Read Makhuwa-Shirima Matheyo 25 Bible Online

Matheyo 25 - Makhuwa-Shirima bible

Matheyo 25

¹Omwene wa wiirimu onuulikane ntoko aximwali oowiikosoopa muloko yaakuxale onyaaraaya ni yaarongwe weera yakumane ni namatthomera.

²Athanu a yaawo yaari oohikhalano miruku, ni akinaawo yaari a miruku.

³Yaawo oohikhalano miruku yaakuxa onyaaraaya, mene khayaakuxaletho makhura.

⁴Wa soothesene, amiruku ti yaakuxale makhura mmapoottoroni vamoha ni onyaaraaya.

⁵Namatthomera aapisa ophiya, ni ootheene yaavoliwa ikhove ni yaakona.

⁶Ohiyu eriyari waahiiwiwa okhuwela: ‘Namatthomera ookhuveela! Mukhume weera munkumaneno!’

⁷Vano aximwali oowiikosoopa ootheene yaavenya ni yaapattiha onyaaraaya.

⁸Yaawo oohikhalano miruku yaawerela ale a miruku: ‘Munivahe vakhaani makhuraanyu, niwoko onyaaraahu onoocipha.’

⁹Awo a miruku yaawaakhula: ‘Hoye! Onoowereya weera khaankwana wa hiyo ni wa nyuwo. Murowe wa anthumiha makhura ni mwathume.’

¹⁰Erowaka awo othuma makhura, namatthomera aaphiya. Aximwali oowiikosoopa yaari oolikaneene, yaavolowa ni yoowo mufestani ya othelana. Ni nsele naawaliwa.

¹¹Vahoolowaya yaahoowatho aximwali oowiikosoopa akina ni yaaheera: ‘Apwiya, Apwiya, munihulele nsele!’

¹²Vano owo aawaakhula: ‘Vekhaikhai miyo nkoosuwenleni.’

¹³Tivawo, mwiipasoope, niwoko khamusuwenle nihuku, hata ewoora.

¹⁴Omwene wa wiirimu onuukhaletho ntoko mulopwana, atthunaka weetta mukwaha, aawiitthana arumeiyaawe ni aahaaroromeliha sooreelasawe.

¹⁵Mmoha aamvaha italentu* ithanu, mukina italentu* piili, ni mukinatho aamvaha emoha, wa mutthu ti mutthu aamvaha moota ongweraawe. Vahoolowaya aapwaha ni mukwahaawe.

¹⁶Yoowo aakhenle italentu* ithanu aavenya woowaakuveya, aavarela muteko ni aawina ithanutho sikina.

¹⁷Nitho yoowo aakhenle italentu* piili aawina piili sikina.

¹⁸Yoowo aakhenle etalentu* emoha, aavenya, anathipa nlitti, anavitha musurukhu wa Apwiyaawe.

¹⁹Yavinraaya ehuhu yincipale, Apwiya a arumeiyi ale yaahokolowa ni yaamaliha mulattu wa musurukhu ni yaawo.

²⁰Yoowo aakhenle italentu* ithanu ahaawiihera ithanu sikina ni aaweerela: ‘Apwiya, mwaakiroromela ni italentu* ithanu; moone, koowina ithanutho.’

²¹Apwiya yaamwaakhula: ‘Ti wooreera, murumeiyi ooreera ni oororomeleya! Weyo waari oororomeleya wa vakhaani, miyo nkoororomele wa sincipale. Owe ni ovolowe moohakalalani wa Apwiyaawo.’

²²Aahoowatho yoowo aakhenle italentu* piili ni aaweerela: ‘Apwiya mwaakiroromela ni italentu* piili; moone, koowina piilitho.’

²³Apwiya yaamwaakhula: ‘Ti wooreera, murumeiyi ooreera ni oororomeleya! Weyo waari oororomeleya wa vakhaani, miyo nkoororomele wa sincipale. Owe ni ovolowe moohakalalani wa Apwiyaawo.’

²⁴Wookisera aahoowa yoowo aakhenle etalentu* emoha anaweerela: ‘Apwiya, miyo kaasuwela weera nyuwo ti mulopwana oowuuma murima munghepha weiwo muhiphatteiyaanyu ni muntakansa weiwo muhaaliyaanyu.

