Read Makhuwa-Shirima Matheyo 24 Bible Online

Matheyo 24 - Makhuwa-Shirima bible

Matheyo 24

¹Yeesu aakhuma Mpaani mwa Muluku ni eera eettaka, oohuseraawe yaamwaattamela Yoowo weera emoonihere otekiwa wa Empa ya Muluku.

²Vano Owo aahaakoha: “Munimoona sootheene iya? Miyo kinoororomelihani: khanirwa nikhala va nluku ni nluku. Ootheene awo eniipwexiwe.”

³Yeesu akilaantheene vamwaakoni wa Sooliveira, oohuseraawe yaarowa wa Yoowo okhwipi ni yaamweerela: “Munileele, yaakhani sineeraaya sikhumelele itthu iyo? Ni eneneero heeni ya owawanyu ni emalihero ya ihuhu?”

⁴Yeesu aawaakhula: “Mwiipasoope weera ahikhale aneera oolokottheni,

⁵niwoko ancipale eniirwe mwa Nsinanaka yeeraka: ‘Miyo ti Kristu,’ ni eniyaalokotthe ancipale.

⁶Nyuwo mmwiiwe sa ikhotto ni suulummwaka sa ikhotto, vano mwiipasoope weera muhituthuwe. Ontthuneya weera itthusene seiyo seereiye, mene iyo khasinthoonyera ommaleloni.

⁷Elapo eniiwane ni elapo, aani, omwene onuuwane ni omwene. Nsikhale itala ni otetereiya wa mapuro makina.

⁸Sootheene iyo nsikhale ompacereroni wa ovoreiya wa oyara.

⁹Vano awo eniyoovaherereni weera musoondiwe ni mmwiiviwe. Nyuwo mmwithanyiwe ni ilapo sootheene niwoko na Miyo.

¹⁰Ehuhuweene yeeyo, ancipale eniihapuwe munroromeloni, evarihanaka ni esoondanaka akina ni akhwaaya.

¹¹Maprofeeti oowootha ancipale eniiwe ni eniyaalokotthe ancipale.

¹²Niwoko na waandyeerereiya otakhala, osivela wa ancipale onuuriire,

¹³mene yoowo anaavilele mpaka ommaleloni anaavuluxiwe.

¹⁴Ni masu ooreeraxa ala a omwene eniilaleiwe mweelaponi yootheene ntoko onamoona wa miloko sootheene, ni vahoolowaya onuuwe ommaleloni.

¹⁵Hiiho, nyuwo moonaka yiikaathiweene vaNipuroni Nootteela* etthu yoonanaraxa yoowuulihaxa muru* mwa yeeyo uulumalaawe mprofeeti Daniyeli, — owo onsoma iiwexexeke!

¹⁶Vano, moona, awo eneera ekhale oYudeiya, etthaweleke omwaakoni.

¹⁷Yoowo aneera akhale vanipathoni na empaawe, ahikhuruwe weera akuxe etthu mpaani.

¹⁸Yoowo aneera akhale omattawawe ahihokolowe weera akuxe mukaandyowaawe.

¹⁹Eniikhale oowoopihaxa mahuku awo wa asithiyana oorupala ehuhuweene yeeyo ni wa yaawo oowaamwiha.

²⁰Muvekele weera otthawawanyu ohikhumelele mulaala, hoye hoye eSaabadu,

²¹niwoko ehuhuweene yeeyo nsikhale soohooxa sincipale, moota wooweera kheenatoko okhumelela okhuma ompacereroni wa elapo ya vathi mpaka vaanaano vaava, hata kheerwa ekhumelelatho.

²²Vano, mahukweene yaawo yahaavukuliwe, saano ahivuluxiwe hata mmoha, mene niwoko na oothanliwa, mahuku awo eniivukuliwe.

²³Akhala mukina ongweerelani: ‘Moone, Kristu ori va!’ Hoye hoye: ‘Iwe ori Owo,’ muhimwaakhulele!

²⁴Eniikhumelele akristu oowootha ni maprofeeti oowootha eneera epake ineneero sitokotoko ni sootikhiniha weera, wawereya, yaalokotthe mpaka oothanliwa.

²⁵Moone, Miyo kooleenleni ehinaaye.

²⁶Hiihotho akhala mukina ongweerelani: ‘Owo ori onikareni iwe,’ muhirowe, naari ‘Owo ori mpaani mmwe,’ muhimwaakhulele!

