Read Makhuwa-Shirima Matheyo 16 Bible Online

Matheyo 16 - Makhuwa-Shirima bible

Matheyo 16

¹Afarasi* ni aSaduki* yaamwaattamela Yeesu ni yaapacera omweerera, emvekelaka weera awoonihere eneneero ya wiirimu.

²Vano Yeesu aawaakhula: “Oxekuwa waawaaka, nyuwo muneera: ‘Enookhala ehuhu yooreera, niwoko erimu eri yooxeera’

³ni ohinaxe muneera: ‘Olelo eniikhale epheyo etokotoko niwoko erimu eri yooxeera ni yoosareya mahutte.’ Nyuwo moosuwela otaphulela ineneero sa wiirimu, mene khamusuwenle otaphulela ineneero sa ihuhu!

⁴Ekhapira yoonanara ni yooraruwa emvekela eneneero yootikhiniheiya, mene kheemvahiwa naari eneneero emoha, ehikhanle eneneero ya Yoonasi!” Vano Yeesu aavenya, aahiyaka ale vaavaale.

⁵Oohusera erowaka okhopela wa ephareiya, yaattiwala okuxa ipaawu.

⁶Yeesu aaweerela: “Mukhale oowehaweha ni mwiipasoope ni eferementu ya afarasi* ni aSaduki*.”

⁷Ni awo yaaheerelana yaaworu yeeraka: “Niwoko khaniruuhale ipaawu.”

⁸Iiwaka wuulumawaya, Yeesu aahaakoha: “Asilopwana a nroromelo vakhaani! Niwoko heeni nyuwo munuulumaanyu mwaha muhikhalannaanyu ipaawu?

⁹Nlelo khamuniiwexexa? Khamunuupuwelela ipaawu ithanu wa atthu macira miloko mithanu ni mipapara mihayi mwaattottannyaanyu?

¹⁰Hata ipaawu ithannapiili wa atthu macira miloko mixexe ni mipapara mihayi mwaattottannyaanyu?

¹¹Niwoko heeni nyuwo muhiiwexenxaanyu weera khayaahiyono ya epaawu Miyo kihimmaaka! Mwiipasoopetho ni eferementu ya aFarisi* ni aSaduki*.”

¹²Vano yaahiiwexexa weera Owo khaahima wiipasoopa ni eferementu ya ipaawu, mene ni nihusiho na afarasi* ni aSaduki*.

¹³Yeesu aphiyaka elapo ya oSesareya wa oFilipi, aahaakoha oohuseraawe: “Atthu aneera, Mwaana a mutthu ori taani?”

¹⁴Awo yaamwaakhula: “Akina aneera Yohaane mpatisa, akina Eliya, ni akinatho Yeremiya, hoye hoye mprofeeti mmoha.”

¹⁵Yeesu aahaakoha: “Ankha nyuwo — munkeera Miyo taani?”

¹⁶Simeyoni Pedru aamwaakhula: “Nyuwo ti Kristu, Mwaana a Muluku Mukumi.”

¹⁷Yeesu aamwaakhula: “Ooreelihiwa ti nyuwo Simeyoni, mwaana a Yoonasi, niwoko yeeyo khamuleeliwe ni mutthu, mene ni Atithaka ari wiirimu.

¹⁸Ni Miyo kinooleelani weera nyuwo ti Pedru, ni vanlukuni nna kinooteka ekerexaaka, ni milako sa oHadesi* khasirwa siwera owina ekerexa ela.

¹⁹Miyo nkoovaheeni ixaavi sa omwene wa wiirimu. Yeeyo muneeraanyu mutthuke vathi, eniitthukiwetho wiirimu, ni yeeyo muneeraanyu mutaphule vathi, eniitaphuliwetho wiirimu.”

²⁰Vano aawooperera oohuseraawe weera ehimuleele naari mutthu mmoha weera Owo ti Kristu.

²¹Okhuma ehuhuweene yeele Yeesu aapacera waathalihera oohuseraawe weera waatthuneya orowa oYerusaleemu ni ohaawa itthu sincipale niwoko na asitokweene, ahooleli a asaserdoti*, ni anamawera a nlamulo*, nitho okhwa ni ovenyerera nihuku nanaararu.

²²Pedru amwiitthanaka Yeesu okhwipi, aapacera omooperera: “Hoye Apwiya! Iyo khasiweereelani!”

²³Yeesu aarukunuwa ni aamweerela Pedru: “Osuseke wa miyo, Satana! Weyo ti nluku ninkikwattula, ni khoonuupuwela itthu sa Muluku, mene sa atthu.”

²⁴Vano Yeesu aaweerela oohuseraawe: “Akhala mukina ontthuna okitthara Miyo, iikhootte muneenaawe, akuxe muttandaawe ni akitthare.

²⁵Yoowo ontthuna ovuluxa okumaawe, anaayeleele, mene yoowo ongyeleela okumaawe niwoko na Miyo, anaaphwanye.

²⁶Yooreera heeni mutthu ophwanya elapo yootheene ya vathi, ayeleelakatho okumaawe? Hoye hoye anaavahe eheeni mutthu yoowaakakhanyiha ni okumaawe?

²⁷Mwaana a mutthu anaawe moovuwani wa Atithawe ni andyelowaaya, ni anaamutthuvele khula mutthu wa yeeyo owo opankaawe.

²⁸Miyo kinoororomelihani weera akina ari va, khaanrowa okhwa ehinaaye omoona Mwaana a mutthu awaaka moomwenenimwawe.”