Read Makhuwa-Shirima Zakariya 9 Bible Online

Zakariya 9 - Makhuwa-Shirima bible

Zakariya 9

¹Wooperera wa Yave ti wa elapo ya Hadraki ni onoomorela oDamasku. Vano maitho a Yave angweha omutthu wootheene ni wa ipuumba sootheene sa oYixrayeli,

²oHamati ohelanne mwiinano ni oDamasku, angwehatho oTiro ni oSidoni arookhalaru aneettottho.

³oTiro wohiitekela nipuro noolipaxa; woothukumanyiha eparatha* ntoko ntthupi, ni eyuuma yoorikaxa ntoko nttoko na mmiseweni.

⁴Vaheera Yave onoovenxa mihakhusaya, aphwatelaka mphareiyani ni vano onoolalihiwa ni mooro.

⁵wAxekeloni onimoona yeeyo, wooveke. oGaza onootteenguwaxa ni hiihotho wEkroni, niwoko owehererawaya onoolakaseya. oGaza onoohiiwa woohikhalano mwene ni wAxekeloni onoothaamiwa.

⁶Anamarwa anookuxa wAxidoti ni Miyo kinoomaliha wiikuxa wa aFilisti.

⁷Kinimuukuttha ephome owanoniwaya; yooca yoohitthuniheriwa mmainonimwaya. Yaale eneera ehale, anookhala a Mulukwaahu, ethatuwaka asitokweene a oYuda ni wEkroni onoolikana aYebusi.

⁸Kinimwaakiha Empaaka mwa anamahuhula. Namahasula kharwatho ahasula mulokwaaka, niwoko vano Miyo kinoona yeeyo ni maithwaaka.

⁹Muhakakalaxe mwaana muthiyana a oSiyoni; mukhuwele mwaana muthiyana a oYerusaleemu! Moone, mwenaanyu ongwaattamelani, oororomeleya ni oowineene, a murima woomaaleleya ni angwenleene buuru, aani mwaaxaana a buuru muthiyana.

¹⁰Owo onoophwata ikaaro sa ekhotto sa wEfrayimi, ikavalu* sa ekhotto sa oYerusaleemu ni nyuura sa ekhotto sinimwintakiwa. Owo onoolaleera murettele wa miloko, alamulaka okhuma ephareiya ni ephareiya; okhuma mooloko Efratesi mpaka ekotenle elapo.

¹¹Mwaha wa nyuwo — niwoko na ephome ya wiiraanawaka ni nyuwo — kinoowoopola anamatthukiwaanyu muhimeni moohikhala maahi.

¹²Ii!, anamatthukiwa oosareya oweherera, muhokoleele vanipuroniwanyu noolipihiwaxa. Vaanaanova kinlaleiya weera kinimoorehererelani sootheene moota wa iphura.

¹³Miyo kaakungaka oYuda ntoko onkungeliwaaya muura, kivarelaka muteko wEfrayimi ntoko muupa, kinoopakiha weera anamwane asilopwana a oSiyoni yaavenyere anamwane asilopwana a oGresiya ni kinoopaka oSiyoni ntoko ekatana ya nakhotto ooweraxa.

¹⁴Vano Yave onimwiixoonihera wa yaawo; muupaawe onootutha ntoko overinya. Yave onlamula sootheene onimwiipa nipalapatta; Owo onimweetta mutthekuni ya ohitto;

¹⁵ni Yave a ikuru sootheene onoowaakiha. Awosa anoonyikalela ni anoophwata ni ekhwambala. Awosa anoowura ephome ya amwiittana ntoko ereene eviinyu; anookhala oosareyeene ntoko ebasiya yoovuuvihera mmaloothoni mwa altaari*.

¹⁶Yave Mulukwaaya onimwaavuluxa vanihukuni nenenenno ntoko Mukukhuli omvuluxaawe ikhondoolosawe. Awosa animwaara mweelaponimwawe ntoko maluku oowaaraxa mucireembani.

¹⁷Ii! Anookhala ooreeraxa ni oophwaneliwaxa! Etrigu enimwaavaha ikuru amiravo, ni hiihotho eviinyu enyowani aximwali.