Read Makhuwa-Shirima Matheyo 26 Bible Online

Matheyo 26 - Makhuwa-Shirima bible

Matheyo 26

¹Amalihaka ohima itthu iye, Yeesu aaweerela oohuseraawe:

²“Moosuwela weera ahanle mahuku meeli ophiya ehuhu ya mPaska*, ni Mwaana a mutthu anaavahereriwe weera athomeiwe.”

³Wa ehuhuweene yeele, ahooleli a asaserdoti* ni asitokweene a muloko yaathukumana empa etotoko ya mutokweenexa a asaserdoti*, nsinanawe iitthaniwa Kayafasi,

⁴ni ootheene yaavaanela omvara Yeesu ni moota mukina woomvariha weera emwiive.

⁵Yaaheeratho: “Ehikhale ehuhu ya efesta ya mPaska*, weera ohikhale onyakuleleiya variyari wa muloko.”

⁶Areene Yeesu oBetaniya owannyawe Simeyoni namakokho,

⁷aamwaattamela muthiyana mmoha ni mukoomba woopakiwa ni alabaster, ereenemo makhura oowunkhelaxa ni oorikaxa. Amphwanyaka Yeesu uurammeene vameesa, owo aarihela makhura ale mmuru mwa Yeesu.

⁸Oohusera, yoonaka yeeyo, khayaahakalanle ni yaakoha: “Annanariheliwa heeni?

⁹Makhura ala yaathumihiwe, saano naakhenleene musurukhu mwincipale, ni owo yaamvahiwa atthu oohaawa.”

¹⁰Iiwaka yeeyo, Yeesu aaweerela: “Heeni nyuwo munimxupaanyu muthiyana ola? Ola ookipakela etthu yooreera.

¹¹Vano, atthu oohaawa eniikhale ni nyuwo mahuku ootheene, mene Miyo nkinrowa okhala ni nyuwo mahuku ootheene.

¹²Orihenlaawe makhura oowunkhelaxa mweerutthunimwaka, owo oopaka yeeyo weera akirehererele ovithiwawaka.

¹³Miyo kinoororomelihani weera mapuro yaawo ootheene a elapo ya vathi masu ooreeraxa ala eneeraaya elaleiweke, yeeyotho owo opankaawe eniithalihiwe, weera ola uupuweleliwe.”

¹⁴Vano mmoha a muloko neeli, iitthaniwa Yudasi Iskariyoti, aarowa wa ahooleli a asaserdoti*

¹⁵ni aahaakoha: “Mmukivahe hai miyo koovahererani Owo?” Hiiho awo yaamuliva makhoobiri miloko miraru a eparatha*.

¹⁶Evinyero vaavaale, Yudasi aapacera waasa ehuhu yootthuneya weera amvaherere.

¹⁷Nihuku noopacera na efesta ya ipaawu soohikhalano eferementu oohusera yaamwaattamela Yeesu ni yaamukoha: “Muntthuna woowi Nyuwo weera hiyo nareherere yooca ya mPaska*?”

¹⁸Owo aawaakhula: “Mwavolowe mmuttettheni ni mwamwaase mulopwana mukina ni mwamuleele: ‘Muhusiha eenre: ‘Ehuhuwaaka yookhuveela. Miyo kinrowa omuca mPaska* owannyinyu vamoha ni oohuseraaka.’”

¹⁹Oohusera yaapaka ntoko Yeesu aaleenlaawe, ni yaamureherera mPaska*.

²⁰Wiilaka, Yeesu aahuurama vameesa vamoha ni muloko neeli

²¹ni ecaaka, Owo aaweerela: “Kinooleelani vekhaikhai weera mmoha a nyuwo anaakivarihe.”

²²Awo yaathanana vancipale, enapacera omukoha mutthu ti mutthu eeraka: “Vekhaikhai nkihiyono miyo, Apwiya!”

²³Yeesu aaheeratho: “Yoowo ociiye vamoha ni Miyo esasaani emoharu yeela, anaakivarihe.

²⁴Mwaana a mutthu anaavarihiwe ntoko elempwalaaya mwaha wa Yoowo, mene Ii! Onoohaawa yoowo aneera amvarihe Mwaana a mutthu! Fataari ahaayariwe!”

²⁵Vano Yudasi, eera amvarihe, aamweerela: “Vekhaikhai nkihiyono miyo, Muhusiha.” Yeesu aamwaakhula: “Aani, ti weyo!”

²⁶Ecaaka, Yeesu aakuxa epaawu, anamutthapela Muluku, anameiyanya, anaavaha oohuseraawe, eeraka: “Mukuxeke ni muceeke: ela ti erutthwaaka.”

