikhai miyo kinootheteela matata miloko moota wooweera ipotthasaya sinimwaahuhula. Vano munoosuwela weera Yave a ikuru sootheene ti okiruminghe.

¹⁰Mukhuwele ni muhakalale, mwaana muthiyana a oSiyoni! Niwoko kinrwa woopakani woomakawaka,” onghima Yave.

¹¹“Miloko sincipale sinoothukumanyihiwa nihuku nenenenno ni Yave, sithatuwaka mulokwaaka. Miyo kinookhala variyariwanyu ni munoosuwela weera Yave a ikuru sootheene ti okiruminghe wa nyuwo.

¹²Yave onookuxa oYuda ntoko yoohiyeraawe mweelaponi yootteela, ni onoothanlatho oYerusaleemu.

¹³Omutthu wootheene omaaleke vamaithoni wa Yave, niwoko oovenya vaNipuroninawe Nootteela*.”