Read Makhuwa-Shirima Matheyo 11 Bible Online

Matheyo 11 - Makhuwa-Shirima bible

Matheyo 11

¹Amalihaka waavaha malamulo ala oohuseraawe muloko neeli, Yeesu aarowa oxuttiha ni olaleiya mmittettheni sa oGalileiya.

²Yohaane iiwalaawe okaliposo yeeyo Kristu aapakaawe, aahaarumiha oohuseraawe weera yaamukohe:

³“Ti nyuwo Yoole eera awe, hoye hoye ningweherereke mukina?”

⁴Yeesu aawaakhula: “Muhokolowe ni mwamuleele Yohaane seiyo muniiwaanyu ni munoonaanyu:

⁵atthu oohoona animoona; atthu oorakala animweetta; anamakokho anoolamihiwa; atthu oohiiwa animwiiwa; akhwiiye anoovenyererihiwa, ni masu ooreeraxa anoolaleeriwa oohaawa

⁶ni ooreelihiwa ti yoole ohinkihovela Miyo.”

⁷Evenyaka oohusera a Yohaane, Yeesu aapacera wuuluma wa atthu ancipale mwaha wa Yohaane: “Eheeni nyuwo mwaarongwaanyu woona munikareni? Ettheere etannyiwaka ni epheyo?

⁸Eheeni mwaarongwaanyu woona? Mulopwana awanreene ikuwo sooreeraxa? Moone, yaawo angwara ikuwo sooreeraxa ari mpaani mwa mamwene.

⁹Vatthuva, eheeni mwaarongwaanyu woona? Mprofeeti? Aani, Miyo kinooleelani, ompwaha mprofeeti.

¹⁰Ole ti yoole mwaha wa yoowo olempwe: “Miyo nkimurumihe murummwaaka ohoolowanyu; owo anaareherere ephirowaanyu ohoolo wa Nyuwo.”

¹¹Miyo kinooleelani ekhaikhai: Variyari wa atthu ooyariwa ni asithiyana, khaawo mukina okhumelenle mutokweene ompwaha Yohaane mpatisa. Wa soothesene, ooyevaxa wa omwene wa wiirimu ti mutokweene ompwaha yoowo.

¹²Okhuma ehuhu ya Yohaane mpatisa mpaka olelo, omwene wa wiirimu waawaneliwa ni atthu a owali, ni yaawo angwanela antthuna ovara yoowo.

¹³Mpaka ehuhu ya Yohaane, maprofeeti ni malamulo yaathalihera otthuna wa Muluku.

¹⁴Vano, nyuwo mwatthuna waakhulela — owo ti Eliya eera awe.

¹⁵Yoowo orino maaru, iiwe!

¹⁶Ni heeni kineeraaka kilikanxere ekhapira ela? Eri ntoko anamwane ekilaantheene omerekadu ni ekhuwelelanaka:

¹⁷“Hiyo noowiipelani mpetta, mene nyuwo khamwiinale; naahiipa ncipo noolalamika, mene nyuwo khamwiinlale.”

¹⁸Aahoowa Yohaane ahicaaka ni ahiwuraka, ni atthu aneera: ‘Owo ookhalano munepa woonanara.’

¹⁹Aahoowa Mwaana a mutthu acaaka ni awuraka, ni atthu aneera: ‘Ori vawo Namaca ni Namawura, Nthamwene a anamaliviha a musoko ni namattheka.’ Miruku sinaakhuleliwa ni mitekosaya.”

²⁰Vano Yeesu aapacera ottaruxa ni masu isidade weiwo aapankaawe sootikhiniha sincipale soopwaha mapuro makina, niwoko khasaarukunxale murima, eeraka:

²¹“Ii! Onoohaawa weyo, Khorazini! Ii! Onoohaawa weyo, Bethesayida, niwoko sootikhiniha Miyo kaapankaaka mwa weyo kaapanke oTiro ni oSidoni, atthu a oTiro ni oSidoni khalayi saano erukunxaleene murima, ewanreene ikuwo sa esaakho ni ekilaantheene vattuurani.

²²Miyo kinooleelani: nihuku na othorihiwa nnikhale nootepaxa wa weyo opwaha oTiro ni oSidoni.

²³Ni weyo, Kafarnawu, onuupuwela weera onookuxiwa mpaka wiirimu? Hoye! Onuukhuruwe mpaka oHadesi*! Miyo kaapanke sootikhiniha oSodoma kaapankaaka mwa weyo, esidade ele saano ekhanleene mpaka olelo.

²⁴Miyo kinooleelani: nihuku na othorihiwa nnikhale nootepaxa wa weyo opwaha oSodoma.”

²⁵Ehuhuweene yeele, Yeesu aaheera: “Miyo kinootthapelani Nyuwo, Atiithi, Apwiya a wiirimu ni vathi, niwoko mohaavithera itthu iya asuweli ni anamiruku, ni mwaawoonihera asikhaani.

²⁶Aani Atiithi, vano eyo yohoosivelihani.

²⁷Itthu sootheene kivahereriwe ni Atithaka. Khaawo amusuwenle Mwaana, ehikhanle Atiithi, ni khaawo aasuwenle Atiithi ahikanle Mwaana ni yaale Mwaana ontthunaawe owoonihera Atiithi.

²⁸Ngweeke wa Miyo, ootheene nyuwo mukhulumungwe ni mulemelingwe yoolemela, ni Miyo nkoovaheeni wiitthuuwa.

²⁹Mwiikumanyihe ni Miyo ni muxuttere wa Miyo, niwoko kiri Oomaala murima ni Oowiiyeviha, ni nyuwo mmwiphwanye wiitthuuwa wa okumaanyu.

³⁰Vano, yoolemelaaka ti yooveruwa, ni murindaaka woohilemela.”