²⁷Vahoolowaya aakuxa ekoomixi, anamutthapelatho Muluku, anaavaha oohusera, eeraka: “Ngwureke ootheene.

²⁸Ela ti ephomaaka ya wiiraanyiha, enriheya mwaha wa atthu ancipale weera eleveleliwe soottheka.

²⁹Miyo kinooleelani weera okhuma vaanaano va mpaka ohoolo, nkinrowa owura wa yoowiima ya ematta ya iwuuva* mpaka nihuku nenno kineeraaka kiwure eviinyu enyowani vamoha ni nyuwo moomweneni wa Atithaka.”

³⁰Yiipakaru ecipo, yaavenya erowaka omwaako wa Sooliveira.

³¹Vano Yeesu aaweerela: “Ohiyuweene yoola ootheene nyuwo munookihiya, niwoko yoolempwa: ‘Kinoomuvulaliha Mukukhuli, ni ikhondoolo sa muhuwo nsimwaareiye.’

³²Kaavenyererakatho, kinoorowa ohoolowanyu wa oGalileiya.”

³³Pedru aamwaakhula: “Hata ootheene yoohiyeeni, miyo nkinoohiyani!”

³⁴Yeesu aamwaakhula: “Kinoororomelihani weera ohiyuweene yoola, ahinaaye wiipa muthupi, munookiruna imaara tthaaru.”

³⁵Pedrutho aaheera: “Hata otthuneyaka weera miyo kikhwe vamoha ni Nyuwo, miyo nkinoorunani.” Ni oohusura akina ootheene yaaheeratho yeeyo.

³⁶Yeesu aarowa ni oohuseraawe vanipuroni niitthaniwa Gesemani, anaweerela: “Mukilaathiki va, Miyo kinrowa vale ovekela.”

³⁷Amurowanaka ni yoowo Pedru ni anamwane eeli a Zebedeyo, aapacera othananaxa ni oripiwa murima.

³⁸Vano aaweerela: “Munepaaka ori woothananaxa, mpakatho okhwa. Mukhale va ni mulipeleleke ni Miyo.”

³⁹Arowaka vahoolo vakhaani, aahuuramihela ekhovaawe vathi, anavekela: “Tiithi, wawereya, mususihe wa Miyo ekoomixi ela, wa soothesene, ohikhale ntoko kintthunaaka, mene ntoko muntthunaanyu.”

⁴⁰Aahokoleela wa oohuseraawe ni aahaaphwanya ekonaka. Vanonto Owo aamukoha Pedru: “Khamuwenre olipelela ni Miyo hata ewoora emoha paahi?

⁴¹Mulipelele ni muvekele weera muhivariwe ni yooweereriwa. Munepa ti woolikana, mene erutthu ti yoohilipa.”

⁴²Aavenyatho arowaka ovekela: “Atithaka, waahiwereya osusiha wa Miyo ekoomixi ela kihiwuraka, opakiwe otthunawanyu.”

⁴³Ahokoleelakatho, aahaaphwanya ekonaka, niwoko yaavoliwa ikhove.

⁴⁴Vano aahaahiya ni aavekela emaara yanaararu, ahimaka masu mamoharu.

⁴⁵Aahokoleela wa oohuseraawe anaweerela: “Nyuwo nlelo munookona ni munimwiitthuuwa? Yookhuveela ewoora aneeraawe avahereriwe Mwaana a mutthu mmatatani mwa anamattheka.

⁴⁶Muvenye ni nrowe. Iwe onimoowa namavarihaaka.”

⁴⁷Eeraka olokolola Yeesu, aaphiya Yudasi, mmoha a muloko neeli. Atthu ancipale yaari ni yoowo, ekunxeene mavaka ni ikopo, yaarumihiwe ni ahooleli a asaserdoti* ni asitokweene a muloko wa atthu.

⁴⁸Namavariha aahiiwanana eneneero ni yaawo, aweerelaka: “Yoowo kineeraaka kamuulumihe ni ebeecu, ti Yoowo. Mwamvareke!”

⁴⁹Arowaka woowaakuveya wa Yeesu, Yudasi aamweerela: “Salaama Muhusiha,” ni aambeeca.

⁵⁰Yeesu aamukoha: “Nthamwene, mwaaweenle eheeni?” Atthu akina yaamwaattamela, yaamvara Yeesu enamutthuka.

⁵¹Mmoha a yaale yaari ni Yeesu, ookolaka moonowaawe, aakhumiha ekatanaawe ni aakwasa naaru na murumeiyi a mutokweenexa a asaserdoti*.

