Read Makhuwa-Shirima Zakariya 7 Bible Online

Zakariya 7 - Makhuwa-Shirima bible

Zakariya 7

¹Vanihukuni nanaaxexe na mweeri wanaathannaaxexe (oniitthaniwa Kisilevi), vayaakhani yanaaxexe ya olamula wa Dariyu, Yave aahuuluma ni mprofeeti Zakariya.

²Yeereiye amaki a oBeteli yaamurumihalaaya Zarezeri ni Regemi-Meleki vamoha ni asilopwanaaya weera emudyoonttelele Yave,

³yaavekelaka asaserdoti* a Empa ya Yave a ikuru sootheene ni maprofeeti: “Nilalamikeke ni nitthukeke mmweerini wanaathanu ntoko nimpakaahu iyaakha sootheene?”

⁴Vano Yave a ikuru sootheene aahuuluma ni miyo akeerelaka:

⁵“Mwaakohe atthu ootheene a elapo nitho asaserdoti*: ‘Nyuwosa mwaatthukaka ni mwaalalamikaka mmweerini wanaathanu ni wanaathannamiili iyakhasene seiye miloko mithannamiili sivinre, vekhaikhai mwaakipakela Miyo?

⁶Ni mwaacaanyu ni mwaawuraanyu, khamwiipakela asineenaanyu?

⁷Ankha masu Yave aalaleiyaawe mwa maprofeeti a khalayi ehuhuweene yeele oYerusaleemu ni mittetthe sa mukhwipimwaya saaraaya ngwiitthuuwani ni moopuhani ni oNegeba ni ilapo sa vathi wa nyaako saahiitekiha?’”

⁸Yave aahuulumatho ni Zakariya amweerelaka:

⁹“Yave a ikuru sootheene oneera ha: ‘Mpake ekhaikhai moota woororomeleya, mmorelaneke ikharari, mooniheranaka murima wooreera.

¹⁰Muhaahasule asinaamukhweli hata akwaasuni, anamarwa hoye hoye oohaawa. Muhuupuwelelaneke soonanara.’

¹¹Vaheera yaakhootta opwattha; ni murima woowuuma yaahoorerani ettuli, ekhalaka attiyamaaru.

¹²Yaahuumiha mirimasaya ehitthunaka wiiwa malamulo hata masu Yave a ikuru sootheene uulumaawe mwa Munepaawe mmwaano mwa maprofeeti a khalayi. Tivawo Yave a ikuru sootheene aanyoonyaxiwaawe.

¹³‘Miyo kaawiitthanaaka, awosa khayaatthunne wiiwa; tivawo awosa yaakiitthanaka, Miyo kihingwiiwaakatho,’ onghima Yave a ikuru sootheene.

¹⁴‘Kaahaamwaraxela muyuupuruni variyari wa miloko, mwa weiwo yaakhalaayawo ntoko anamarwa. Elapo yaahiiwa yoothaamiweene moota wooweera khaawo aawera ophutulamo. Ti hiiho yaatatunxaaya milepe elapo yooreera.’”