Read Makhuwa-Shirima Matheyo 10 Bible Online

Matheyo 10 - Makhuwa-Shirima bible

Matheyo 10

¹Awiitthanaka oohuseraawe muloko neeli, aahaavaha ikuru soowoomola minepa soonanara ni soolamiha iretta ni ikwerere.

²Ala ari masina a arummwa muloko neeli: Simeyoni (iitthaniwa Pedru) ni munneiye Andreiya; Yakobe, mwaana a Zebedeyo, ni munneiye Yohaane;

³Filipe ni Bartolomeyo; Tomaxi ni Matheyo, namaliviha a musoko; Yakobe, mwaana a Alfeyu, ni Tadaiyo;

⁴Simeyoni nanthiti, ni Yudasi Iskariyoti, yoowo aamvarihale Yeesu.

⁵Yeesu aahaarumiha muloko neeli ni malamulo ala: “Muhirowe wa amalapo, naari muhivolowe esidade emoha ya aSamariya.

⁶Murowe toko wa ikhondoolo siriheiye sa oYixrayeli.

⁷Munrowaanyuwo, mwalaleiye mutthenga ola: ‘omwene wa wiirimu wookhuveela.’

⁸Mwaalamihe aretta, mwaavenyererihe akhwiiye, mwaalamihe anamakokho, moomole minepa soonanara. Nyuwo mohaakhela ya mahala, vano muvahetho ya mahala.

⁹Muhikuxe itthu sooreeraxa mulaambanimwanyu;

¹⁰muhikuxe mirupa sa ekwaha, hata mikaandyo miili, naari ikwakwaatta, naari ttootto, niwoko namuteko omphwanela yoocaawe.

¹¹Mwaaphiyaka musidade, hoye hoye mmuttettheni, mwamwaasaase mutthu oophwanela, ni mwakhale owannyawe mpaka opwaha.

¹²Mwaavolowaka mpaani, mwawuulumihe atthu ari mwemmo.

¹³Atthu a vaate yakhala oophwanela, murettelaanyu wakhale ni yaawo; yaahikhalatho, murettelaanyu woohokoleeleni nyuwo.

¹⁴Mukina aahiwaakhelelani, hata aahiiwa maswaanyu, mwatathe ntthupi na inaawosanyu mwaakhumaka vaatewawe, hoye hoye esidade eyo.

¹⁵Miyo kinooleelani ekhaikhai: vanihukuni na othorihiwa onuukhale ohaawa wootepaxa wa esidade eyo opwaha wa oSodoma ni oGomora.

¹⁶Miyo kinoorumihani ntoko ikhondoolo variyari wa miici. Tivawo, mukhale ni miruku ntoko inowa, ni oohikhalano milattu ntoko ikhunda.

¹⁷Mwiipasoope ni alopwana. Awo eniyooveleeleni wa alipa oowuuluma milattu ni eniyoowaxuleni muSinagoganimwaya*.

¹⁸Niwoko na Miyo, nyuwo mmwikuxiwe muronghiwaka vamaithoni wa maguvernadori ni mamwene, weera mwakhaleliwe onamoona wa yaawo ni wa amalapo.

¹⁹Yootthukani, muheeteteele moota, naari seiyo muneeraanyu muulume. Emaareene yeeyo mmwivahiwe nyuwo itthu soowuuluma,

²⁰niwoko khamuhiyono nyuwo muneera muulume, mene Munepa wa Atithinyu oneera wuulume mwa nyuwo.

²¹Mutthu anaamvaherere munneiye weera iiviwe, ni atiithi mwanaya. Anamwane eniyaapittikuwele asinaangolo ni eniiwiive.

²²Atthu ootheene eniyoothanyeeni niwoko na Miyo, mene yoowo anaavilele mpaka ommaleloni, anaavuluxiwe.

²³Nyuwo yoosoondakani musidadeni emoha, mutthaweleke ekina. Miyo kinoororomelihani weera Mwaana a mutthu anaawe nyuwo muhinaaye ovira isidade sootheene sa oYixrayeli.

²⁴Khaawo oohusera onimpwaha muhusihaawe, hata murumeiyi khanimpwaha yoowo onimurumeelaawe.

²⁵Oohusera ori ntoko muhusihaawe paahi, ni murumeiyi ntoko yoowo onimurumeelaawe. Mwaneene vaate iitthaniwa Beelzebuli, wootepaxa atthu a emusaawe!

²⁶Tivawo, muhiwoove yaawo. Itthu sootheene soowiipithiheiya nsooneiye, ni itthu sootheene sookhuneeliwa, nsisuwelihiwe.

²⁷Yeeyo kinooleelaakani mpiphini, muulume ni waara wa othana, ni masu anaapiwa mmaaruni, mulaleiye mmapathoni.

²⁸Muhiwoove yaawo aniiva erutthu, mene ehiweraka wiiva munepa. Mmoove toko Yoowo ongwera ophwata erutthu ni munepa mmooroni.

²⁹Khaanthumihiwa masiri meeli ni nikhoobiri nimoha? Wa soothesene, khaawo mmoha a yaawo ommorela vathi ehisuwelaka Atithinyu.

³⁰Mpaka mayihi a mmurumwanyu wootheene ari oowaalikeliwa.

³¹Vano, muhiwoove; nyuwo muri ootthuneyaxa opwaha masiri mancipale!

³²Yoowo onkilapa Miyo variyari wa atthu, Miyo nkimuromoletho yoowo ohoolo wa Atithaka ari wiirimu.

³³Vaheera yoowo onkikhootta Miyo variyari wa atthu, Miyo nkimukhoottetho ohoolo wa Atithaka ari wiirimu.

³⁴Muhuupuwele weera kirweenle oruuha murettele vathi. Nkirweenle oruuha murettele, mene ekatana.

³⁵Vano, kirweenle ohimwiiwananiha mwaana ni atithawe, mwaana ni amayawe, ootheliwa ni pwiyamwaanaawe,

³⁶amwiittanaawe mutthu eniikhale yaawo a vaatevawe.

³⁷Yoowo onaasivelaxa atithawe, hoye hoye amayawe wookipwaha Miyo, khakiphwanenle Miyo. Yoowo onaasivelaxa anamwanaawe wookipwaha Miyo, khakiphwanenle Miyo.

³⁸Yoowo ohinkuxa muttandaawe ni ohinkitthara Miyo, khakiphwanenle Miyo.

³⁹Yoowo onthokorora okumaawe, anaarihe yoowo, mene yoowo onriha okumaawe niwoko na Miyo, anaaphwanye yoowo.

⁴⁰Yoowo ongwaakhelelani nyuwo, onkaakhelela Miyo, ni yoowo onkaakhelela, ongwaakhelela Yaawo akirumihale.

⁴¹Yoowo ommwaakhelela mprofeeti niwoko ori mprofeeti, anaakhele ntthuvelo na mprofeeti, ni yoowo ommwaakhelela mutthu oororomeleya niwoko ori oororomeleya, anaakhele ntthuvelo na mutthu oororomeleya.

⁴²Yoowo anaavahe, hata ekhalaka ekoomixi ya maahi ooriira wa mmoha a asikhaani ala niwoko owo ori oohuseraaka, Miyo kinoororomelihani vekhaikhai weera owo anaakhele ntthuvelonawe.”