⁵²Yeesu aamweerela: “Muhokoloxere mwaalo munluwoni! Vano, ootheene ankuxa mwaalo, eniiriheiye ni mwaalo.

⁵³Khamusuwenle weera Miyo kinoowera waavekela Atithaka, ni Awo eniikurumihele khuluwi andyelo oohaalikeleiya?

⁵⁴Moota heeni yeeraaya ekwaniheriwe Yoolempwa* yeenre ontthuneya weera itthu iya seereiye mooteene yoola?”

⁵⁵Ehuhuweene yeele Yeesu aaweerela atthu ancipale: “Niwoko heeni mungwaanyu okivara ni nyaalo ni ikopo? Miyo kinaalamula atthu weera ewane ni ebooma? Mahuku ootheene Miyo kannaxuttiha Mpaani mwa Muluku, ni khamwaakitthunke.

⁵⁶Sootheenetho iya seereiye weera ekwaniheriwe Yoolempwa* ya maprofeeti.” Vano oohusera ootheene yaamuhiya ni yaatthawa.

⁵⁷Yaawo yaamutthunke Yeesu yaamukuxa emuronghaka wa Kayafasi, mutokweenexa a asaserdoti*, weiwo yaathukumannaaya anamawera a nlamulo* ni asitokweene.

⁵⁸Pedrutho aamutthara areene ottaiwene mpaka vaate wa empa ya mutokweenexa a asaserdoti*. Vano, aavolowa ni aakilaathi ni anamalipelela weera oone seiyo seera sikhumelele.

⁵⁹Ahooleli a asaserdoti* ni ootheene a eSineedriyu* yaasaasa nthowa na Yeesu weera emuthorihele okhwa,

⁶⁰mene khayaaphwannye, naamwi yiixooniheraka anamoona ancipale oowootha.

⁶¹Woomaliha, yaahiixoonihera anamoona eeli yeeraka: “Mulopwana Ola aaheera: ‘Miyo kinoowera ophwata Empa ya Muluku ni kinooteka mmahukuni mararu paahi.’”

⁶²Vano aaheemela mutokweenexa a asaserdoti*, anamweerela Yeesu: “Khamunaakhula yeeyo awo angwootheraayani?”

⁶³Yeesutho aamaala. Mutokweenexa a asaserdoti* aamweerela: “Kinoonyesererani weera munlipele Muluku Mukumi: Nyuwo mwaari Kristu, Mwaana a Muluku, munileele!”

⁶⁴Yeesu aamwaakhula: “Nyuwo moheera muneenaanyu. Miyo kinooleelanitho: nniphiye nihuku muneeraanyu mmoone Mwaana a mutthu akilaantheene moono mulopwana wa Yoowo a ikuru sootheene ni awaaka mmahutteni a wiirimu.”

⁶⁵Ti vaavaawo mutokweenexa a asaserdoti* aahunlaawe soowarasawe eeraka: “Oomuveiha Muluku! Khaninaatthuna anamoona akina. Nyuwo mohiiwa omuveihawawe Muluku.

⁶⁶Munuupuwela hai?” Awo yaamwaakhula: “Omphwanela okhwa!”

⁶⁷Vano akina yaamusenyela owiitho, emmanaka ni icipakhira; akina yaammana ni ilatuma

⁶⁸yeeraka: “Otthome, Kristu, taani oomanne?”

⁶⁹Pedru akilaantheene vaate, ni namuteko muthiyana amwaattamelaka yoowo, aamweerela: “Nyuwotho mwaari ni Yeesu Yoole muGalileiya.”

⁷⁰Vano owo aaruna vamaithoni wa ootheene eeraka: “Nkisuwenle yeeyo munuulumaanyu.”

⁷¹Vano aavenya mpatta waari mulako mutokotoko, weiwo namuteko muthiyana mukina aamoonnaawe, ni aaweerela yaale yaari vaavaale: “Mulopwana ola aari ni Yeesu muNasarete.”

⁷²Ni owo, alipelaka, aarunatho eeraka: “Nkimusuwenle Mulopwana Owo.”

⁷³Eviraka ehuhu vakhaani, yaawo yaari weiwe yaaphiya wa Pedru ni yaamweerela: “Vekhaikhai, nyuwo ti mmoha a yaale. Muulumelowaanyu onoothoonyani.”

⁷⁴Vano aapacera onyohola ni olipela eeraka: “Nkimusuwenle Mulopwana Owo.” Woowaakuveya muthupi aahiipa.

⁷⁵Pedru aahuupuwelela masu Yeesu aamuleenlaawe eeraka: “Ahinaaye wiipa muthupi, munookiruna imaara tthaaru.” Avenyaka vaavaale, aahiinlaxa omvoreiyaka murima.