Read Makhuwa-Shirima Matheyo 22 Bible Online

Matheyo 22 - Makhuwa-Shirima bible

Matheyo 22

¹Yeesu aawuulumelatho ni soolikanyiha eeraka:

²“Omwene wa wiirimu ori ntoko mwene omurehererenle mwanawe efesta ya othelana.

³Aahaarumihela arumeiyaawe atthu yaalattuliwe ofestani, eweerelaka weera eweeke, mene awo khayaatthunne orwa.

⁴Aahaarumihatho arumeiyi akina aweerelaka: ‘Mwaaleele oolattuliwa weera miyo kooreherera efesta ya othelana. Imombesaka ni ikhondoolosaka sooneneva soohiiviwa, ni sootheene soorehereriwa.’

⁵Vano awo khayaapwantthetho ni yaavenya: mmoha omattawawe, mukina othumihawawe.

⁶Yaahanle, yaavaraka arumeiyi, yaahaahasula ni yaawiiva.

⁷Mwene aanyoonyiwa ni aahaarumiha anakhottwaawe, ni awo yaawiiva anamwiiva ale ni yaahisa esidadaaya.

⁸Vano aaweerela arumeiyaawe: ‘Efesta ya othelana yoolikana, mene oolattuliwa khayaaphwanenle.

⁹Murowe mmalakani ni mwaalattule ootheene muneeraanyu mwaaphwanye.’

¹⁰Arumeiyi yaarowa mmiseweni ni yaahaathukumanya ootheene yaawenraaya waaphwanya — ooreera ni oonanara murima. Nipuro na efesta ya othelana naasareya ni oolattuliwa.

¹¹Avolowaka mwene weera awoone oolattuliwa, aamoona mutthu ahaawanre yoowara ya othelana

¹²ni aamukoha: ‘Nthamwene, heeni muvolongwaanyu muumu muhiwaraka yoowara ya othelana?’ Mulopwana aamaalatho.

¹³Vano mwene aaweerela arumeiyi: ‘Muntthuke matata ni inaawo, ni mumvonyere vaate, mpiphini. Weiwo onuukhale wiinla ni okhuuriha maino.’

¹⁴Vano, ancipale anniitthaniwa, mene vakhaani ti oothanliwa.”

¹⁵aFarisi* yaavenya ni yaapacera ovaanela moota heeni yeeraaya emvare ni maswaawe.

¹⁶Yaamurumihela oohuseraaya vamoha ni atthu a Herodi yaamweerenle: “Muhusiha, noosuwela weera Nyuwo muri oororomeleya nitho weera munghusiha ephiro ya Muluku moota wa ekhaikhai. Khamumviriyeliwa ni akina, hata khamunimuthanla mutthu.

¹⁷Munileeletho, munuupuwela hai: ontthuneya omuliva musoko Seesari, hoye hoye naari?”

¹⁸Yeesutho, asuwelaka soowuupuwelasaya soonanara, aahaakoha: “Anamwiixeera! Heeni nyuwo munkeereraanyu?

¹⁹Mukoonihere nikhoobiri na musoko.” Awo yaamoonihera edinaariyu* emoha,

²⁰ni Owo aahaakoha: “Ecaambulo ela ni soolempwa iya ti sawani”?

²¹Awo yaamwaakhula: “Sa Seesari.” Owo aaweerela: “Vano, mumvahe Seesari yeeyo eri yawawe, ni wa Muluku eri yawawe.”

²²Yiiwaka yeeyo, awo yaatikhina ni emuhiyaka, yaapwaha.

²³Nihuku nenenenne aSaduki*, anxuttiha weera khoowowo ovenyerera, yaamwaattamela Yoowo ni yookoha ela:

²⁴“Muhusiha, Moisesi aaheera weera mulopwana akhwa woohimuhiya mwaana mulopwana, munneiye amutheleke naamukhweli, anaamuhiyere ekhapira.

²⁵Variyari wa hiyo yaakhala axunna athanneeli. Oopacera aathela ni aahookhwa. Hapo khaakhalanne mwaana mulopwana, anamuhiyera mwaarawe munneiye.

²⁶Etthweene yeeyo yaaheereiya ni anaaveeli, anaararu mpaka anaathanneeli.

²⁷Woomalihera, muthiyana aahookhwa.

²⁸Vanonto, moovenyererani, yeenre ootheene yamuthelaka, taani a athanneeli anaakhale iyawe?”

²⁹Yeesu aawaakhula: “Nyuwo mootapanya vancipale, niwoko khamusuwenle Yoolempwa*, hata ikuru sa Muluku.

³⁰Moovenyererani, atthu khaanthela, hata khoonthelaniwa, mene eniikhale ntoko andyelo wiirimu.

³¹Mwaha wa ovenyerera wa akhwiiye, khamusomme yeeyo Muluku aaweerenlaaweni:

³²‘Miyo kiri Muluku a Abrahaamu, Isaaki ni Yakobe’? Owo khahiyono Muluku a akhwiiye, mene a akumi!”

³³Yiiwaka yeeyo, atthu ancipale yaatikhina ni nihusihonawe.

³⁴Yiiwaka weera yeeriwe Yeesu aahaahiya aSaduki* ehaakhunle, aFarisi* yaathukumana.

³⁵Mmoha a yaawo, namawera a nlamulo*, aamweerera Yeesu ni yookoha ela:

³⁶“Muhusiha, malamulo heeni oopwaha ootheene?”

³⁷Yeesu aamwaakhula: “‘Mwaasivele Apwiya Mulukwaanyu ni murimaanyu wootheene, ni okumaanyu wootheene, ni wuupuwelawanyu wootheene.’

³⁸Nna ti noopacera ni noottittimiheyaxa.

³⁹Ni nanaaveeli nri noolikana ni nenna: ‘Munsivele mukhwiinyu ntoko muniisivelaanyu muneenaanyu.’

⁴⁰Malamulo ootheene ni maprofeeti ootheene akumanyihiwe ni malamulo meeli ala.”

⁴¹Ethukumanneene hiihaawo aFarisi*, Yeesu aahaakoha:

⁴²“Munuupuwela hai mwaha wa Kristu? Mwaana awani”? Awo yaamwaakhula: “Mwaana a Davide.”

⁴³Vano Owo aaweerela: “Heeni Davide, uulumaka mMunepani, ommwiitthanaawe: ‘Apwiya’? Owo oneera:

⁴⁴‘Apwiya yeenre wa Apwiyaaka: Mukilaathi moonowaaka mulopwana mpaka Miyo kineeraaka kiwiikaathi amwiitanaanyu vathi wa inaawosanyu.’

⁴⁵Davide amwiitthana ‘Apwiya,’ ongwereya hai Owo okhala mwanawe?”

⁴⁶Khaawo yaawenre omwaakhula. Ni okhuma nihuku nenne mpaka ohoolo, khaawo eerenre omukoha yookoha ekina.