Read Makhuwa-Shirima Matheyo 2 Bible Online

Matheyo 2 - Makhuwa-Shirima bible

Matheyo 2

¹Yeesu aayariwe oBetelehemu, elapo ya oYudeiya, mmahukuni a mwene Herodi. Anamiruku yaarweenle ninkhuma nsuwa mpaka oYerusaleemu, ni

²yaakoha: “Ori woowi Mwaana mukhaani oyariwe mwene a aYuda? Naahoona ethenyeeriyaawe ninkhuma nsuwa, ni naarweenle omuttittimiha.”

³Mwene Herodi iiwalaawe seiyo, aariipiwa murima, vamohatho ni atthu a oYerusaleemu.

⁴Aathukumanyinghaawe ahooleli a asaserdoti* a muloko wa atthu ni anamawera a nlamulo*, aahaakohakoha weera Kristu anaayariwe woowi.

⁵Awo yaamwaakhula: “oBetelehemu, elapo ya oYudeiya, niwoko mprofeeti aalepa ha:

⁶‘Weyotho, Betelehemu, wa elapo ya oYudeiya, vekhaikhai khoohiyono mukhaani variyari wa ibooma sa oYudeiya, niwoko mwa weyo anaakhumelele Muhooleli anaakhale Mukukhuli a atthwaaka, aYixrayeli.’”

⁷Herodi aawiitthana anamiruku muxiirini, ni aahaakohakoha mwaha wa ehuhuweene yeeyo ethenyeeri yaawiiyaaya.

⁸Aahaarumihela anamiruku oBetelehemu aweerelaka: “Murowe mwiiwelele nnenesene mwaha wa Mmiravo Owo. Mwaamphwanyakaru, mukileele weera miyotho kimuttittimihe.”

⁹Yaamwiiwalaaya mwene, yaapwahawo, ni ethenyeeri yoonnaaya ninkhuma nsuwa yaarowa ohoolowaya. Ethenyeeri yaaheemela nipuro aaraawewo Mmiravo.

¹⁰Yoonnaaya ethenyeeri, yaahakalalaxa.

¹¹Woovolowani mpaani, yaamoona Mwaana areene ni amayawe Mariya. Yaamukokhorela ni yaamulapa. Yaahula mirupasaya ni itthu sooreera saarimo, enamvaha samahala: iyuuma soorikaxa ni makhura oowunkhelaxa.

¹²Muluku aahaaleela anamiruku moolohani weera ehihokoleele wa Herodi. Vano yaawo yaapwaha elapwaaya, eviraka ephiro ekina.

¹³Yaarongwaaya, ndyelo a Apwiya aahoowa wa Yoseefe moolohani, eeraka: “Mvenye, munkuxe Mwaana ni amayawe, ni muroweke wExipitu. Mwakhale weiwo mpaka miyo kineeraaka kooleeleni, niwoko Herodi anaamwaase Mwaana weera amwiive.”

¹⁴Vano Yoseefe aavenya, aamukuxa Mwaana ni amayawe ehuhu ya ohiyu, enapwaha erowaka wExipitu.

¹⁵Yaakhalawo mpaka okhwa wa Herodi. Ti hiiho yaakwaniheriwaaya yeeyo Muluku aahimalaawe mwa mprofeeti, eeraka: “Miyo kaamwiitthana Mwanaka wExipitu.”

¹⁶Aasuwenlaawe Herodi weera aalokotthiwa ni anamiruku, aanyoonyiwa vancipale ni, aalikelelaka ehuhu anamiruku yaahimalaaya, aalamula owiiva anamwane asilopwana ootheene a oBetelehemu ni mukhwipimwaya yaarino iyaakha piili mpaka ooyariwa vaanaano.

¹⁷Ti hiiho yaakwaniheriwaaya yeeyo aahimalaawe mprofeeti Yeremiya eeraka:

¹⁸“Waahiiwanyeya okhuwela oRama — wiinla ni olalamika vancipale. Rakheli awiinlelaka anamwanaawe ni akhoottaka opepesiwa, niwoko khaawowo anamwane.”

¹⁹Aakhwiiyaawe Herodi, aahoowa ndyelo a Apwiya moolohani mwa Yoseefe wExipitu,

²⁰eeraka: “Mvenye, munkuxe Mwaana ni amayawe ni murowe elapo ya oYixrayeli, niwoko yaale yaamwaasaasa Mwaana weera emwiive, ahookhwa.”

²¹Owo aavenya, aamukuxa Mwaana ni amayawe ni aahokoleela elapo ya oYixrayeli.

²²Iiwalaawetho weera Arikilawo aari namukalamba a atithawe Herodi, alamulaka elapo ya oYudeiya, Yoseefe aahoova orowa weiwo. Muluku aamooperera Yoseefe moolohani, ni owo aarowa elapo ya oGalileiya.

²³Aarowa ni aamaka esidade emoha yiitthaniwa Nasarete. Ti hiiho yaakwaniheriwaaya yeeyo yaahimmwale ni maprofeeti: “Owo aniitthaniwe muNasarete.”