Read Makhuwa-Shirima Matheyo 19 Bible Online

Matheyo 19 - Makhuwa-Shirima bible

Matheyo 19

¹Amalihaka ohima itthu seiye, Yeesu aavenya oGalileiya ni aarowa elapo ya oYudeiya, okhopela wa oYordanu.

²Atthu ancipale yaamutthara, ni Owo aahaalamiha weiwe.

³aFarisi* akina yaamwaattamela Yoowo weera emweerere. Yaamukoha: “Enootthunihereiya wa mutthu omuhiya mwaarawe mwaha wa wakhalaru mulattu?”

⁴Owo aawaakhula: “Nyuwo khamusomme weera ompacereroni, Mpattuxa aampaka mulopwana ni muthiyana?

⁵Owo eenre: ‘Tivawo, mulopwana anaahiye atithawe ni amayawe, ni anaakhale vamoha ni mwaarawe, ni ooweeli eniikhale erutthu emoha.’

⁶Hiiho, khaakhanle eeli, mene vekhaikhai erutthu emoha paahi. Tivawo, yaawo Muluku aakhalinghaawe vamoha, mutthu ahaamwalanyihe!”

⁷Awo yaamukoha: “Vano, niwoko heeni Moisesi aalamunlaawe weera mulopwana amvaheke ekaratta ya omwalana wa muthiyana ni amoomoleke?”

⁸Yeesu aawaakhula: “Moisesi aahootthuniherani omwalana ni axaarinyu niwoko na mirimasanyu soowuuma. Khawaakhanletho hiiho okhuma ompacereroni.

⁹Miyo kinooleelani weera khula mulopwana ommwalana ni mwaariye, ohikhanle mwaha wa oraruwa, anamuthela muthiyana mukina, onooraruwano.”

¹⁰Oohusera yaamweerela: “Waari hiiho nyaha sa mulopwana ni mwaariye, fataari ohithela.”

¹¹Yeesu aawaakhula: “Khaahiyono ootheene angwera waakhela masu ala, mene yaawo paahi avahiwe yeeyo.

¹²Akina ari inoko* niwoko ayariwe hiiho. Akina apakiwe hiiho ni atthu, akinatho yiipakiye yeeyo niwoko na omwene wa wiirimu. Yoowo ongwera waakhela yeeyo, aakhele.”

¹³Vahoolowaya yaangwiihera anamwane Yeesu weera awiiyaathere matataawe ni aavekelele yaawo. Oohuseratho yahaahiiha ni masu.

¹⁴Yeesu aaweerela: “Mwaahiye anamwane awo erwe wa Miyo ni muhiwooceelihe, niwoko omwene wa wiirimu ti wawaya yaawo anlikana ntoko ala.”

¹⁵Aatavakaru, aavenya vaavaale.

¹⁶Vano mukina aamwaattamela Yeesu ni aamukoha: “Muhusiha, kipake eheeni yooreera weera kiphwanye okumi woohimala?”

¹⁷Yeesu aamwaakhula: “Heeni munkikohaanyu ya yooreera? Ori mmoha paahi ooreera. Mwatthuna ovolowa mookumini woohimala, mwiiwelele malamulo.”

¹⁸“Taavi?” aamukoha. Yeesu aamwaakhula: “Muhiive, muhiraruwe, muhiiye, muhoothe,

¹⁹mwaattittimihe atithinyu ni amayinyu,” ni “munsivele mukhwiinyu ntoko muniisivelaanyu.”

²⁰Mmiravo aamweerela: “Ootheene awo miyo kinniiwelela. Enkihaleelatho eheeni?”

²¹Yeesu aamwaakhula: “Mwatthuna okhala ookwanela, murowe, mwathumihe sooreelasanyu ni mwaavahe oohaawa, ni mmwikhaleno etthu yooreeraxa wiirimu. Vahoolowaya, ngwe ni mukitthare.”

²²Iiwalaawe yeeyo, mmiravo ole aasusa ahihakalalaka, niwoko aakhalano itthu sincipale sooreeraxa.

²³Vano Yeesu aaweerela oohusera: “Miyo kinooleelani ekhaikhai: ti woorika namapuha ovolowa moomweneni wa wiirimu.

²⁴Ni kinooleelanitho: ti wookhweiya ekamelu* ovolowa vamwiitheni wa singano, ohikhanle namapuha ovolowa moomweneni wa wiirimu.”

²⁵Woowiiwa yeeyo, oohusera yaatikhinaxa ni yaamukoha: “Wa mwaheene yoola, taani aneera awere ovuluxiwa?”

²⁶Yeesu aahaaweha yaawo ni aawaakhula: “Wa mutthu khoongwereya, mene wa Muluku itthu sootheene sinoowereya.”

²⁷Pedru aamwaakhula: “Hiyo noohiya sootheene weera nootthareeni. Nnaakhele eheeni?”

²⁸Yeesu aaweerela: "Miyo kinooleelani ekhaikhai: mweehuhuni enyowani engwa, Mwaana a mutthu akilaathiyeene vahiceni ya ovuwa, nyuwo mukitthanre mmwikilaathi vahiceni muloko ni piili weera muthorihe ipuumba* muloko ni piili sa oYixrayeli.

²⁹Ni ootheene ahiyale impasaya, axunnaya, axirokoraya, asitithaya, asimayaya, anamwanaaya, hoye hoye imattasaya niwoko na Nsinanaka, eniyaakhele seiyo imaara ncira, ni eniiphwanyetho okumi woohimala.

³⁰Wa soothesene, ancipale oopacera eniikhale oomalihera ni ancipale oomalihera, eniikhale oopacera.”