Read Makhuwa-Shirima Zakariya 8 Bible Online

Zakariya 8 - Makhuwa-Shirima bible

Zakariya 8

¹Yave a ikuru sootheene aahuulumatho ni miyo akeerelaka:

²“Yave a ikuru sootheene oneera ha: ‘Miyo kookhalela ehace oSiyoni; aani kookhalelaxa ehace weiwo.’

³Yave oneera ha: ‘Kinghokoleela oSiyoni, kakhaleke oYerusaleemu. Vano oYerusaleemu onimwiitthaniwa esidade ya ekhaikhai ni mwaako wa Yave a ikuru sootheene onimwiitthaniwa mwaako wootteela.’

⁴Yave a ikuru sootheene oneera ha: ‘Anamuuluvala asilopwana ni asithiyana eniikilaathitho mmuseweni mwa oYerusaleemu, khula mutthu a yaawo areeneno muttonttwaawe niwoko na wuuluvalawaya.

⁵Misewe sa esidade sinoosareya amiravo ni aximwali etheelakawo.’

⁶Yave a ikuru sootheene oneera ha: ‘Wa yaale eniihalahale a mulokwaaka apaale enimwaakhalela ntoko yoohiwereya, mene khoohiyoni wa Miyo,’ onghima Yave a ikuru sootheene.

⁷Yave a ikuru sootheene oneera ha: ‘Kinimoopola mulokwaaka mweelaponi sa ninkela nsuwa ni ninkhuma nsuwa.

⁸Miyo kinimwaahokoloxera weera ekhale oYerusaleemu; awosa anookhala mulokwaaka ni Miyo kinookhala Mulukwaaya moororomeleyani ni mweekhaikhaiyini.”

⁹Yave a ikuru sootheene oneera ha: ‘Nyuwosa muniiwa masu ala olelo ahimmwale ni maprofeeti yaapaceriwaaya mathipelo a Empa ya Yave a ikuru sootheene, mukhale nyoono wii weera Empa ya Yave etekiwe.

¹⁰Vano, ehinaaye ehuhu ele, khanaariworu nlivo wa mutthu hoye hoye mwaamunama. Khaawo aampaka nakoso oolipeene niwoko na awananaawe keenre Miyo kangwanawaniha mukina ni mukhwaawe.

¹¹Vaheera nkaapakelatho yaale ahalahanle a muloko ola ntoko kaapankaaka khalayi,’ onghima Yave a ikuru sootheene.

¹²Onimwaattaxa mmiso ni imatta sa iwuuva* sinooruwera soowiimasaya, etthaya enooruwera soohephasaya ni erimu enimwiimiha nikame. Kinimwaavaha itthu sootheene iya yaawo ahalahanle a muloko ola.

¹³Ii! Yuda ni Yixrayeli, mooteene yoowo mwaalaphiwaanyu variyari wa miloko, hiihotho Miyo kinimoovuluxani ni munookhala nreeliho. Muhoove ni mukhale toko oolipeene.’

¹⁴Yave a ikuru sootheene oneera ha: ‘Mooteene yoowo kaalakenlaaka woottaruxani kihoomorelakani ikharari ehuhuweene yeele makholowaanyu yaakinyoonyihalaaya,’ onghima Yave a ikuru sootheene,

¹⁵‘hiihotho vano koolakela opakela nnene oYerusaleemu ni oYuda. Muhoove.

¹⁶Itthu sintthuneya opaka ti iya: Muulumelaneke ni muthorihe ekhaikhai munuulumaanyumo milattu.

¹⁷Muhimuvaanelele yoonanara mwaattamanaanyu hata muhisivele olipela moota woowootha. Miyo kinthanya itthu sootheene iya,’ onghima Yave.

¹⁸Emaara ekinatho Yave aahuuluma ni miyo.

¹⁹Yave a ikuru sootheene oneera ha: ‘Otthuka wa mweeri wanaaxexe, wanaathanu, wanaathannamiili ni wanaamuloko onoothatuwa ihuhu soohakalalaxa ni ifesta soosareya ohakalala wa oYuda. Tivawo, musivele ekhaikhai ni murettele.’

²⁰Yave a ikuru sootheene oneera ha: ‘Atthu ancipale ni amaki a isidade sincipale animoowa,

²¹ni amaki a esidade emoha anoorowa wa ekina yeereke: ‘Niroweke khuluwi weera namudyoonttelele Yave ni namwaase Yave a ikuru sootheene. Miyo muneenaaka kineera kirowaka.’

²²Vano miloko sincipale ni sooweraxa sinimoowa oYerusaleemu weera simwaase Yave a ikuru sootheene ni simudyoonttelele.’

²³Yave a ikuru sootheene oneera ha: ‘Vanihukuni nno asilopwana a miloko ni muulumo oohiyanahiyana anoovarexexa mooxoriwa mwa mukaandyo wa muYuda mmoha, emweerelaka: Munitthunihere orowa ni nyuwo, niwoko nohiiwa weera Muluku ori ni mulokwaanyu.’”