²⁵Tivawo kaahoova, kaavenya ni kaavitha etalentwaanyu* munlittini. Moone, va eri yawinyu.’

²⁶Apwiya yaamwaakhula: ‘Murumeiyi oonanara ni ooreesi! Weyo waasuwela weera miyo kinghepha weiwo kahaaphatteiyaaka ni kintakansa weiwo kahaaliyaaka?

²⁷Vano, waatthuneya weyo othokorora musurukhwaaka wa anamathokorora musurukhu, weera miyo kaahokolowaka, kaakhele musurukhu woopwaha.

²⁸Mmwaakhe etalentwaawe* ni mumvahe yoowo orino muloko.

²⁹wa yoowo orino, anaavahiwe, ni anaakhalane vancipale, ni yoowo ohikhalannetho, mpaka yeeyo orinaawe, onimwaakhiwa.

³⁰Ni mumvonyere mpiphini murumeiyi oohivareleya muteko, weiwo onuukhale wiinla ni okhuuriha maino.’

³¹Mwaana a mutthu aawaaka moovuwanimwawe vamoha ni andyelowaawe ootheene, anaakilaathi vahiceniwawe ya ovuwa.

³²Miloko sootheene nsithukumanyihiwe vahoolowawe, Owo anaammwaramwaxe mukina ni mukhwaawe ntoko mukukhuli ommwaramwaxaawe ikhondoolo ni ipuri.

³³Ni aniikaathi ikhondoolo moonowaawe mulopwana, ni ipuri moonowaawe muthiyana.

³⁴Vano Mwene anaaweerele yaawo a moono mulopwana: ‘Ngwe, ootteelihiwa a Atithaka. Mwaakhele ntoko yoohiyeriwa* omwene mureherereliwaanyu okhuma ompacereroni wa elapo ya vathi.

³⁵Kaavoliwa etala, ni mwaakivaha yooca; kaavoliwatho ntthona, ni mwaakivaha maahi; kaari namarwa, ni mwaakaakhela nnene;

³⁶kaahaawela ikuwo, ni mwaakiwariha; kaavoreiwa, ni mwaakikosoopa; kaari okaliposo ni mwaakixekura.’

³⁷Vano oororomeleya eniiwaakhule: ‘Apwiya, yaakhani naawoonnaahuni ni etala ni nnoovahani yooca, hoye hoye ni ntthona ni nnoovahani maahi?

³⁸Yaakhani naawoonnaahuni ntoko namarwa ni nnawaakhelani nnene, hoye hoye muhaawelaka ikuwo ni nnoowarihani?

³⁹Yaakhani naawoonnaahuni muvoreiwaka, hoye hoye mureene okaliposo ni nnooxekurani?’

⁴⁰Mwene anaakhule: ‘Miyo kinooleelani ekhaikhai: ‘Yeeyo mwaampakenlaanyu mmoha a axunnaka ooyevaxa, mwaakipakenle Miyo.

⁴¹Vano Owo anaaweerele yaawo a moono muthiyana: ‘Oolaphiwa! Mususeke wa Miyo mpaka mmooroni woohimala oreherereliwaawe Satana ni andyelowaawe.

⁴²Vano, kaavoliwa etala, ni khamwaakivanghe yooca; kaavoliwa ntthona, ni khamwaakivanghe maahi;

⁴³kaari namarwa, ni khamwaakaakhenle nnene; kaahaawela ikuwo, ni khamwaakiwaringhe; kaavoreiwa ni kaari okaliposo, ni khamwaakixekunre.’

⁴⁴Awotho eniiwaakhule: ‘Apwiya, yaakhani naawoonnaahuni ni etala, hoye hoye ntthona, hoye hoye ntoko namarwa, hoye hoye muhaawelaka ikuwo, hoye hoye muvoreiwaka, naari mureene okaliposo, ni nihookhaviherani?

⁴⁵Awo eniiwaakhule: ‘Miyo kinooleelani ekhaikhai: Yeeyo mwaahiyalaanyu ompakela mukina a asikhaani ala, mwaahiyatho okipakela Miyo.’

⁴⁶Ni awo eniirowe moottaruxiwani woohimala, oororomeleyatho mookumini woohimala.”