²⁷Vano, ntoko overinya onkhuma ninkhuma nsuwa ti woowooneya mpaka ninkela nsuwa, hiihotho onuukhale owa wa Mwaana a mutthu.

²⁸Weiwo onkhalaayawo muttembo, marepo eniithukumanewotho.

²⁹Woowaakuveya saamalakaru soohooxa sa mahukweene yaawo, ‘Nsuwa khanoopa ni mweeri khawaaratho; ithenyeeri sinoomora sikhumaka wiirimu, ni ikuru sa wiirimu nsikhale sootathiwa.’

³⁰Vano eniiwe wiirimu eneneero ya Mwaana a mutthu. Miloko sootheene sa elapo ya vathi nsilalamike, ni nsimoone Mwaana a mutthu arweelaka mmahutteni a wiirimu ni ikuru ni ovuwa otokotoko.

³¹Owo anaarumihe andyelowaawe ni nsu ntokotoko na nipalapatta, ni awo eniyaathukumanyihe oothanliwaawe wa elapo ya vathi yootheene, okhuma ekotenle erimu mpaka mpatta mukinatho.

³²Muxuttere yeeyo ya efiigu: iphandisaya saakhalaka sikithi ni makukhwaaya yaapaceraka ophuwa, moosuwela weera elimwe eri vakhiviru.

³³Hiihotho, moonaka itthu sootheene seiyo, musuwele weera Owo ookhuveela wa milako.

³⁴Miyo kinoororomelihani: ekhapira ela kheerwa emala mpaka sootheene iyo sineeraaya seereiye.

³⁵Wiirimu ni vathi onuuvire, mene maswaaka kheerwa eviratho.

³⁶Nihuku ni ewoora khaawo asuwenle, hata andyelo a wiirimu, hata Mwaana, ehikhanle Atiithi paahi.

³⁷Ntoko yaakhumelenlaaya mahuku a Nowe, hiihotho onuukhale moowaani wa Mwaana a mutthu.

³⁸Vano, mahuku a khalayi ale, sihinaaye mirupi, atthu yeera ecaaka, ewuraka, ethelaka ni ethelanaka, mpaka nihuku nenne Nowe aavolongwaawe munikulani.

³⁹Awo khayiiwexenxe mpaka saaphiyalaaya mirupi ni saakuxalaaya ootheene. Hiiho eniyeereiye moowaani wa Mwaana a mutthu.

⁴⁰Asilopwana eeli eniikhale omatta: mmoha anaakuxiwe; mukina anaahale.

⁴¹Asithiyana eeli eniixile vamoha: mmoha anaakuxiwe; mukina anaahale.

⁴²Tivawo, mukhale oowehaweha, niwoko khamusuwenle nihuku angwaaya Apwiyaanyu.

⁴³Mwiiwexexetho yeeyo: Mwaneene a vaate aasuwenle ewoora heeni aneeraawe awe namwiiya, owo saano alipelenleene ni ahihiyale vaatewawe wiiyiwaka.

⁴⁴Hiiho nyuwotho ontthuneya wiireherera, niwoko Mwaana a mutthu anaawe ewoora nyuwo mungwehereraanyu vakhaani.

⁴⁵Murumeiyi heeni oororomeleya ni a miruku wa yoowo animvahereraaya Apwiyaawe sa owannyaya weera aavaheke akina yooca ya ehuhu yootthuneya?

⁴⁶Ooreelihiwa ti murumeiyi, Apwiyaawe yaahokolowaka, eneeraaya emphwanye apakaka yeeyo.

⁴⁷Miyo kinoororomelihani weera awo enimukhalihe muneene a sooreelasaya sootheene.

⁴⁸Waaritho weera murumeiyi owo onkhala oonanara ni oniixeerela: ‘Apwiyaaka anoopisa’

⁴⁹ni vano anapacera waamana arumeiyi akhwaawe, acaaka ni awuraka ni anamawura,

⁵⁰vanonto Apwiya a murumeiyi owo eniiwe nihuku ohinaawehereraawe yaawo ni ewoora ohisuwenlaawe.

⁵¹Awo eniimuthikile eriyariru ni eniimvaherere vanipuroni na anamwiixeera, weiwo onuukhale wiinla ni okhuuriha maino.